1 ጭንጫ ማጫስ ባ ኬꬃ ኬፃዉሱ፤

2 ሱረ ሄመትያ አስ ጎዳ ያዬስ፤

3 ኤያ ኦድ እያ ዞኩዋስ ፃምአ ኤሄስ፤

4 ቦር ባይና እፅኮ ሻለይ ካይስ ግዴስ፤

5 አማነትያ ማርክ ኡባ ዎደ ቱማ ኦዴስ፤

6 ቀልቅስያ አስ ጭንጫተꬅ ኮዬስ፥ ሽን ደመና፤

7 ኤያ አሳፐ ሃካ፤

8 ጭንጫ አስ ጭንጫ ግድያ ባ ኦꬅያባ ኤሬስ፤

9 ኤያት ናጋራ ኦꬅሸ፥ ቂሮታናይሳ አግድ ቀልቅሶሶና፤

10 እስ እስ ዎዛን ባ አዛኑዋ ኤሬስ፤

11 ኢታታ ኬꬃይ ላለታና፤

12 አሳስ ልከ ዳንያ ኦገይ ደኤስ፤

13 ሚቻ ዎደካ ዎዛናን አዛኖይ ደኤስ፤

14 ኢታ አስ ባ ኢታ ኦሱዋ ጋተ ኤካና፤

15 ኤያ አስ ኡባባ አማኔስ፤

16 ጭንጫ አስ ጎዳ ያዬስ፤ ኢታፐ ሃኬስ፤

17 ኤለ ሀንቀትያ አስ ኤያ ኦሶ ኦꬄስ፤

18 አኬክ ባይና አስ ባ ኤያተꬃ ጋትያ ኤኮሶና፤

19 ኢታት ሎኦታ ስንꬃን ጉልባታና፤

20 ማንቆይ ባ ሾሩዋን እፀቴስ፤

21 ባ ሾሩዋ ካꬍያ አስ ናጋራ ኦꬄስ፤

22 ኢታባ ማቀተይሳት ባሎሶና ግዶኮና?

23 ምንድ ኦꬅያ ኦሶ ኡባን ዎይ ደኤስ፤

24 ጭንጫታስ ኤንታ ዱረተꬃይ ኤንታዉ ካላቻ፤

25 ቱማ ማርክ ሸምፖ አሼስ፤

26 ጎዳ ያይያ አሳስ ምኖ ሚፃይ ደኤስ፤

27 ጎዳ ያሽ ደኦ ፑልቶ፤

28 ካዎ ግታተꬅ እ ሃርያ አሳ ዳሮተꬃና፤

29 ዳንዳአንቾ አሳስ ግታ አኬክ ደኤስ፤

30 ሳሮ ዎዛን አሳተꬃስ ፓያተꬅ እሜስ፤

31 ማንቆታ ናቅያ አስ ኤንታ መꬍዳይሳ ጫዬስ፤

32 ኢታት ባንታ ኢታ ኦሶን ኩንዳና፤

33 አኬካንቾ አሳ ዎዛናን ጭንጫተꬅ ኩምስ፤

34 ፅሎተꬅ እስ ካዎተꬃ ꬎቁ ꬎቁ ኦꬄስ፤

35 ኤራንቾ አይለታን ካዎይ ኡፋይቴስ፤