ማዝሙረ ማፃፋይ፥ እስራኤለ አሳ ዎሳነ ጋላታ ማዝሙረታ ሺሽድ ኦይክስ። ዱማ ዱማ አሳት አዱሳ ዎደ ግዶን ሀ ማዝሙረታ ፃፍዶሶና። እስራኤለ አሳይ ሀ ማዝሙረታ ባንታ ጎይኖ ዎደታን ጎኤቶሶና። ጉየፐ እስራኤለ አሳይ ባንታ ጌሻ ማፃፋ ግዶን ገልስዶሶና።

ሀ ማዝሙረት ዳሮ ቆሞ። ጋላታነ ዎሳ ማዝሙረታ፥ ጎይኖ ማዝሙረታ፥ ፆሳይ ማዳና መላ፥ ናጋና ማላነ ሳሮ ዎꬃና መላ ቡዞ ደኦስነ ቢታ ኡባስ ዎስያ ዎሳታ፥ ናጋራ ማሮታስ ዎስያ ዎሳታነ ሀራታ ጋꬅድ ኦይክዳ ማዝሙረ። ሀ ማዝሙረታፐ እሶት እሶት እስ ኡራ ዎዛናን ስኤትዳ ምሻታ ቆንጭሶሶና፤ ሀራት ቃስ ፆሳ አሳ ኡባይ ኮያባነ አሳ ኡባስ ስኤትያ ሀኖታታ በሲያ ማዝሙረ።

የሱሲ ታማርስሸ ማዝሙረ ማፃፋፐ ኤክስ፤ ኦራꬃ ጫቆ ማፃፋ ፃፈትካ ማዝሙረ ማፃፋፐ ጎኤትዶሶና። ዎሳ ኬꬅ ኤቅዳ ዎደፐ ዶምን፥ ማዝሙረ ማፃፋይ ጎይኖ ዎደ አማንያ አሳይ ጎኤትያ ኤረትዳ ማፃፋ።