ጌሻ ማፃፋ ማዝሙረ ማፃፋ 28

28

ፆሳይ ታዉ ጎንዳለነ ዎልቃ

ዳዊታ ማዝሙረ

1 አቤት ጎዳዉ፥ ታ ዛላዉ፥

ታ ነና ፄጋይስ፤

ነ ታዉ ስእ ጎፓ።

ነ ስእ ጊኮ፥

ታ ዱፎ ገልዳ አስ ግዳይስ።

2 ማደ ኮያዳ ታ ዋስያ ዎደ፤

ኡባፈ ጌሻ ዱንካንያኮ፥

ታ ኩሽያ ምጭያ ዎደ ታ ዎሳ ስአ።

3 ኢታ ኦꬅያ ኢታ አሳታራ ታና ጋꬃዳ ኦይኮፋ፤

ኤንቲ ባንታ ዎዛናን ገነ ቆፕሸ፥

ባንታ ዶናን ሳሮተꬅ ሃሳዮሶና።

4 ኤንታ ኦሱዋዳ ኤንታ ሴራ፤

ኤንታ ኢታተꬃዳ ኤንታዉ ቃንፃ።

ኤንታ ኩሸ ኦሱዋዳ ኤንታ ፕርዳ፤

ኤንታዉ በሲያ ኢታ ኤንታዉ ዛራ።

5 ኤንቲ ጎዳ ኦሱዋነ እያ ኩሸ መꬉዋስ፥

በሰ እሞና ግሾ ጎዳይ ኤንታ ላላና፤

ዛሪድ ኤንታ ኬፀና።

6 ታ ዎሳ ስእዳ ግሾ

ጎዳይ ጋላተቶ።

7 ጎዳይ ታዉ ዎልቃነ ጎንዳለ፤

ታ ዎዛናይ እያን አማነቴስ፤

ታ እያን ማደታስ።

ታ ዎዛናይ እያን ኡፋይቴስ፤

ታ እያ ማዝሙረን ሳባና።

8 ጎዳይ ባ አሳስ ዎልቃ፤

ባ ዶርድ ካዋ አሽያ ሚፃ።

9 ጎዳዉ፥ ነ አሳ አሻ፤

ነባ ግድዳይሳታ አንጃ።

ኤንታ ሄመይ ነና ግዳ፤

ኤንታ መርናዉ ቶካ።