1 ሙሰይነ አሮን ካለꬅን፥ እስራኤለ አሳይ፥ ባንታ ጩጋን ጩጋን ግብፀፈ ከይድ ሲራትዳ ጉታታ ኦድያ ታርከይ ሀይሳ። 2 ጎዳይ ኪትዳይሳ መላ ሙሰይ ኤንቲ ሲራትዳ በሳታ ሱንꬃ ኡባ ካል ካል ፃፍስ።

3 እስራኤለ አሳይ ኮይሮ አጌናን፥ ታማነ እቻሻንꬆ ጋላሳን፥ ፓስካ ቦንችያ ናምአንꬆ ጋላስ ደንድድ፥ ግብፀ አሳ ኡባይ በእሽን፥ ያዮና ራምሰፐ ከይዶሶና። 4 ሄ ዎደ ግብፀ አሳይ ጎዳ ጋዶን ሀይቅዳ ባንታ ባይራ ናይታ ሞጎሶና። ሄሳዳ ኦꬅድ፥ ጎዳይ ኤንታ ፆሳታ ቦላ ፕርዳ ኤህስ።

5 እስራኤለ አሳይ ራምሰፐ ደንድድ ሱኮታ ጌተትያ በሳን ዱንካንዶሶና።

6 ሱኮታፐ ደንድድ መላ ቢታ ጋፃን ደእያ ኤታማን ዱንካንዶሶና።

7 ኤታማፐ ደንድድ ባአል-ፃፎናፐ ዶሎሀ ባጋን ደእያ ፕሀህሮታ ስሚድ ምግዶላ ማታን ዱንካንዶሶና።

8 ፕሀህሮታፐ ደንድድ፥ ዞኦ አባ ፕንድ፥ ሱዛ መላ ቢታ ብዶሶና። ኤታማ መላ ቢታን ሄꬑ ጋላስ ሄመትድ ማራን ዱንካንዶሶና።

9 ማራፐ ደንድድ ታማነ ናምኡ ፑልቶትነ ላፑን ታሙ ዛምባት ደእያ ኤልማን ዱንካንዶሶና።

10 ኤልማፐ ደንድድ ዞኦ አባ ማታን ዱንካንዶሶና።

11 ዞኦ አባ ማታፐ ደንድድ ሲና መላ ቢታን ዱንካንዶሶና።

12 ሲና መላ ቢታፈ ደንድድ ራፋቃን ዱንካንዶሶና።

13 ራፋቃፐ ደንድድ ኤሉሳን ዱንካንዶሶና።

14 ኤሉሳፐ ደንድድ ሃꬅ ባይና በሳን ራፍድማን ዱንካንዶሶና።

15 ራፍድማፐ ደንድድ ሲና መላ ቢታን ዱንካንዶሶና።

16 ሲና መላ ቢታፈ ደንድድ ክብሮት ሀትአዋን *ክብሮት ሀትአዋን፦ አሞ ዱፎ ጌተትያ በሲ ዱንካንዶሶና።

17 ክብሮት ሀትአዋፐ ደንድድ ሀፀሮታን ዱንካንዶሶና።

18 ሀፀሮታፐ ደንድድ እርትማን ዱንካንዶሶና።

19 እርትማፐ ደንድድ እርሞን-ፓሬዛን ዱንካንዶሶና።

20 እርሞን-ፓሬዛፐ ደንድድ ልብናን ዱንካንዶሶና።

21 ልብናፐ ደንድድ እርሳን ዱንካንዶሶና።

22 እርሳፐ ደንድድ ቃሄላታን ዱንካንዶሶና።

23 ቃሄላታፐ ደንድድ ሸፋራ ዙማን ዱንካንዶሶና።

24 ሸፋራ ዙማፐ ደንድድ ሀራዳን ዱንካንዶሶና።

25 ሀራዳፐ ደንድድ ማቅሄሎታን ዱንካንዶሶና።

26 ማቅሄሎታፐ ደንድድ ታሀታን ዱንካንዶሶና።

27 ታሀታፐ ደንድድ ታራን ዱንካንዶሶና።

28 ታራፐ ደንድድ ምትቃን ዱንካንዶሶና።

29 ምትቃፐ ደንድድ ሀሽሞናን ዱንካንዶሶና።

30 ሀሽሞናፐ ደንድድ ሞሰሮታን ዱንካንዶሶና።

31 ሞሰሮታፐ ደንድድ በን-ያእቃናን ዱንካንዶሶና።

32 በን-ያእቃናፐ ደንድድ ሆር-ሀግድጋዳን ዱንካንዶሶና።

33 ሆር-ሀግድጋዳፐ ደንድድ ዮፅባታን ዱንካንዶሶና።

34 ዮፅባታፐ ደንድድ አብሮናን ዱንካንዶሶና።

35 አብሮናፐ ደንድድ ኤፅዮን-ጋብራን ዱንካንዶሶና።

36 ኤፅዮን-ጋብራፐ ደንድድ ሲና መላ ቢታን ቃደሳን ዱንካንዶሶና።

37 ቃደሳፐ ደንድድ ኤዶመ ቢታ ዛዋን ደእያ ሆራ ዙማን ዱንካንዶሶና። 38 ካህነይ አሮን ጎዳ ኪታን ሆራ ዙማ ቦላ ከይድ፥ እስራኤለ አሳይ ግብፀ ቢታፈ ከይዳ ኦይታማንꬆ ላይꬃን፥ እቻሻንꬆ አጌናን፥ ኮይሮ ጋላሳን ያን ሀይቅስ። 39 አሮን ሆራ ዙማ ቦላ ሀይቅያ ዎደ እያዉ ላይꬅ ፄታነ ላታማነ ሄꬓ።

40 ነገበ መላ ቢታን ካናነን ደእያ አራዳ ካዎይ እስራኤለ አሳ ዩሳ ስእስ።

41 እስራኤለ አሳይ ሆራ ዙማፐ ደንድድ ፃልሞናን ዱንካንዶሶና።

42 ፃልሞናፐ ደንድድ ፑኖናን ዱንካንዶሶና።

43 ፑኖናፐ ደንድድ ኦቦታን ዱንካንዶሶና።

44 ኦቦታፐ ደንድድ ሞአበ ቢታ ዛዋን ደእያ አባሪማን ዱንካንዶሶና።

45 አባሪማፐ ደንድድ ድቦን-ጋዳን ዱንካንዶሶና።

46 ድቦን-ጋዳፐ ደንድድ አልሞን-ድብላታይማን ዱንካንዶሶና።

47 አልሞን-ድብላታይማፐ ደንድድ ናቦ ዙማ ስንꬃን አባሪማ ዙማታ ቦላ ዱንካንዶሶና።

48 አባሪማ ዙማታፐ ደንድድ እያርኮፈ ሄፍንꬃን፥ ዮርዳኖሰ ሻፋ ማታን ደእያ ሞአበ ደንባን ዱንካንዶሶና። 49 ዮርዳኖሰ ሻፋ ማታን ደእያ ሞአበ ደንባን፥ ቤት-ያሽሞታፐነ አቤል-ሳፅማ ዛንጋራፐ ግዶን ዱንካንዶሶና።

50 እያርኮፈ ሄፍንꬃን፥ ዮርዳኖሰ ሻፋ ማታን ደእያ ሞአበ ደምባን ጎዳይ ሙሰኮ፥ 51 “እስራኤለ አሳስ ያጋዳ ኦዳ፤ ዮርዳኖሰ ሻፋ ፕንድ፥ ካናነ ቢታ ህንተ ገልያ ዎደ 52 ሄ ቢታን ደእያ አሳ ኡባ ህንተ ስንꬃፈ የደꬅተ። ሹቻፈ ማሰትድ ኦሰትዳ ምስለታነ ሼሽድ መꬍዳ ኤቃታ ꬋይስተ። ꬎቃ ጎይኖ በሳታ ኡባ ላልተ። 53 ሄ ቢታ ታ ህንተዉ እምዳ ግሾ እያ ላትድ ያን ደእተ። 54 ህንተ ኮቻን ኮቻን ሳማ ከስድ ቢታ ሻከትተ። ታይቦን ዳርያ ኮቻታስ ዳልጋ ላታ እምተ፤ ታይቦን ጉፅያ ኮቻታስ ጉꬃ ላታ እምተ። ሳማን ኤንታ ጋክዳ ቢታይ ኤንታባ ግዳና። ቢታ ህንተ ማይዛታ ኮቻን ኮቻን ሻክድ ኤክተ። 55 ሽን ሄ ቢታን ደእያ አሳ ህንተ የደꬆና እፅኮ፥ ህንተ አሽዳይሳት ህንተ አይፍያስ ፕንጮ፥ ህንተ ምይያስ አጉንꬁ ግዳና፤ ህንተ ዳና ቢታን ኡባ ዎደ ኦላ ደንꬅድ ህንተና ዋይሳና። 56 ህንተ ኤንታ የደꬆና እፅኮ፥ ታ ኤንታ ቦላ ኦꬃናዉ ሀልችዳባ ህንተ ቦላ ኦꬃና ጋዳ ኦዳ” ያግስ።