አኬክ ባ ቃላ ꬎቁ ኦꬅዳ ስሳዉሱ።

ዳጋላ ኦግያን እያ ኤቃዉሱ።

ባ ቃላ ꬎቁ ኦꬃዳ ሀይሳዳ ያጋዉሱ።

አሳ ኮቸ ኡባ ፄጋይስ።

ህንተኖ ኤያቶ፥ አኬካ ደምተ።

ታ ዶናፐ ሱረባይ ከዬስ።

ዎርዶይ ታ ማታን እፀትዳባ።

ጌላ ዎይኮ ምርቀꬅ ግደና።

ኤር ደእያ ኡራስ ታ ኦዳይ ቆንጨ።

ጌሻ ዎርቃፈ አꬅድ ኤራተꬅ ዶርተ።

ነ አሞትያ ኡባይ ኢራ ልከተና።

ኤራተꬅነ ሻክድ ኤሮይ ታባ።

ታኒ ኦቶሮነ ጬቀተꬅ እፃይስ፤

ኢታ ኦገነ ዎርዶ ኦዳ ዶስከ።

አኬክነ ዎልቅ ታዉ ደኤስ።

ሃረይሳት ሱረ ህገ ታ ባጋራ ከሶሶና።

ቢታ አይስያ ግታ አሳታ ታ ማዳይስ።

ታና ምንꬅድ ኮየይሳት ደማና።

ዉሮና ሻሎይነ እንጀይ ታ ማታና።

ጌሻ ዎርቃፈነ ብራፐ አꬌስ።

ሱረ ፕርዳ ኦግያራ ካንꬃይስ።

ኤንታ ኬꬃ ዱረተꬃን ኩንꬃና።

በንፐካ እያ ኦሱዋስ ዶመꬃይ ታና።

ታኒ ሹመታስ።

ደእሽን ታ የለታስ።

ስን ታ የለታስ። 26 ጎዳይ ሳኣነ ሳአን ደእያ ኡባ መꬋናፐ ስን

ዎይኮ ኮይሮ ኮጰ ቢታይ ኦሰታናፐ ስን ታ የለታስ።

አባታፐ ቦላራ ሳሎ ጉፋንꬆ ጊግስዳ ዎደ፥

ታኒ ያን ደአይስ።

አባ ፑልቶታ ꬉስዳ ዎደ፥

29 አባ ሃꬃት እመትዳ ዛዋፐ ፕንድ፥ ቦላ አꬎናዳ፥

እ ኤንታ ኪትዳ ዎደ ሳኣ ባሱዋ ምንꬅዳ ዎደ፥

ታኒ ያን ደአይስ።

ኡባ ዎደ ታ እያ ኡፋይሳይስ፤

ታዉካ እያ ስንꬃን ኡፋይታይስ።

አሳ ናይትካ ታና ኡፋይሶሶና።

ታ ኦደይሳዳ ኦይሳት አንጀትዳይሳታ።

ስእዳባ ዶጎፕተ።

ጋላስ ጋላስ ታ ፐንግያን በንትያ ኡራይ፥

ታ ፐንግያን ናግያ ኡራይ አንጀትዳይሳ።

ጎዳፐ ሳባ ኤኬስ።

ታና እፅያ ኡባይ ሀይቆ ዶሴስ።”