21
1 ካዎ ዎዛን ጎዳ ኩሸና፤
እያ ዎዛና ꬋዋ ሃꬃዳ
ባ ኮይዳ ሶ ዛሬስ።
2 አስ ኦꬅያባ ኡባይ እያዉ ልከ ዳኔስ፤
ሽን ጎዳይ እያ ዎዛና ቆፋ ፓጬስ።
3 ያርሾ ያርሻናፐ አꬅድ፥
ፅሎነ ሱረ ኦይሳ ጎዳይ ዶሴስ።
4 ኢታት ኦቶሮንነ ጬቀተꬃን ኤረቶሶና፤
ሄስ ቃስ ናጋራ።
5 ምኖ ኦꬅያ አሳ ሀልቾይ ዱረዬስ፤
ሽን ኤሶትያ ኡባይ ማንቄስ።
6 ዎርዶን ዳጋይዳ ሻሎይ ፐንቶዳ ꬋዬስ፤
ሄሳ ኮየይሳት ሀይቆ ኮዮሶና።
7 ኢታት ሱረባ ኦꬃናዉ ኮዮና ግሾ፥
ኤንታ ጌላ ኦሶይ ኤንታ ኤክድ ቤስ።
8 ናጋራንቾት ጌላ ኦገን ሄመቶሶና፤
ሽን ጌሻት ሱረባ ኦꬆሶና።
9 ዶናትያ ማችራ እስ ኬꬃን ዳናፐ
ካረ ዳርማቻን ዱስ ሎኦ።
10 ኢታት ኢታባ ኦꬃናዉ አሞቶሶና፤
ባንታ ሾሮታስ ቃቶኮና።
11 ቀልቅስያ አስ ሴረትያ ዎደ
ዎዛን ባይና ኡራይ ጭንጫተꬅ ታማሬስ፤
ዎዛናማ ኡራይ ኤራ ደሜስ።
12 ፅሎ ፆሳይ ኢታታ ሶን ኦሰትያባ ኡባ በኤስ፤
ኤንታ ሽር የግድ ꬋይሴስ።
13 ማንቆታ ዋሱዋ ስአናፐ ግድ፥
ባ ሀይꬃ ቱጭያ ኡራይ፥ እካ ዋሳና፤
እ ዋስን አልያ አስ ꬋያና።
14 ጌማን እምያ እሞይ ሀንቆ ዶሽሴስ፤
ቆሳን እምዳ ዎꬋፈይ ሀንቆ እርፅሴስ።
15 ሱረ ፕርድ ፕርደትያ ዎደ፥
ፅሎት ኡፋይቶሶና፤
ሽን ኢታ ኦይሳታ ዳጋንꬄስ።
16 አኬካ ኦግያ ሃክያ ኡራ
ሀይቆይ ናጌስ።
17 እንጀትን ዳና ግያ ኡራይ ማንቄስ፤
ዎይነነ ዛይተ ዶስያ ኡራይ ዱረተና።
18 ፆሳ አሳታ አሻናዉ ኢታ አሳት ሴረቶሶና፤
አማነቶና አሳት ሱረ አሳታ ግሾ ሴረቶሶና።
19 ዶናትያነ ይሎትያ ማችራ ዳናፐ
ባዞን ደኦይ ሎኦ።
20 ዎዛናማ ኡራ ሶን ማልኦ ቁምነ ኦይስ ምንጀቴስ፤
ሽን ኤያ አስ ደእያባ ኡባ ምድጌስ።
21 ፅሎተꬅነ ሲቆ ኮይያ ኡራ ላይꬃይ አዱቄስ፤
ሄ ኡራይ ፅሎተꬅነ ቦንቾ ደሜስ።
22 ዎዛናማ አስ ዎልቃማ ኦላንቾታ ካታማ ኦልድ ኦይኬስ፤
ኤንቲ አማነትያ ምኖ ሚፃ ላሌስ።
23 ባ ዶናነ ባ እንፃርሳ
ናግያ አስ ባና መቶፐ ናጌስ።
24 ኦቶረይነ ጬቀተይ ቀልቅስያ አስ፤
እ ኦቶራንቾ ግድዳ ግሾ አሳስ ቆፐና።
25 ኦꬃናዉ ኮዮና ግሾ
አዛላ አሞይ ዎꬌስ።
26 አዛላ አስ ኡባ ዎደ ዳሮባ ደማናዉ አሞቴስ፤
ሽን ፅሎይ ባዉ አሾና እሜስ።
27 ጎዳይ ኢታታ ያርሹዋ እፄስ፤
ኤንቲ እያዉ ኢታ ቆፋን ሺሽያ ያርሹዋ አꬅድ እፄስ።
28 ዎርዶ ማርክ ꬋያና፤
ሽን ቱማ ማርክ ኤቅድ ዳና።
29 ኢታ አስ በሶና ፃላ ፃሌስ፤
ሽን ሱረ አስ ዩሽ ቆፔስ።
30 አስ ባ ጭንጫተꬃን፥ አኬካንነ ዞረን
ጎዳራ ኤቀታናዉ ዳንዳኤና።
31 ኦላስ ፓራ ኮራናዉ ዳንዳኤቴስ፤
ሽን ፆኖይ ጎዳባ።