19
ፆሳ ህገን ቦረይ ባዋ
ዛማረታ ሀላቃስ ፃፈትዳ ዳዊታ ማዝሙረ
1 ሳሎት ፆሳ ቦንቹዋ ሃሳዮሶና፤
ሳሎ ጉፋንꬆይ እያ ኩሸ ኦሱዋ አዋጄስ።
2 እስ ጋላስ ሀራ ጋላሳስ ሄሳ ኦዴስ፤
እስ ቃም ሀራ ቃማስ ኤራተꬅ ቆንጭሴስ።
3 ኦድ ዎይኮ ቃል ባዋ፤
ኤንታ ግርሳይ ስኤተና።
4 ግዶሽን ኤንታ ኦዳይ ሳአ ኡባን ላለትስ፤
ኤንታ ቃላይ ቢታ ጋፃ ጋክስ።
አው ደእያ በሲ ፆሳይ ሳሎን ጊግስስ።
5 ባ ሶፐ ከይያ ምሽራዳ፥
ጋደ ዎፃናዉ ኡፋይትድ ጊግዳ አሳዳ፥
አዋይ ዎንታ ዎንታ ከዬስ።
6 እስ ባጋ ሳሎ ጋፃፐ ከይድ፥
ሀራ ባጋ ሳሎ ጋፃ ጋካናዉ ቤስ፤
እያ ሱላፐ ጌምያባይ ባዋ።
7 ጎዳ ህገይ ሱረ፤
ሸምፖ ዛሬስ።
ጎዳ ኪታይ አማነትዳይሳ፤
አኬክ ፓጭዳይሳታ ጭንጫ ኦꬄስ።
8 ጎዳ ዎጋይ ልከ፤
ዎዛና ኡፋይሴስ።
ጎዳ ኪታይ ጌሽ፤
አይፈ ፖእሴስ።
9 ጎዳስ ያሽ ጌሽ፤
መርናዉ ኤቅድ ደኤስ።
ጎዳ ፕርዳይ ኩመꬅ ቱማነ ፅሎ።
10 ዎርቃፈ አꬍድ ኮየቴስ፤
ዋላህ ባይና ዎርቃፈ አꬍድ ሎኦ።
ኤሳፈ አꬍድ ሎኦ
እልሎ ኤሳፈ አꬍድ ማልኦ።
11 ነ አይለይ ናገታና መላ ዞሬስ፤
ነ ህግያ ናጎይ ዳሮ ጎኤስ።
12 ባ ቆሁዋ ደመይ ኦኔ?
አቤት ጎዳዉ፥ ጌምዳ ናጋራፐ ታና ጌሻ።
13 ታና ነ አይልያ፥
ኤርሸ ኦꬅያ ናጋራፐ ናጋ።
ናጋር ታና ሃሮና መላ ማዳ፤
ሄ ዎደ ታኒ ሱረ ግዳና፥
ግታ ባላፐ ጌያና።
14 አቤት ጎዳዉ፥ ታ ዛላዉ፥ ታና ዎዘይሶ፤
ታ ዶናፐ ከይያ ቃላይነ
ታ ዎዛና ቆፋይ ነና ኡፋይስያባ ግዶ።