1 “ላፑንꬃ አጌናስ ኮይሮ ጋላሳን ጎይናናዉ ሺቅተ፤ አይ ኦሶካ ኦꬆፍተ፤ ሄ ጋላሳይ ሞይዘይ ፑነትያ ጋላስ። 2 ቦረይ ባይና እስ ዎፋኖ፥ እስ ማራዘነ እስ ላይꬅ ኩምዳ ላፑን ዶርሳ ኡርገታ ሳውያ ፁሳ ያርሾ ኦꬅድ ጎዳስ ያርሽተ። 3 ሄ ዎፋኑዋራ ሻማሆ ዛይተን ሙኑቀትዳ ሄꬑ ክሎ ግራመ ሎኦ ግስተ ꬊለ፥ እስ ማራዝያራ ናምኡ ክሎ ግራመ ግስተ ꬊለነ፥ 4 ላፑን ዶርሳ ኡርገታፐ እስ እስ ኡርግያራ እስ ክሎ ግራመ ꬊለ ያርሽተ። 5 ቃስ እስ ኮለ ህንተዉ ናጋራ አቶተꬃስ ያርሽተ። 6 ዎጋይ ኪተይሳꬆ፥ አጌና ፄሮን ያርሸትያ ፁሳ ያርሾ ቦላ፥ ካꬃ ያርሾ ቦላ፥ ጋላስ ጋላስ ያርሸትያ ፁሳ ካꬃ ያርሾ ቦላነ ኡሻ ያርሾ ቦላ ጉጅድ ያርሽተ፤ ሄስ ጎዳ ሳውያ ፁሳ ያርሾ።

7 “ላፑንꬃ አጌናን ታማንꬆ ጋላሳን አይ ኦሶካ ኦꬆፍተ፤ ህንተና ካዉሽድ ጎይኖስ ሺቅተ። 8 ቦረይ ባይና እስ ዎፋኖ፥ እስ ማራዘነ እስ ላይꬅ ኩምዳ ላፑን ዶርሳ ኡርገታ ሳውያ ፁሳ ያርሾ ኦꬅድ ጎዳስ ያርሽተ። 9 ካꬃ ያርሾ ኦꬅድ እስ ዎፋኖራ ሻማሆ ዛይተን ሄꬑ ክሎ ግራመ ሎኦ ግስተ ꬊለ፥ እስ ዶርሳ ኡርግያራ ናምኡ ክሎ ግራመ ꬊለነ 10 ላፑን ዶርሳ ኡርገታፐ እስ እስ ኡርግያራ እስ ክሎ ግራመ ꬊለ ያርሽተ። 11 ቃስ ናጋራ ያርሾ ኦꬅድ እስ ኮለ ያርሽተ። ናጋራ አቶꬃ ያርሹዋ ቦላ፥ ጋላስ ጋላስ ያርሸትያ ፁሳ ያርሹዋ ቦላ፥ ካꬃ ያርሹዋ ቦላነ ኡሻ ያርሹዋ ቦላ ሄሳ ጉጅድ ያርሽተ።

12 “ላፑንꬃ አጌናን ታማነ እቻሻንꬆ ጋላሳን፥ ዴፆ ኦሶ ኦꬆፍተ፤ ላፑን ጋላስ ኩመꬅ ጎዳ ቦንቻናዉ ሻቃራ ባኣለ ቦንችተ። 13 ቦረይ ባይና ታማነ ሄꬑ ዎፋኖታ፥ ናምኡ ማራዘታ፥ እስ ላይꬅ ኩምዳ ታማነ ኦይዱ ዶርሳ ኡርገታ ሳውያ ፁሳ ያርሾ ኦꬅድ ጎዳስ ያርሽተ። 14 ካꬃ ያርሾ ግዳና መላ ታማነ ሄꬑ ዎፋኖታፐ እስ እስ ዎፋኑዋራ ሻማሆ ዛይተን ሙኑቀትዳ ሄꬑ ክሎ ግራመ ሎኦ ግስተ ꬊለ፥ ናምኡ ማራዘታፐ እስ እስ ኡርግያራ ናምኡ ክሎ ግራመ ꬊለነ 15 ታማነ ኦይዱ ዶርሳ ኡርገታፐ እስ እስ ኡርግያራ እስ ክሎ ግራመ ꬊለ ያርሽተ። 16 ቃስ ናጋራ ያርሹዋስ እስ ኮለ ያርሽተ። ሄስ ጋላስ ጋላስ ፁሳ ያርሹዋ ቦላ፥ ካꬃ ያርሹዋ ቦላነ ኡሻ ያርሾ ቦላ ጉጅድካ ያርሽተ።

17 “ናምአንꬆ ጋላሳን ታማነ ናምኡ ቦረይ ባይና ዎፋኖታ፥ ናምኡ ማራዘታነ እስ ላይꬅ ኩምዳ ታማነ ኦይዱ ኡርገታ ያርሽተ። 18 ዎፋኖታራ፥ ማራዘታራነ ዶርሳ ኡርገታራ ካꬃ ያርሹዋነ ኡሻ ያርሹዋ ዎጋይ ኪተይሳ መላ ኤንታ ታይቡዋዳ ያርሽተ። 19 ጋላስ ጋላስ ያርሸትያ ፁሳ ያርሹዋ ቦላ፥ ካꬃ ያርሹዋ ቦላነ ኡሻ ያርሹዋ ቦላ ጉጅድ ናጋራ ያርሹዋስ እስ ኮለ ያርሽተ።

20 “ሄꬓንꬆ ጋላሳን ቦረይ ባይና ታማነ እስ ዎፋኖታ፥ ናምኡ ማራዘታ እስ ላይꬅ ኩምዳ ታማነ ኦይዱ ዶርሳ ኡርገታ ያርሽተ። 21 ዎፋኖታራ፥ ማራዘታራነ ዶርሳ ኡርገታራ ካꬃ ያርሹዋነ ኡሻ ያርሹዋ ዎጋይ ኪተይሳ መላ ኤንታ ታይቡዋዳ ያርሽተ። 22 ጋላስ ጋላስ ያርሸትያ ፁሳ ያርሹዋ ቦላ፥ ካꬃ ያርሹዋ ቦላነ ኡሻ ያርሹዋ ቦላ ናጋራ ያርሾስ እስ ኮለ ጉጅድ ያርሽተ።

23 “ኦይዳንꬆ ጋላሳን ቦረይ ባይና ታሙ ዎፋኖታ፥ ናምኡ ማራዘታነ እስ ላይꬅ ኩምዳ ታማነ ኦይዱ ዶርሳ ኡርገታ ያርሽተ። 24 ዎፋኖታራ፥ ማራዘታራነ ዶርሳ ኡርገታራ ካꬃ ያርሹዋነ ኡሻ ያርሹዋ ዎጋይ ኪተይሳ መላ ኤንታ ታይቡዋዳ ያርሽተ። 25 ጋላስ ጋላስ ያርሸትያ ፁሳ ያርሹዋ ቦላ፥ ካꬃ ያርሹዋ ቦላነ ኡሻ ያርሹዋ ቦላ ጉጅድ ናጋራ ያርሾስ እስ ኮለ ያርሽተ።

26 “እቻሻንꬆ ጋላሳን ቦረይ ባይና ኡዱፉን ዎፋኖታ፥ ናምኡ ማራዘታነ እስ ላይꬅ ኩምዳ ታማነ ኦይዱ ዶርሳ ኡርገታ ያርሽተ። 27 ዎፋኖታራ፥ ማራዘታራነ ዶርሳ ኡርገታራ ካꬃ ያርሹዋነ ኡሻ ያርሹዋ ዎጋይ ኪተይሳዳ ኤንታ ታይቡዋዳ ያርሽተ። 28 ጋላስ ጋላስ ያርሸትያ ፁሳ ያርሹዋ ቦላ፥ ካꬃ ያርሹዋ ቦላነ ኡሻ ያርሹዋ ቦላ ጉጅድ ናጋራ ያርሾስ እስ ኮለ ያርሽተ።

29 “ኡሱፑንꬆ ጋላሳን ቦረይ ባይና ሆስፑን ዎፋኖታ፥ ናምኡ ማራዘታነ እስ ላይꬅ ኩምዳ ታማነ ኦይዱ ዶርሳ ኡርገታ ያርሽተ። 30 ዎፋኖታራ፥ ማራዘታራነ ዶርሳ ኡርገታራ ካꬃ ያርሹዋነ ኡሻ ያርሹዋ ዎጋይ ኪተይሳ መላ ኤንታ ታይቡዋዳ ያርሽተ። 31 ጋላስ ጋላስ ያርሸትያ ፁሳ ያርሹዋ ቦላ፥ ካꬃ ያርሹዋ ቦላነ ኡሻ ያርሹዋ ቦላ ጉጅድ ናጋራ ያርሾስ እስ ኮለ ያርሽተ።

32 “ላፑንꬃ ጋላሳን ላፑን ዎፋኖታ፥ ናምኡ ማራዘታነ እስ ላይꬅ ኩምዳ ታማነ ኦይዱ ዶርሳ ኡርገታ ያርሽተ። 33 ዎፋኖታራ፥ ማራዘታራነ ዶርሳ ኡርገታራ ካꬃ ያርሹዋነ ኡሻ ያርሹዋ ዎጋይ ኪተይሳ መላ ኤንታ ታይቡዋዳ ያርሽተ። 34 ጋላስ ጋላስ ያርሸትያ ፁሳ ያርሹዋ ቦላ፥ ካꬃ ያርሹዋ ቦላነ ኡሻ ያርሹዋ ቦላ ጉጅድ ናጋራ ያርሾስ እስ ኮለ ያርሽተ።

35 “ሆስፑንꬃ ጋላሳን ጎይናናዉ ሺቅተ፤ አይ ኦሶካ ኦꬆፍተ። 36 ቦረይ ባይና እስ ዎፋኖ፥ እስ ማራዘ፥ እስ ላይꬅ ኩምዳ ላፑን ዶርሳ ኡርገታ ሳውያ ፁሳ ያርሾ ኦꬅድ ጎዳስ ያርሽተ። 37 ዎፋኖታራ፥ ማራዘታራነ ዶርሳ ኡርገታራ ካꬃ ያርሹዋነ ኡሻ ያርሹዋ ዎጋይ ኪተይሳዳ ኤንታ ታይቡዋዳ ያርሽተ። 38 ጋላስ ጋላስ ያርሸትያ ፁሳ ያርሹዋ ቦላ፥ ካꬃ ያርሹዋ ቦላነ ኡሻ ያርሹዋ ቦላ ጉጅድ ናጋራ ያርሾስ እስ ኮለ ያርሽተ።

39 “ህንተ ጋሶ ያርሹዋ ቦላነ ህንተ ዶሳ ያርሹዋ ቦላ ፁሳ ያርሾ፥ ካꬃ ያርሾ፥ ኡሻ ያርሾነ እስፈተꬃ ያርሾ ባልያ ቦንቻናዉ ኪተትዳ ዎድያን ያርሽተ” ያግስ።

40 ሙሰይ፥ ጎዳይ ባና ኪትዳይሳ ኡባ እስራኤለ አሳስ ኦድስ።