7
መቶ ዎደ ፅሎ አሳ ዎሳ
ብንያመ ኮቻ ኩዛባ ዳዊታ ጎዳስ የፅዳ ማዝሙረ
1 አቤት ጎዳዉ ታ ፆሳዉ፥ ታ ነናን ቆሰታይስ፤
ታና የደꬅያ ኡባፈ ታና አሻ።
2 ኔኒ ታና አሾናባ ግድያኮ፥
ኤንቲ ታና ጋሞዳ ዛዛና፤
አሽያ አስ ባይና መንረꬃናሽን።
3 አቤት ጎዳዉ ታ ፆሳዉ፥
ታ ሀይሳ መላባ ኦꬅዳባ ግድኮ፥
ታኒ አሰ ናቅዳባ ግድኮ፥
4 ታ ላገታስ ሎኦ ግሾ ኢታ ዛርዳባ ግድኮ፥
ጋሶይ ባይና ታ ሞርክያ ቦንቅዳባ ግድኮ፥
5 ታ ሞርከይ ታና የደꬅድ ኦይኮ፤
ታና ሳአን የግድ የꬎ፤
ታና ባናን ጎንዶርስድ ካዉሾ።
ሳላህ
6 አቤት ጎዳዉ፥ ነ ሀንቁዋን ደንዳዳ፥
ኤፅያ ታ ሞርከታ ሀንቁዋ ቦላ ኤቃ፤
ታ ፆሳዉ፥ ታ ግሾ ባርካ፤
ኔኒ ፅሎ ፕርዳ ኮያሳ።
7 አሳይ ነ ዩሾን ሺቆ፤
ኔኒ ኤንታፈ ቦላራ ሃራ።
8 ጎዳይ ካዎተꬃታ ቦላ ፕርዴስ፤
አቤት ጎዳዉ፥ ታ ፅሎተꬃዳነ
ታ ሱረተꬃዳ ፕርዳ።
9 ቆፋነ ዎዛና ሻካዳ ኤርያ ፅሎ ፆሳዉ፥
ኢታታ ጌላ ሀኖታ ኔኒ ተቃ፤
ሽን ፅሉዋ ሳሮን ናጋ።
10 ዎዛና ሱረታ አሽያ፥
ፆሳይ ታዉ ጎንዳለ።
11 ፆሳይ ፅሎ ፕርደይሳ፤
እ ኡባ ዎደ ኢታታ ቦላ ሀንቀትያ ፆሳ።
12 ኢታት ባንታ ኢታተꬃፈ ስሞና እፅኮ፥
ፆሳይ ባ ማሻ ሌፈስ፤
ባ ዶንግያ ጊግሴስ።
13 እ ባ ዎꬍያ ኦላ ሚሸታ ጊግሴስ፤
ላፅያ ባ ዶንገ ቶራ ፕቴስ።
14 ኢታት ቆሆ ቃንꬃትድ፥
ገነ ዎደፅድ፥
ዎርዶ የሎሶና።
15 ሀራ አሳስ ኦላ ቦክዳ አስ
ባ ቦክዳ ኦላን ባዉ ኩንዴስ።
16 እያ ገነይ እያ ሁጰን ስሜስ።
እያ ጌላተꬃይ እያ ሜስ።
17 እያ ፅሎተꬃ ግሾ ታኒ ጎዳ ሳባና፤
ኡባፈ ꬎቃ ጎዳ ሱንꬃስ
ታኒ ጋላታ ማዝሙረ የፃና።