1 ሮቤላነ ጋደ ኮቻስ ዳሮ መሄይ ደኤስ። ኤንቲ ያእዜራ ቢታይነ ጋላዳ ቢታይ መሄስ እንጀ ግደይሳ፥ 2 በእድ ሙሰኮ፥ ካህንያ አላዛራኮነ እስራኤለ ማባራ ሀላቃታኮ ይድ ሀይሳዳ ያግዶሶና። 3-4 “እስራኤለ አሳይ ላታና መላ ጎዳይ ማድዳ ቢታይ፥ አፃሮተይ፥ ድቦን፥ ያእዜር፥ ንምር፥ ሀሰቦን፥ ኤልያል፥ ሰባም፥ ናቦይነ ባኦን መሄስ እንጀ ቢታ፤ ኑስ ህንተ አይለታስ ዳሮ መሄይ ደኤስ። 5 ኑኒ ህንተ ስንꬃን ሳባ ደምዳባ ግድኮ፥ ሄ ቢታ ኑስ ህንተ አይለታ ላታ ኦꬅድ እምተ፤ ኑና ዮርዳኖሰ ሻፋፐ ሄፍንꬅ ፕንꬆፍተ” ያግዶሶና።

6 ሙሰይ ጋደ ኮቻታኮነ ሮቤላ ኮቻታኮ፥ “ህንተ ባጋ ግድዳ እስራኤለ አሳይ ኦላስ ብያ ዎደ ህንተ ሀይሳን ኡታናዉ ኮዬቲ? 7 ጎዳይ ኤንታዉ እምዳ ቢታ ኤንቲ ፕኖና መላ ህንተ አይስ ኤንታ ዎዛና ሹግሴቲ? 8 ቃደሳ ባርነፈ ሀ ቢታ ዎቻና መላ ህንተ አዋታ ታ የድዳ ዎደ ኤንትካ ሀይሳዳ ኦꬅዶሶና። 9 ኤንቲ ኤሽኮላ ዛንጋራ ጋካናዉ ብድ ሄ ቢታ በእ ስሚድ እስራኤለት ጎዳይ ኤንታዉ እምዳ ቢታ ገሎና መላ እስራኤለታ ዎዛና ሹግስዶሶና። 10 ጎዳይ ሄ ጋላስ ዳሮ ሀንቀትድ ሀይሳዳ ያግድ ጫቅስ፤ 11 ‘ባንታ ኩመꬃ ዎዛናፐ ታና ካልቦና ግሾ፥ ግብፀ ቢታፈ ከይዳይሳታፐ ላይꬅ ላታማነ እያፐ ቦላ ግድዳ አደ አሳፐ እሶይካ አብራሃመስ፥ ይሳቃስነ ያይቆባስ እማና ጋዳ ጫቅዳ ቢታ ገለኮና። 12 ባንታ ኩመꬃ ዎዛናፐ ካልዳ ግሾ፥ ቀነዛ ዮፎና ናኣ ካለባፐነ ናወ ናኣ እያሱፐ አትሽን፥ ሀር ኦንካ ገለና’ ያግስ። 13 ጎዳ ሀንቆይ እስራኤለ አሳ ቦላ ኤፅዳ ግሾ ጎዳ ስንꬃን ኢታ ኦꬅዳ ሄ የለተꬃ ኡባይ ꬋያና ጋካናዉ መላ ቢታን ኦይታሙ ላይꬅ ቶይላትዶሶና። 14 ህንተኖ፥ ናጋራንቾታ ናይቶ ህንተ አዋታ በሳን ኤቅድ ጎዳይ እስራኤለ አሳ ቦላ ጉጅድ ሀንቀታና መላ ኦꬄታ። 15 ህንተ ጎዳ ካሎና እፅኮ፥ እ ቃስካ ባ ደርያ መላ ቢታን አጋና። ኤንታና ጋክያ ꬋዩዋስ ህንተ ኦይሸታና” ያግስ።

16 ኤንቲ ሙሰኮ ሺቅድ፥ “ኑኒ ሀይሳን ኑ መህያስ ዳራ፥ ኑ ናይታስነ ኑ ማቸታስ ካታማ ኬፃናዉ ኮዮስ። 17 ሽን እስራኤለ አሳይ ባንታ በሳ ኤካና ጋካናዉ ኑኒ ኦላ ሚሸ ዳንጭድ ኤንታ ስንꬃን ከይድ ኦለታናዉ ጊገትዳ። ሄ ዎደ ሄ ቢታን ደእያ አሳይ ኑ ናይታነ ኑ ማቸታ ቆሆና መላ ግምበትድ ኡትዳ ካታማታን ደኦና። 18 እስራኤለ አሳ ኡባይ ባንታ ላታ ላታ ኤካና ጋካናዉ፥ ኑኒ ኑ ሶ ስሞኮ። 19 ኑኒ ኑ ላታ ዮርዳኖሰ ሻፋፐ ሀፍንꬃን ዶሎሀ ባጋን ላትዳ ግሾ፥ ዮርዳኖሰፐ ሄፍንꬃን ዉሎሀ ባጋን ኤንታራ ላታ ኤኮኮ” ያግዶሶና።

20 ሙሰይ ኤንታኮ፥ “ህንተ ገይስ ቱማ ግድኮ ሀይሳን ጎዳ ስንꬃን ኦላ ባናዉ ዳንጨትተ። 21 ጎዳይ ባ ሞርከታ ባ ስንꬃፈ ጎዳና ጋካናዉ ህንተ ኦላ ሚሽያ ዳንጭድ፥ ዮርዳኖሰ ሻፋ ጎዳ ስንꬃን ፕንኮ፥ 22 ሄ ቢታ ጎዳይ ፆንዳፐ ጉየ ህንተ ስማናዉ ዳንዳኤታ። ሄ ዎደ ህንተ ጎዳስነ እስራኤለ አሳስ ኦለትድ ፖልደታ ጉሱ። ቃስ ሄ ቢታይ ጎዳ ስንꬃን ህንተዉ ላታ ግዳና።

23 “ህንተ ሄሳ ኦꬆና እፅኮ ጎዳ ቦላ ናጋራ ኦꬄታ፤ ህዛ፥ ህንተ ናጋራ ግሾ ህንተና ሴር ጋካናይሳ ሎይꬅ ኤርተ። 24 ህንተ ህንተዉ ካታማታ፥ ህንተ መህያስ ዳራ ኬፅተ፥ ሽን ህንተ ገልዳ ቃላ ፖልተ” ያግስ።

25 ጋደ ኮቻይነ ሮቤላ፥ ኮቻይ ሙሰኮ፥ “ኑኒ ነ አይለት ነ ኪትዳይሳዳ ኦꬃና። 26 ኑ ናይት፥ ኑ ማቸት፥ ኑ ዶርሳትነ ኑ መሄይ ሀይሳን ጋላዳ ካታማታን ደእሾና። 27 ሽን ኑኒ ነ አይለት፥ ኦላንቾት ኡባይ፥ ኔኒ ኑ ጎዳይ ግዳይሳዳ ኦለታናዉ ጎዳ ስንꬃን ዮርዳኖሰ ሻፋ ፕናና” ያግዶሶና።

28 ሄሳ ግሾ፥ ሙሰይ ካህንያ አላዛራ፥ ናወ ናአ እያሱነ እስራኤለ ኮቻታ ሀላቃታ ኤንታባ ያግድ ኪትስ። 29 “ጋደ ኮቻይነ ሮቤላ ኮቻይ ኡባይ ኦላ ሚሽያ ዳንጭድ፥ ጎዳ ስንꬃን ህንተራ ዮርዳኖሰ ሻፋ ፕንኮነ ህንተ ሄ ቢታ ፆንኮ፥ ሄሳፈ ጉየ፥ ጋላዳ ቢታ ህንተ ኤንታ ላትስተ። 30 ሽን ኤንቲ ኦላ ሚሽያ ዳንጭድ፥ ህንተራ ፕንድ ኦላስ ቦና እፅኮ፥ ህንተዳ ኤንታዉ ካናነ ቢታን ላት እመቶ” ያግስ።

31 ያትን። ጋደ ኮቻይነ ሮቤላ ኮቻይ ዛሪድ፥ “ኑኒ ነ አይለት ጎዳይ ግዳይሳ ኦꬃና። 32 ኑኒ ኦላ ሚሽያ ዳንጭድ፥ ጎዳ ስንꬃን ካናነ ቢታ ገላናዉ ፕናና፤ ሽን ኑኒ ላትያ ላታይ ዮርዳኖሰፐ ሀፍንꬃ ባጋ ግዶ” ያግዶሶና።

33 ሄሳ ግሾ፥ ሙሰይ ጋደ ኮቻስ፥ ሮቤላ ኮቻስነ ዮሰፋ ናኣ ምናሰ ኮቻፈ ባጋስ አሞረ ካዋ ስሆና ካዎተꬃነ ባሳነ ካዋ ኦገ ካዎተꬃ ኤንታ ዩሹዋን ደእያ ካታማታራ እሚስ። 34 ጋደ ኮቻይ ድቦና፥ አፃሮታ፥ አሮኤራ 35 አፅሮት-ሻፋና፥ ያእዜራ፥ ዮግባ፥ 36 ቤት-ንምራነ ቤት-ሀራና ጌተትያ ግምበን ድረትዳ ካታማታ ዛሪድ ኬፅዶሶና፤ ባንታ መህያስ ዳራ ኬፅዶሶና።

37 ሮቤላ፥ ኮቻይ ሀሰቦና፥ ኤልኣላ፥ ቅራታይማ፥ 38 ናባ፥ ባኣል-ማኦናነ ሰባማ ጌተትያ ካታማታ ዛረꬅ ኬፅዶሶና፤ ሄ ካታማታ ሱንꬃ ላምዶሶና።

39 ምናሰ ናኣ ማክራ ኮቻት ጋላዳ ቢታ ኦል ኦይክድ ያን ደእያ አሞረታ ጎድዶሶና። 40 ሄሳ ግሾ፥ ምናሰ ናኣ ማክራ ኮቻስ ሙሰይ ጋላዳ ቢታ እምን ኤንቲ ያን ደእዶሶና። 41 ምናሰ ኮች ግድዳ ያእር ሄ ካታማታ ኦል ኦይክድ፥ “ያእራ ካታማታ” ያግድ ሱንꬅስ። 42 ኖባ ቃናታ ካታማነ እያ ዩሹዋን ደእያ ጉታታ ኦላን ኦይክደ፥ ባ ሱንꬃን “ኖባ” ግድ ሱንꬅስ።