36
አልኦ ግድዳ ፆሳ ሲቆ
ጎዳ አይለይ፥ ዳዊቲ ዛማረታ ሀላቃስ ፃፍዳ ማዝሙረ
1 ኢታ አስ ባ ዎዛናን ኢታባ ቆፔስ፤
እ ባ ዎዛናን ፆሳስ ያየና።
2 እ ባና ዳሮ ናሽያ ግሾ፤
ባ ናጋራ በአናዉ ዎይኮ እፃናዉ ዳንዳኤና።
3 እያ ዶናን ገነይነ ዎርዶይ ኩምስ፤
ጭንጫተꬅነ ሎኦባ ኦሶ አግስ።
4 ባ ሂፃን ዝንእድ ገነ ቆፔስ፤
ባና ሎኦ ግዶና ኦገን ካለꬄስ፤
ኢታባ እፀና።
5 ጎዳዉ፥ ነ ሲቆይ ሳሎታ ጋኬስ፤
ነ ቱማተꬃይ ሻራፐ አꬌስ።
6 ነ ፅሎተꬃይ ꬎቃ ደረታፐ አꬌስ፤
ነ ፕርዳይ አባ ጪሙዋፈ ዝቃ፤
ጎዳዉ፥ ኔኒ አሰነ ዶአ ናጋሳ።
7 ፆሳዉ፥ ነ ሲቆይ አይ መላ አልኦ!
አሳይ ነ ቀፍያ ጋርሳን ቆሰትድ አቴስ።
8 ኤንቲ ነ ግብራፐ ምድ ካሎሶና፤
ነ ኬሀተꬃ ሻፋፐ ኡይድ አሎሶና።
9 ደኦ ፑልቶይ ኔፐ ከዬስ፤
ነ ፖኡዋን ኑኒ ፖኦ በኦስ።
10 ነና ኤረይሳታስ ነ ሲቆይ፥
ዎዛና ሱረታስ ነ ፅሎተꬃይ ቃንፀተና።
11 ኦቶራንቾታ ቶሆይ ታና የꬎፎ፤
ናጋራንቾታ ኩሸይ ታና የደꬆፎ።
12 ኢታ አሳታ ኩንደꬃ በእተ፤
ኤንቲ ኩንድዶሶና፤ ደንዳናዉ ዳንዳኦኮና።