42
እዮባ
1 ሄሳፈ ጉየ፥ እዮብ ጎዳኮ ሀይሳዳ ያግድ ዛርስ፤
2 “ነ ኡባባ ኦꬃናዉ ዳንዳኤይሳነ
ነ ቆፋ ተቃናዉ ዳንዳኤይ ባይናይሳ ታኒ ኤራስ።
3 ነ፥ ‘ኤር ባይና ታ ዞርያ ቆሰይ ኦኔ?’ ያጋዳ ታና ኦይቻዳሳ፤
ቱማ ታኒ ታዉ ገልቦናባ፥
ታ ኤራፐ ቦላ ግድዳ ማላልስያባ ኦደታስ።
4 “ኔኒ ታኮ፥ ‘ታኒ ኦድያ ዎደ ሀይዛ፤
ታኒ ኦይችያ ዎደ ዛራ’ ያጋዳሳ።
5 ታኒ ካሰ ነባ ሀይꬃን ስአስ፤
ሽን ሀእ ታ ነና አይፈን በአስ።
6 ሄሳ ግሾ፥ ታ ኦዳን የላታዳ፥
ብዶ ቦላነ ባና ቦላ ኡታዳ ፓፃይስ” ያግስ።
ኩሻ ሃሳያ
7 ጎዳይ ሄሳ እዮባስ ኦድዳፐ ጉየ፥ ተማናፐ ይዳ ኤልፋዛኮ ሀይሳዳ ያግስ። “ታ አይልያ እዮባዳ ህንተ ታባ ልከ ኦደትቦና ግሾ፥ ነ ቦላነ ነ ናምኡ ላገታ ቦላ ታ ሀንቆይ ኤፅስ። 8 ሄሳ ግሾ፥ ሀእ ላፑን ኮርማታነ ላፑን ማራዘታ ኤክድ ታ አይልያ እዮባኮ ብድ፥ ፁሳ ያርሾ ህንተ ባላስ ያርሽተ። ታ አይልያ እዮብ ህንተዉ ዎሳና፤ ታኒ እያ ዎሳ ስአዳ ህንተ ሀኑዋ መላ ህንተና ሴርከ። ህንተ ታ አይልያ እዮባዳ ታባ ልከ ኦድበከታ” ያግስ።
9 ሄሳፈ ጉየ፥ ተማናፐ ይዳ ኤልፋዝ፥ ሹሀፐ ይዳ በልዳዶስነ ናእማፐ ይዳ ሶፋር ብድ፥ ጎዳይ ኤንታ ኪትዳይሳዳ ኦꬅዶሶና። ጎዳይ እዮባ ዎሳ ስእስ።
እዮብ ዳኮ ዎይተትስ
10 እዮብ ባ ላገታስ ዎስዳፐ ጉየ፥ ጎዳይ እያ ዛሪድ ዱረይስ፤ እያዉ ካሰይሳ ግሾ ናምኡ ኩሸ እሚስ። 11 ሄሳፈ ጉየ፥ እያ እሻት፥ እያ ምቸትነ ካሰ እያ ኤረይሳት ኡባይ እያኮ ይድ፥ እያ ሶን እያራ ግብራ ምዶሶና። እያዉ አዛንዶሶና፤ ጎዳይ እያ ቦላ ኤህዳ መቶ ኡባን እያ ምንꬅዶሶና፤ ቃስ እያዉ ብራነ ዎርቃ ሳጋዮ እምዶሶና።
12 ጎዳይ እዮባ ዉርሰꬃ ላይꬃ ኮይሮ ላይꬃፈ አꬅድ አንጅስ። እዮባስ ታማነ ኦይዱ ሙኩሉ ዶርሳት፥ ኡሱፑን ሙኩሉ ግማለት፥ እስ ሙኩሉ ዋፃ ቦራትነ እስ ሙኩሉ ማጫ ሀረት ደኦሶና። 13 ቃስ እያዉ ላፑን አደ ናይታነ ሄꬑ ማጫ ናይት የለትዶሶና። 14 ባይራ ማጫ ናእዉ ይምሞ፥ ናምአንꬅዉ ቃፅኦ፥ ሄꬓንꬅዉ ቀረንሀፉኮ ያግድ ሱንꬅስ። 15 እዮባ ማጫ ናይታዳ ማላ ሎኦ ማጫ ናእ አዉ ቢታን በንትቤና። ኤንታ አዋ ኤንታዉ ኤንታ እሻታራ ላታ ቢታ እሚስ።
16 ሄሳፈ ስምን፥ እዮብ ፄታነ ኦይታሙ ላይꬅ ደእስ። ባ ናይታነ ባ ናይታ ናይታ ኦይዳንꬆ የለተꬃ ጋካናዉ በእስ። 17 እዮብ ዳሮ ዎደ ደእድ፥ ሎኦ ጭማ ጭምድ ሀይቅስ።