6 ሱረታ ኤንታ ፅሎተꬃይ አሼስ፤ ሽን አማነቶናይሳታ ኤንታ አሞይ ፅሄ ግድድ ኦይካና።

7 ኢታ አስ ሀይቅያ ዎደ፥ እ ናግያ ኡፋይሳይ እያራ እስፈ ሀይቄስ፤ እ ባ ዎልቃን ጬቀትያባይ ኡባይካ ꬋዬስ።

8 ፅሎይ መቶፐ አቴስ፤ እያ ግሾ ኢታ ቦላ መቶይ ዬስ።

9 ፆሳ ካድዳ አስ ባ ዶናን አሳ ꬋይስስ፤ ሽን ፅሎት ኤራን ከስ ኤኮሶና።

10 ፅሎት ቦንቸትያ ዎደ፥ ካታማይ ኡፋይቴስ፤ ቃስ ኢታት ሀይቅያ ዎደ፥ ሀሹ ጌስ።

11 ፅሎታ አንጁዋ ጋሶን ካታማይ ድጬስ፤ ሽን ኢታ ኡራ ኦድ ካታማ ꬋይስስ።

12 ባ ሾሩዋ ካꬍያ ኡራስ ዎዛን ባዋ፤ ሽን አኬካንቾ ኡራይ ስእ ጌስ።

13 ዝግርያ አስ ፁራ ላሌስ፤ ሽን አማነትያ አስ ፁራ ገንꬄስ።

14 ካለꬅያባይ ꬋይኮ፥ ካዎተꬃይ ኩንዴስ፤ ሽን ዳሮ ዞረይሳት ደእኮ፥ ሳሮይ ደኤስ።

15 ኤረና ኡራስ ዋሰ ግድያ አስ ቱማፐ መቶታና፤ ሄሳፈ ዋሰ ግዶና እፀይስ ሎኦ።

16 ኡሎ ኬሀ ማጫስ ቦንቸታዉሱ፤ ሽን ኢታ አስ ዱረተꬃ ፃላላ ዱረቴስ።

17 ኬሀ አስ ባዉ ሎኦባ ኦꬄስ፤ ሽን ዎዛና ምኖ አስ ባና ቆሄስ።

18 ኢታ አስ ደምያ ሚሸይ ጭሞ፤ ሽን ፅሎተꬃ ዘርያ ኡራይ ቱማ ዎይቶ ጫካና።

19 ፅሎተꬃን ምንድ ደእያ ኡራይ ፓፃ ደአና፤ ሽን ኢታተꬃ ካልያ ኡራይ ሀይቃና።

20 ጎዳይ ኢታ ቆፋይ ደእያ አሳታ እፄስ፤ ሽን ሱረ ሄመተይሳታን ኡፋይቴስ።

21 ኢታ አስ ሴረቶና አተና፤ ሽን ፅሎታ ኮቻይ አታና።

23 ፅሎታ አሙዋስ ፖሎይ ሎኦ ፃላላ፤ ሽን ኢታታ አሙዋስ ፖሎይ ሀንቆ ፃላላ።

24 እስ እስ አሳት ባንታ ሚሸ አሳስ ጮ ኬሆሶና፤ ሽን ኤንታ አቆይ ሃ ዳሬስ። ሀራ አሳት ቃስ ባንታ ሚሻስ ፓላ ኡዘቶሶና፤ ሽን ኤንታ አቆይ ያ ፓጬስ።

25 ኬሀ አስ ዱረታና፤ ሀራታ ማድያ አስ ማደታና።

26 ካꬅ አልእን ባይዛናዉ ምንጅያ ኡራ አሳይ ባዴስ። ሽን ባ ካꬃ አሳይ ኮይያ ዎደ ባይዝያ ኡራ አንጄስ።

27 ሎኦባ ምንꬅድ ኮይያ ኡራይ ኡፋይሳ ደሜስ፤ ሽን ኢታባ ኮይያ ኡራ ኢታባይ ደሜስ።

28 ባ ዱረተꬃ አማነትያ አስ ኩንዳና፤ ሽን ፅሎት ባልጎ ምꬃዳ።

29 ባ ሶ አሳ ቦላ ቡቀꬅ ደንꬅያ ኡራይ ጎኤትያባይ አይብካ ባዋ። ኤያትካ ጭንጫታስ አይለ ግዳና።

30 ፅሎ አስ ደኦ አይፈ አይፍያ ምꬃ መላ፤ ሸምፖ አሸይሳት ጭንጫታ።

31 ፅሎት ሳአን ባንታ ኦሶ ጋተ ኤክያባ ግድኮ፥ ኢታትነ ናጋራንቻት ባንታ ኦሱዋስ ኤካና ጋተይ ዋንድ ዳራንዴሻ!