ጌሻ ማፃፋ ማዝሙረ ማፃፋ 18

ፆኖ ማዝሙረ

ዛማረታ ሀላቃስ ፃፈትዳ ዳዊታ ማዝሙረ

ጎዳይ እያ ሞርከታፐነ ሳኦላ ኩሸፐ አሽዳ ዎደ ዳዊታ ጎዳስ የፅዳ ማዝሙረ

1 አቤት ጎዳዉ፥ ታ ዎልቃዉ፥

ታኒ ነና ዶሳይስ።

2 ጎዳይ ታ ዛላ፤ ታ ሚፃ፤ ታና አሸይሳ፤

ታ ፆሳይ ታ እያኮ ባቃትያ ታ ዛላ።

እ ታዉ ጎንዳለ፤ ታና አሽያ ዎልቃ፤

ታኒ ቆሰታዳ አትያ በሰ።

3 ጋላታ በሲያ ጎዳ ታ ፄጋይስ፤

ታ ሞርከታፐ ታኒ አታና።

4 ሀይቆ ዎዶሮይ ታና ጩልስ፤

ꬋዮ ድኦይ ታና ዳጋንꬅስ።

5 ዱፎ ዎዶሮይ ታ ቦላ ፃፀትስ፤

ሀይቆ ፅሄይ ታና ኦይክስ።

6 ታ ኡንአን ጎዳ ፄጋስ፤

ታና ማዳና መላ ታ ፆሳኮ ዋሳስ።

ባ ኬꬃን ግድድ ታ ግርሳ ስእስ፤

ታ ዋሶይ እያ ሀይꬃን ዎꬍስ።

7 ፆሳይ ሀንቀትዳ ግሾ፥

ቢታይ ቃፅስ፤

ደረታ ፃጶይ ኮኮርስ።

8 እያ ሲꬍያፐ ሀንቆ ጩያይ ከይስ፤

እያ ዶናፐ ምያ ታማ ላጮይ ከይስ፤

እ ፁግያ ቦንቆ ጩትስ።

9 ሳሉዋ ጳልቅድ ዎꬍስ፤

እያ ቶሁዋፐ ጋርሳን ꬉማ ሻር ደኤስ።

10 ክሩበታ ቦላ ኡትድ ፓልስ፤

ጫርኮ ቀፈን ፑደ ደንድስ።

11 ባና ꬉማን ካምስ፤

እያ ዱንካነይ እራን ኩምዳ ሻራ።

12 እያ ስንꬃን ደእያ ግታ ፖኡዋፐ

ሻችነ ታማ ላጮይ ከይድ

ꬉማ ሻራ ካንꬅድ ብስ።

13 ጎዳይ ዳዳዳ ሳሎፐ ጉምስ፤

ኡባፈ ꬎቃ ፆሳይ ባ ግርሳ ስስስ፤

ዎልአንꬃንነ ታማ ላጮን ቆንጭስ።

14 ባ ዶንግያ ዱክድ ባ ሞርከታ ላልስ፤

ዎልአንꬃ ፖኦ ኪትድ ኤንታ የደꬅስ።

15 አቤት ጎዳዉ፥ ኔኒ ሴርዳ ዎደ፥

ሸነታዳ ፔኑቅዳ ዎደ፥

አባይ ዝንእዳ ቢታይ በንትስ፤

ሳአ ባሶይ ቆንጭስ።

16 ጎዳይ ቦላፈ ኩሽያ የድድ ታና ኦይክስ፤

ጪሞ ሃꬃፈ ታና ዳፍድ ከስስ።

17 ታ ቦላ ዳሮ ዎልቃምዳ

ታ ሞርከታፐነ

ታና እፀይሳታፐ አሽስ።

18 ታ መቶትዳ ዎደ ኤንቲ ታ ቦላ ደንድዶሶና፤

ሽን ጎዳይ ታና ካትስስ።

19 እ ታና ዳልጋ በሲ ከስስ፤

ታናን ኡፋይትዳ ግሾ ታና አሽስ።

20 ታ ፅሎተꬃዳ ጎዳይ ታዉ ቃንፅስ፤

ታ ኩሸ ጌሻተꬃዳ እ ታዉ ዛርስ።

21 ታኒ ጎዳ ኦግያ ካላስ፤

ታ ፆሳ አጋዳ ካረ ከያብከ።

22 ታኒ እያ ህግያ ኡባ ናጋስ፤

እያ ኪታ ፖሎ አጋብከ።

23 ታኒ እያ ስንꬃን ሱረ ደአስ፤

ታና ናጋራፐ ናጋስ።

24 ጎዳይ ታ ፅሎተꬃዳነ

ታ ኩሸ ጌሻተꬃዳ ታዉ ዛርስ።

25 አማነተይሳታስ ነ አማነታሳ፤

ሱረታስ ነ ሱረ።

26 ጌሻታስ ነ ጌሽ፤

ሽን ጌላታስ ነ ጌላ።

27 አሽከታ አሻሳ፤

ሽን ኦቶራንቾታ ካዉሻሳ።

28 አቤት ጎዳዉ፥ ነ ታዉ ፆምፓሳ፤

ታ ፆሳይ ታ ꬉማ ፖእሳሳ።

29 ነ ማዱዋን ታ ሞርከ ቶራ ቦላ ደንዳይስ፤

ታ ፆሳን ሚፃ ፄራራ ጉፓዳ አꬋይስ።

30 ፆሳ ኦገይ ፖሎ፤

ጎዳ ቃላይ ጌሽ፤

እያኮ ባቃትያ ኡባስ እ ጎንዳለ።

31 ጎዳፐ አትሽን፥ ሀራ ፆሲ ኦኔ?

ኑ ፆሳፈ አትሽን፥ ሀራ ዛል ኦኔ?

32 ታዉ ዎልቃ እመይነ

ታ ኦግያ ሳሮ ኦይ ፆሳ።

33 እ ታ ቶሁዋ ገንኤ ቶሆዳ ምንꬄስ፤

ꬎቃ በሳን ህርግ ባይና ኤሴስ።

34 ታ ኩሽያ ኦላ ታማርሴስ፤

ናሰ ብራታ ዶንግያ ዱካና መላ

ታ ቀስያ ምንꬄስ።

35 ታና አሽያ ነ ጎንዳልያ ታዉ እማዳሳ፤

ነ ኡሻቻ ኩሸይ ታና ዘምፕሴስ፤

ነ ሎኦ ኦይከꬃይ ታና ግታዬስ።

36 ታ ሄመትያ በሳ ዳልግሳዳሳ፤

ታ ቶሁዋ ሀርቹች ኤክቤና።

37 ታ ሞርከታ የደꬃዳ ኦይካስ፤

ኤንታ ꬋይሶና ጉየ ስምከ።

38 ኤንቲ ዛር ደንዶናዳ ሾጫስ፤

ኤንቲ ታ ቶሁዋ ጋርሳን ኩንድዶሶና።

39 ኦላስ ታና ዳንጭሳዳሳ፤

ታራ ጋደተይሳታ ታዉ ጉልባትሳዳሳ።

40 ታ ሞርከታ ታ ስንꬃፈ ጉየ ዛራዳሳ፤

ታና እፀይሳታ ꬋይሳስ።

41 ማደ ኮይድ ዋስዶሶና፥

ሽን ኦንካ ኤንታ አሽቤና።

ጎዳ ኤንቲ ፄግዶሶና፥

ሽን እ ኤንታዉ ኮይቤና።

42 ጫርኮይ ፕትድ ኤፍያ ባናዳ ኤንታ ሊቅሳስ፤

ኦገ ኡርቃዳ ኤንታ የꬋስ።

43 ገነ አሳፐ ታና አሻዳሳ፤

ታና ካዎተꬃታ ቦላ ሹማዳሳ፤

ታ ኤሮና አሳይ ታዉ ሃረትዶሶና።

44 ኤንቲ ታባ ስእድ ታዉ ኪተቶሶና፤

አላጋ ደረይ ታ ስንꬃን ዝጌስ።

45 ኤንቲ ካሀ ꬋይዶሶና፤

ባንታ ሚፃፐ ኮኮርሸ ዮሶና።

46 ጎዳይ ደኤስ!

ፆሳይ፥ ታ ዛላይ ጋላተቶ!

ታና አሽያ ፆሳይ ꬎቁ ꬎቁ ጎ!

47 እ ታዉ ሀሎ ከስያ ፆሳ፤

ካዎተꬃታ ታ ጋርሳን ሃርሰይሳ።

48 ታ ሞርከታፐ ታና አሸይሳ፤

ታና እፀይሳታ ቦላ ꬎቁ ꬎቁ ኦꬃሳ፤

ኢታታፐ ታና አሻሳ።

49 ሄሳ ግሾ፥ ጎዳዉ

ካዎተꬃታ ግዶን ታኒ ነና ጋላታና፤

ነ ሱንꬃ ሳባና።

50 እ ባ ካዋስ ፆኖ እሜስ፤

ባ ትይዳይሳስ፥ ዳዊታስነ እያ ኮቻስ፥

ባ ኬሀተꬃ በሴስ።