38
ፆሳ ዛሩዋ
1 ሄሳፈ ጉየ፥ ጎዳይ ጎተ ግዶን ግድድ እዮባስ ሀይሳዳ ያግድ ዛርስ።
2 ኤር ባይና ኦዳን
ታ ዞርያ ꬉምሰይ እ ሄስ ኦኔ?
3 አነ አደዳ ዳንጨታ፤
ታ ነና ኦይቻና፥ ታዉ ዛራ።
4 ታኒ አላምያ መꬍያ ዎደ ኔኒ አዉን ደአይ?
አነ ነ አኬክያኮ ታዉ ኦዳ።
5 ነ ኤርኮ፥ ሀ ሳኣ ዳልጋተꬃስ ዛዋ ዎꬅዳይ ኦኔ?
ዋꬋ ዎዶሩዋ ሳአ ቦላ የግዳይ ኦኔ?
6 ሀ ሳኣ ቱሳታ ኩንዶና መላ ምንꬅድ ኦይክዳይ አይቤ?
ሀ ሳኣ ባሱዋስ ኮይሮ ሹቻ ዎꬅዳይ ኦኔ?
7 ዎንታ ባካላት እስፈ የፅያ ዎደ፥
ኪታንቾት ኡባይ ኡፋይሳን እልል ግያ ዎደ ነ ኤራይ?
8 አባ ሃꬅ ቢታፈ ꬉቅድ ከይያ ዎደ፥
እያ ፐንገታ ጎርድዳይ ኦኔ?
9 አባ ሻራ ማይዛስ፤
ሳካና ꬉማን ጎዝዳይ ታና።
10 አባይ ካንꬆና መላ ዛዋ መꬍዳይ፥
እያዉ ፐንገነ ተቀ ዎꬅዳይ ታና።
11 “ሀይሳ ጋካናዉ ያ፤
ሽን ሀይሳፈ አꬎፋ፤
ነ ዎልቃማ ሆበይ ሄሳን ኤቆ” ያግዳይ ታና።
12 እዮባ፥ ነ የለቶሶፐ ዎንት ዎንታና መላ ኪታ ኤራይ፥
አዋይ ዶላና በሳ ማላ ኤራይ?
13 ዎንታ ፖኦይ ቢታ ኡባን ፖአና መላ፥
ኢታ አሳታ ቆሰትዳ በሳፈ ቆንጨ ከሳና መላ፥
ኔኒ ዎንታ ኪታ ኤራይ?
14 ዎንታ ፖኦይ ዙማታነ ዛንጋራታ፥
ዳኮይድ ዎꬅዳ ማኦይ ኤቅድ በንተይሳዳ በሴስ፤
ኦቶ ቦላ ዎꬅዳ ማታመዳ ቆንጬስ።
15 ኢታታ ፖኦይ ኤከታና፤
ኤንታ ማካላ ቀሰይ መቃና።
16 ጪሞ አባ ግዶ ገላዳ ፑልቱዋ በአዲ?
ዎይኮ እያ ባሱዋ ጋካዳ እያ ኦላ ስመረታዲ?
17 ነዉ ሀይቆ ፐንገት በንትዶና?
ዎይኮ ሳካና ꬉማ ፐንገታ በአዲ?
18 ሳአይ አይ መላ ግቴኮ ነ ኤራይ?
ሄሳ ኡባ ነ ኤርያ ግድኮ ታው ኦዳ።
19 ፖኦኮ ኤፍያ ኦገይ አዉኔ?
ꬉም አዉን ደእያኮ ኤራይ?
20 ፖኦነ ꬉማ ኤንታ በሳ በሳ ኤፋናዉ ዳንዳአይ?
ኤንቲ ደእያ በሳ ኤፍያ ኦግያ ኤራይ?
21 ኔኒ ሳእ መትያ ዎደ የለትዳ ግሾነ
ዳሮ ላይꬅ ደእዳ ግሾ ሄሳ ኤሮና አጋካ!
22 ሻች ምንጀትያ ኬꬃ ገላዲ?
ዎይኮ ሻች ዶረትዳ በሳ በአዲ?
23 ታኒ ኤንታ መቶ ዎደስ፥ ኦላ ዎደስነ
ቶራ ጋላሳስ ምንጃ ዎꬃስ።
24 ዎልአንꬅ ከያ በሳ ኤፍያ ኦገይ አዉን ደኢ?
ዎይኮ ዶሎሀ ጫርኮይ አዉፐ ከይድ ጫርኪ?
25 እር ዎꬍያ በሳ ጊግስዳይ፥
ዳዳስ ኦገ ከስዳይ ኦኔ?
26 አስ ዶና መላ ቢታን
እራ ቡክሰይ ኦኔ?
27 መልዳ መላ ቢታይ እራን ላክድ፥
ፑርጮ ማታይ ዶላና መላ ኦꬅዳይ ኦኔ?
28 እራስ አው ደኢ?
ዎይኮ አካ የልዳይ ኦኔ?
29 ሻቻስ አይያ ደአይ?
30 ሃꬃይ ሹቻዳ ምንꬄስ፤
አባ ባሶይ ሻቻዳ ኡከቴስ።
31 ፕላድሳ ጌተትያ ፆልንቶታ እስፈ ጋꬃዳ ቃቻናዉ ዳንዳአይ?
ኦርዮና ጌተትያ ፆልንቶት ቃሸትዳ ዎዶሩዋ ብላናዉ ዳንዳአይ?
32 ጩጋን ጩጋን ደእያ ፆልንቶታ ኤንታ ዎደን ዎደን ከሳናዉ ዳንዳአይ?
ቢረ ጌተትያ ፆልንቶታ ኤንታ ናይታራ ካለꬃናዉ ዳንዳአይ?
33 ሳሎት አይ ህገን አቅያኮ ነ ኤራይ?
ሄ ህገይ ሳኣ ሃራና መላ ኦꬃናዉ ዳንዳአይ?
34 ድኦይ ነና ሙካና መላ እራ ቡክሳናዉ፥
ነ ቃላ ꬎቁ ኦꬃዳ ሻራታ ስሳናዉ ዳንዳአይ?
35 ዎልአንꬅ ኪታናዉ ዳንዳአይ?
ኤንቲ ኔኮ ይድ፥ “ሄኮ፥ አይ ኦꬅኖ?” ጎና?
36 ዎዛናስ ጭንጫተꬅ፥
ካሀስ አኬካ እምዳይ ኦኔ?
37-38 ባ ጭንጫተꬃን ሻራታ ታይባናዉ ዳንዳኤይ ኦኔ?
ባና ሙኑቅድ፥ ኡርቃ ከስድ ምንꬃናዉ፥
ሳሎ ኦቶታ ገድ ኦꬅድ ሃ ትጋናዉ ዳንዳኤይ ኦኔ?
39 ሻንካታዳ ማጫ ጋሞስ ምያባ ኤሀ ኤራይ?
ኮሻትዳ ጋሞ ማራታ ሙዛ ኤራይ?
40 ኤንቲ ጎንጎሎን ቆሰት ናጎሶና፤
ባዞን ዝንእድ ፔኦሶና።
41 ቁሮት ኮሻትድ ዳቡርያ ዎደ፥
ኤንታ ናይት ምያባ ደማናዉ ታኮ ዋስያ ዎደ፥
ኤንታዉ ምያባ እመይ ኦኔ?