1 ሙሰይ እስራኤለ ዘረꬃ ሀላቃታኮ፥ “ጎዳ ኪታይ ሀይሳ፤ 2 እስ አስ ጎዳስ እስባ ኦꬃናዉ ጫቅኮ ዎይኮ እስባፐ ባና ናጋናዉ ቃንግኮ ጉየ ጎና ፖሎ።

3 “ባ አዋ ሶን ደእያ ጌላእያ ጎዳስ እስባ ኦꬃናዉ ጫቅኮ ዎይኮ እስባፐ ባና ናጋናዉ ቃንግኮ፥ 4 እ አዋይ እያ ጫቅዳይሳ ዎይኮ እያ ቃንገትዳይሳ ስእድ፥ እዮ ድጎና እፅኮ፥ እያ ፖላናዉ ኮሼስ። 5 ሽን እ አዋይ ሄሳ ስእድ እዮ ድግኮ እ ጫቆይነ እ ቃንገꬃይ አታናዉ ዳንዳኤስ። እ አዋይ እዮ ድግዳ ግሾ ጎዳይ እዉ አቶ ጋና።

6 “ገሎና ማጫ ናእያ ጫቃዳ ደአሸ ዎይኮ እስባፐ ባና ናጋናዉ ቃንገታዳ ደአሸ አዝና ገልኮ፥ 7 እ አዝናይ ሄሳ ስእድ እዮ ድጎና እፅኮ እያ ባ ጫቁዋነ ባ ቃንገꬃ ፖላናዉ ኮሼስ። 8 ሽን እ አዝናይ ሄሳ ስእድ እዮ ድግኮ እያ ጫቅዳ ጫቆይ ዎይኮ ቃንገትዳ ቃንገꬃይ እዮ ጎመና። ሄሳ ጎዳይ እዉ አቶ ጋና።

9 “ሽን አምእያ ዎይኮ ሳዮ ማጫስ ጫቅዳ ጫቁዋ ዎይኮ ቃንግዳ ቃንገꬃ ፖላናዉ በሴስ።

10 “አዝናራ ደእያ ማጫስ ጫቅኮ ዎይኮ እስባ ኦꬃናዉ ቃንግኮ፥ 11 እ አዝናይ ሄሳ ስእድ እዮ ድጎና እፅኮ፥ እያ ጫቅዳ ጫቁዋነ ቃንገትዳ ቃንገꬃ ፖሎ። 12 እ አዝናይ ሄሳ ስእዳ ጋላስ እዮ ድግኮ እ ጫቆይ ዎይኮ እያ ኦꬃናዉ ቃንገትዳ ቃንገꬃይ እዮ ጎመና። እ አዝናይ ድግዳ ግሾ ጎዳይ እዉ አቶ ጋና። 13 እ አዝናይ እያ ጫቅዳ ጫቁዋ ዎይኮ እያ ባና ካዉሻናዉ ቃንገትዳ ቃንገꬃ ላላናዉ ዎይኮ ምንꬃናዉ ዳንዳኤስ። 14 ሽን እ አዝናይ ሄ ጋላስ ዎይኮ ዎንተꬃ ጋላስ አይኮካ ጎና እፅኮ፥ እ ጫቁዋ ዎይኮ እ ቃንገꬃ ምንꬅስ ጉሱ። እ ሄሳ ስእድ፥ ስእ ጊኮ እ ቆፋ ማእስ ጉሱ። 15 ሽን እ ሄሳ ስእ ጋምእድ ዛር ድግያባ ግድኮ ሄሳስ ኦይሸተይ እያ” ያግስ።

16 ህዛ ሀይስ አዝና ግዶንነ ማች ግዶን፥ ባ አዋራ ሶን ደእያ ጌላኦ ግዶንነ እ አዋ ግዶን ደእያ ጋሄተꬃባ ጎዳይ ሙሰስ እምዳ ዎጋ።