6
ኤያተꬃፈ ሃካ
1 ታ ናአዉ፥ ሚሸ ታልእዳ ነ ሾሩዋስ ዋሰ ገልዳባ ግድኮ፥
ሀራ አሳስ ኩሸ ባቃዳ ጫቅዳባ ግድኮ፥
2 ነ ጫቅዳ ነ ጫቁዋን ፅሄን ገልዳባ ግድኮ፥
ነ ዶናፐ ከይዳ ቃላን ኦይከትዳባ ግድኮ፥
3 ህዛ ነ ሾሩዋ ኩሸን ገላዳሳ።
ሄሳ ግሾ፥ ታ ናአዉ፥ እያፐ ከያናዉ ኮይኮ፥
ነ ሾሩዋ ሶ ባዳ ዋሰተꬃ
ነ ቦላፈ ዎꬃና መላ አዳሻዳ እያ ዎሳ።
4 ሄሳ ኦꬆና ደአሸ ዝንኦፋ፤
ꬍስኮይካ ነና ኤኮፎ።
5 ሻንካፈ ገንኤይ ከስ ኤክያዳ፥
ግተፐ ካፎይ አትያዳ ነና አሻ።
6 ነኖ አዛላዉ፥ ዝማዶኮ ባ፤
እያፐ ጭንጫተꬅ ታማራ።
7 ዝማዶታ ኪተይ ባዋ፥
ሀላቅ ዎይኮ ኤንታ ሃረይ ባዋ።
8 ሽን ባንታዉ ማናባ ቦነ ምንጆሶና፤
ካꬅ ጫክያ ዎደ ባንታዉ ኮሽያ ካꬃ ሺሾሶና።
9 ነኖ አዛላዉ፥ ነ አዉደ ጋካናዉ ꬍስካይ?
ነ ꬍስኮፈ አዉደ ባርካኔ?
10 ኔኒ “ጉꬁ ዝንአና፤ ጉꬁ ꬍስካና፤
ኩሸ ሺሻ ኤካዳ ጉꬁ ሸምፓና” ያጋሳ።
11 ሄ ዎደ ማንቆተꬅ ፓንጋዳ፥
ፓጭ ኦላ ሚሸ ኦይክዳ አሳዳ ነ ቦላ ያና።
12 ላፋነ ኢታ አስ ዩይድ ኦዳ ምርቄስ፤
13 እ ባ አይፈን ቃምኦቴስ፤
ባ ቶሆን በሴስ፤ ባ ብራን ማሌስ።
14 እያ ኡሎን ጌላተꬅ ደኤስ፤ ኢታባ ቆፔስ፤
ኡባ ዎደ ኦሹ መꬌስ።
15 ሄሳ ግሾ ꬋዮይ አኬኮና እያ ቦላ ያና፤
እ ሀሳዮና መቃና፤ ዛሪድ ፓፀና።
16 ጎዳይ እፅያ ኡሱፑን ቆሞት ደኦሶና፤
እ ሻተትያ ቆሞት ላፑና፤
17 ካꬍድ ፄልያ አይፈ፥
ዎርዶትያ እንፃርስ፥
ፅሎ አሳታ ዎꬍያ ኩሸ፥
18 ኢታባ ማቅያ ዎዛና፥
ኢታባኮ ዎፃናዉ ኤሶትያ ቶሆ፥
19 ዎርዶ ቦላ ዎርዶ ጉጅያ ዎርዶ ማርካ፥
እሻታ ግዶን ኦሽ መꬍያ አስ።
ላይማተꬃፈ ናገታ
20 ታ ናአዉ፥ ነ አዋ ኪታ ፖላ፤
ነ አየ ትምርትያ አጎፋ።
21 ኤንታ ኡባ ዎደ ነ ዎዛናን ኦይካ፤
ነ ቆꬍያን ቃቻ።
22 ነ ሄመትያ ዎደ ኤንቲ ነና ካለꬃና፤
ነ ዝንእያ ዎደ፥ ኤንቲ ነና ናጋና፤
ነ ባርክያ ዎደ ኤንቲ ነና ዞራና።
23 ጎዳ ኪታይ ፆምፐ፤ እያ ትምርተይ ፖኦ፤
እያ ሴራይ ደኦኮ ኤፍያ ኦገ።
24 ሀ ትምርተት ኢታ ማጫፈነ
ሀራ ጭምያ ማጫሳ እንፃርሳፈ ነና ናጋና።
25 እ ማላ ሎኦተꬃይ ነና ቃꬆፎ፤
እ ቃምኦቶይ ነና ድኦፎ።
26 እስ አደይ ጉꬃ ሚሸን ላይማ ማጫስ ደማናዉ ዳንዳኤስ፤
ሽን ሀራ አሳ ማቾ ላገꬆይ ሸምፖ ኤኬስ።
27 ታማ እድምን
እያ ማኦይ ሜተቶና አተይ ደኢ?
28 ታማ ቦንቆ የꬍን፥
እያ ቶሆይ ፁገቶና አተይ ደኢ?
29 አሳ ማቾ ላገꬅያ ኡራይ ሄሳ መላ፤
እዮ ቦችያ ኡባይ ሴረቶና አተና።
30 ካይሶይ ኮሻትድ ማናዉ ካይስኮ፥
አስ እያ ቦረና።
31 ሽን እ ኦይከትያባ ግድኮ፥
ላፑን ኩሸ ቃንፃና፤
ባ ሶን ደእያ ሚሸ ኡባ እማና።
32 ሽን ማጫሳራ ላይማትያ አስ ዎዛን ባይና አስ፤
ሄ ኡራይ ባ ሸምፑዋ ꬋይሴስ።
33 ደሸꬅነ ካዉሽ እያ ቃዳ፤
ዬል እያፐ ቁሸተና።
34 ቃናተይ አዝናስ ይሎ ደንꬄስ፤
ሀሎ ከስያ ዎደ እዉ ቃተና።
35 እ አይ አጫካ ኤከና፤
አይ መላ እሞትካ እያ ሀንቁዋ ዶሽሰና።