ባቾት ባናክድ ባንታ ማራታ የልያ ዎደ በአዲ?

አዉደ የልያኮ ነ ኤራይ?

ባንታ ማራታ የለይ አዉደኮ ኤራይ?

ባንታ አየታ አግድ ቦሶና፤ ናምአንꬆ ጉየ ስሞኮና።

ቃሾፐ ኤንታ ብርሽድ የድዳይ ኦኔ?

ማፅነ ቢታን ኤንቲ ዳናዳ ኦꬃስ።

ላገይስታ ቆደꬅ ስኦኮና።

ያን ምያ ፑርጮ ማታ ቆሮሶና።

ዎይኮ ነ ዛዳሎን ቃማ አቃንዴ?

ዎይኮ ዋፃዳ ጎያናዉ ዳንዳአይ?

ዴፆ ኦሶ እ ኦꬃና መላ እያዉ የጋ አጋኔ?

ዎይኮ ዉዱማን ሺሻና መላ እያ አማናይ?

ሽን ሃꬃ ካፎዳ ፕራꬋናዉ ዳንዳኡኩ።

ሻፈን ሆአና መላ አጋጋዉሱ።

ባዞ ዶአት የꬋና’ ጋዳ ቆፑኩ።

እ ዳቡራ ኡባይ መላ አተይስ እዉ አይኮካ ዳነና።

አኬካ ꬋይስዳይ ታና።

ባራ ጋደትያ ፓራ ቦላነ ፓራዋ ቦላ ሚጫዉሱ።

ዎይኮ ፓራታ ሞርገን ጭምባ ማይዝዳይ ነኔ?

ጋርማምድ ዳጋንꬃናዳ ኦꬅዳይ ነኔ?

ኦለታናዉ ኦላ ደምባ ጋላቦሶና።

ኤንታ ቦላ ማሻ ሾድኮካ ጉየ ስሞኮና።

ጶልሸ እሶይ እሱዋራ ጋሄትድ ጊሮሶና።

ሞይዘ ግርስ ስእያ ዎደ ስእ ግድ ኤቃናዉ ዳንዳኦኮና።

ኦላ ፔኖ ሃሆን ኤኮሶና፤

ቶራ ሞጮና ኪታነ ኦላንቾታ ጬቁዋ ስኦሶና።

ፓላናዉ ዳንዳኤይ ነ ጭንጫተꬃኔ?

ባ ኬꬃ ꬎቃ ደረታ ቦላ ኬፀይ ነ ኪታኔ?

ዛላ ቆጶት እያዉ ቆልአ ግድዶሶና።

እያ አይፈይ ሃሆን ጌሽድ ደሜስ።

ጋዉፅ ደእያ በሳን ሺቆሶና” ያግስ።