ዎይኮ እያ እንፃርሳ ዎዶሮን አንጫፋናዉ ዳንዳአይ?

ዎይኮ እያ ጋጩዋ ዎስፐን ሉካናዉ ዳንዳአይ?

ዎይኮ ነዉ ማልኦ ቃላ ኦዲ?

እ ነዉ ኤሮ ግድ ጫቃኔ?

ዎይኮ እያ ቃቻዳ ነ ማጫ ናይታራ ካአና መላ ኦꬃኔ?

ዎይኮ እያ ቃንፀረꬅድ ባይዞና?

ዎይኮ እያ ሁጵያ ማሻን ጫዳናዉ ዳንዳአይ?

ነ እያራ ቡተትዳ ቡትያ ዶጋካ፤

ናምአንꬆ እያራ ቡተታናዉ ቆፓካ።

ሀር አቶሽን እያ በእዳ ኡባይ ያሻን ኮኮሬስ።

ያትን፥ ታ ስንꬃን ኤቃናዉ ዳንዳኤይ ኦኔ?

ሳሎፐ ጋርሳን ደእያባ ኡባይ ታባ።

ሎእያ እያ አሳተꬃባ ቆንጭሶና አግከ።

እያ ጋጩዋ ፖቅድ ብፃላ ባርሳናይ ኦኔ?

እያ ጋጩዋ ፖቃናዉ ዳንዳኤይ ኦኔ?

ሹቻዳ ምንዳ ጎንዳለ ዳኔስ።

ኤንታ ግዶራ ሀር አቶሽን ጫርኮይ ካንꬃናዉ ዳንዳኤና።

ኤንታ አይብካ ሻከና።

እያ አይፈት ዎንታ ፃልቀዳ ጫዴስ።

ፕንፅያ ታም በንቴስ።

ታማ ቦላ ደእያ ኦቶፐ ከያ ፐንቶ መላ።

ታማ ላጮይ እያ ዶናፐ ከዬስ።

እ ዳሮ ያሼስ።

እያ አሳተꬃይ ብራታዳ ምኔስ።

ጋቻ ዎፃ መላ ምኖ።

ዳጋምድ ባቃቶሶና።

ቶር ዎይኮ ዶንገይ ዎይኮ ማሽ እያ ቆሄና።

ናሰ ብራታ ዎቅዳ ምꬃዳ መንረꬄስ።

ያምባርሻ ሹች እያዉ ሱላ መላ።

ቶራ ፆንግያ ዎደ ቀልቅስድ ሚጬስ።

ኡርቃራ እ ብያ ዎደ ማራሻ መላ ቢታ ጳልቄስ።

ፃሮን ፐንትያ ዛይተ መላ ሽር ሽር የጌስ።

አባ ሃꬃ ጎፖንቶ ላሜስ።

ቢታ ቦላ እያ መላ መተꬅ ሀር ባዋ።

ዶአ ኡባስ እ ካዎ” ያግስ።