34
ፆሳይ ኬሀ ግደይሳ በእተ
ዳዊቲ ጎሹ ዳንድ ሺቅዳ ግሾ፥ አብመለከ ስንꬃፈ ጎደትድ ከይዳ ዎደ የፅዳ ማዝሙረ
1 ታኒ ኡባ ዎደ ጎዳ ጋላታና፤
እያ ጋላታይ ታ ዶናፐ ፓጨና።
2 ታኒ ጎዳን ጬቀታይስ፤
አዳት ሄሳ ስእድ ኡፋይቶ።
3 ታራ ጎዳ ቦንችተ፤
እያ ሱንꬃ እስፈ ꬎቁ ꬎቁ ኦꬆስ።
4 ታኒ ጎዳ ኮይን፥ እ ታዉ ዛርስ፤
ታ ያይያባ ኡባፈ ታና አሽስ።
5 እያኮ ፄልያ ኡባይ ፖኦሶና፤
ኤንታ ሶምኦይ ዬላተና።
6 ሀ ማንቆይ ዋስስ፤
ጎዳይ እያ ዋሱዋ ስእስ፤
እያ መቶ ኡባፈ እያ አሽስ።
7 ጎዳ ኪታንቾይ እያዉ ያየይሳታ ናጌስ፤
ኤንታ ዩሾን ግድድ ኤንታ አሼስ።
8 ጎዳይ ኬሀ ግደይሳ ላጭድ በእተ፤
እያኮ ባቃትያ አስ አንጀትዳይሳ።
9 ህንተኖ፥ ጌሻ አሳዉ፥ ጎዳስ ያይተ፤
እያዉ ያየይሳታስ አይኮይካ ፓጨና።
10 ጋሞት ምያባ ꬋይድ ኮሻቶሶና፤
ሽን ጎዳ ኮየይሳታስ ሎኦባይ ፓጨና።
11 ናይቶ፥ ሃ ዪተ፤ ስእተ፤
ታ ህንተና ጎዳ ያሽ ታማርሳና።
12 ሎኦ ደኦ ዳናዉነ
ኬሀባ በአናዉ አዱሳ ላይꬅ ዳናዉ፥
አሞተይ ኦኔ?
13 ነ እንፃርሳይ ኢታባ ኦደቶናዳ፥
ነ ዶናይ ጭሞናዳ ተቃ።
14 ኢታፐ ሃካ፤ ሎኦባ ኦꬃ፤
ሳሮተꬅ ኮያ፤ ካላ።
15 ጎዳ አይፈይ ፅሎታ ፄሌስ፤
እያ ሀይꬃይ ኤንታ ዋሱዋ ስኤስ።
16 ኤንታ ቆፍስያባ ቢታፈ ꬋይሳናዉ፥
ጎዳይ ኢታ ኦይሳታ ባ ሀንቆ አይፈን ፄሌስ።
17 ፅሎት ዋሶሶና፤
ጎዳይ ኤንታ ዋሱዋ ስኤስ፤
እ ኤንታ መቶ ኡባፈ አሼስ።
18 ዎዛን መቅዳይሳታስ ጎዳይ ማታና፤
እ ኡፋይስ ቃንፅዳይሳታ አሼስ።
19 ፅሎ አሳስ መቶይ ዳሮ፤
ሽን ጎዳይ እያ ሄ ኡባፈ አሼስ።
20 ጎዳይ እያ መቀꬃታ ናግያ ግሾ፥
ኤንታፈ እሶይካ መቀና።
21 ኢታታ ኤንታ ኢታተꬃይ ዎꬋና፤
ፅሎታ እፀይሳት ፕርደታና።
22 ጎዳይ ባ አይለታ ዎዜስ፤
እያኮ ባቃትያ ኦንካ ፕርደተና።