40
1 ጎዳይ እዮባኮ ዛሪድ ያግስ፤
2 “እዮባ፥ አስ ኡባ ዳንዳእያ ጎዳራ ሞተትድ፥ ላꬃናዉ ዳንዳኢ?
አነ ፆሳራ ሞተትያ ኡራይ እያዉ ዛሮ” ያግስ።
3 ሄሳፈ ጉየ፥ እዮብ ዛሪድ፥ ሀይሳዳ ያግስ፤
4 “ጎዳዉ፥ ታኒ ፓꬆና ላፋ አስ፤
ታ ዶና ቦላ ኩሸ ዎꬃዳ ስእ ጋናፐ አትሽን፥
ነዉ አይ ዛሮ እማናዉ ዳንዳእያና?
5 ታኒ እስ ቶሆ ኦዳስ፤ ሽን ታዉ ዛርያባይ ባዋ፤
ናምአንꬆ ኦዳስ ሀራ ጉጅከ” ያግስ።
6 ሄሳፈ ጉየ፥ ጎዳይ ጎተ ግዶን ግድድ እዮባኮ ሀይሳዳ ያግስ።
7 አደዳ ነ ፄሳ ዳንጫዳ ደንዳዳ፥
ታ ኦይሻስ ዛሮ እማ።
8 ነ ታና ባላ አስ ከሳና ሀናዬ?
ነዉ ፅሎ ግዳናዉ ታና ዎርዳንቾ ከሳዬ?
9 ፆሳ ዎልቃ መላ ዎልቅ ነዉ ደኢ?
ፆሳይ ጉመይሳዳ ነ ጉማናዉ ዳንዳአይ?
10 ሄሳ ግድኮ፥ ነ ቦንቹዋነ ግታተꬃ ማአ፤
ነ ዎልቃነ ቴሙዋ ግፃ።
11 ነ ሀንቁዋ ጉሳ፤
አነ ኦቶራንቾታ ፄላዳ ካዉሻ።
12 አነ ሎይꬃ ፄላዳ ኦቶርትያ ኡባ ዬላያ፤
ኢታታ ኡባ ኤንቲ ደእያ በሳፈ ꬋይሳ።
13 ኤንታ ኡባ ቢታን ሞጋ፤
ዱፎን የጋዳ ኤንታ ቦላ ጎርዳ።
14 ሄ ዎደ ነ ዎልቃይ ነና አሻናዉ ዳንዳኤይሳ
ታ ማርካታና።
15 ታኒ ነና መꬍዳዳ መꬍዳ ብሄሞታ ጌተትያ ዶአ በአ፤
እ ቦራዳ ማታ ሜስ።
16 እያ ፄሳን ደእያ ዎልቃይነ
እያ ኡሉዋ ካምዳ ሻያ ምኖተꬃይ ዳሮ።
17 እያ ጎይናይ ዝጋዳ ቦላን ቃፄስ፤
እያ ገዳ ፃጶት ምኖን ዶቀትዶሶና።
18 እያ መቀꬃይ ናሰ ብራታ መላ፤
እያ ገዳይ ብራታ ኩረ መላ።
19 ፆሳይ መꬍዳ መታ ኡባ ጋርሳን እ አꬌስ፤
ታፐ አትሽን፥ ሀር እያ ፆናናዉ ዳንዳኤይ ባዋ።
20 ዶእ ጉፕያ ደረይ፥
እያዉ ምያባ ዶልሴስ።
21 ምꬃ ኩያ ጋርሳን ዝንኤስ፤
ጫረን ማቃ ግዶን ቆሰቴስ።
22 ምꬃት ባንታ ኩያን እያ ገንꬆሶና፤
ሻፋ ጋፃን ድጭያ ምꬃት እያ ካሞሶና።
23 ሻፋይ ክፅድ ጎገይ ዎደ ዳጋመና፤
ዮርዳኖሰ ሻፋይ ቆ ጋካናዉ ኩምኮካ እ ህርገና።
24 እያ አይፍያ ቶይስድ፥ እያ ኦይካናዉ ዳንዳእያ አስ ደኢ?
እያ ሲꬍያ ሉክድ ኦይካናዉ ዳንዳኤይ ኦኔ?