ጌሻ ማፃፋ ማዝሙረ ማፃፋ 39

39

ግታ ፆሲ-ላፋ አስ

ዳዊቲ ዛማረታ ሀላቃ፥ ኤዶታመስ ፃፍዳ ማዝሙረ

1 ታኒ፥ “ታ እንፃርሳን ናጋራ ኦꬆና መላ፥

ታ ኦግያ ናጋና።

ኢታ አሳት ታ ደእያ ዎደ፥

ታ ዶና ባራና” ያጋስ።

2 ሽን ዶና ሙመዳ ስእ ጋስ፤

ሀር አቶሽን ሎኦባ ኦደተይሳ አጋስ፤

ሽን ታ ዋየይ ሃ ዳርስ።

3 ታ ዎዛናይ ታ ጋꬃን ቴልስ፤

ታ ቆፋይ ታማዳ ኤፅስ፤

ያትን ታ እንፃርሳን ሃሳያ ዶማስ።

4 ጎዳዉ፥ ታ ደኡዋ ዉርሰꬃነ

ታ ዳናዉ አትዳ ጋላሳ ታና በሳ፤

ታ ደኦይ አይ መላ ቃንኮ ታና ኤርሳ።

5 ኔኒ ታ ላይꬃ ታካꬋዳ ዎꬃዳሳ፤

ታ ላይꬃይ ነ ስንꬃን ባይናባ መላ፤

ቱማ አስ ኡባይ እስ ሸምፖ መላ።

ሳላሀ

6 ቱማ አስ አꬍያ ኤሾ መላ፤

እ ጮ ዳቡሬስ፤ ሻሎ ሺሼስ፤

ሽን ኦን ጎኤታነኮ ኤረና።

7 ጎዳዉ፥ ሀእ ታ ናገይ ኦኔ?

ታኒ ነናን ኡፋይስ ኦꬃይስ።

8 ታ ባላ ኡባፈ ታና አሻ፤

ኤያታን ታና ቶሽሶፓ።

9 ሄሳ ኡባ ኦꬅዳይ ነና ግድያ ግሾ

ታኒ ሙማስ፤ ዶናካ ፖጋብከ።

10 ነ ፃምአ ታ ቦላፈ ደንꬃ፤

ምኖ ነ ኩሽያ ጋሶን ታ ዳቡራስ።

11 አሰ እያ ናጋራ ግሾ ሴራሳ፤

እያ አልኦ ደኡዋ ብላዳ ዉርሳሳ፤

ቱማ አስ ኡባይ እስ ሸምፖ መላ።

ሳላሀ

12 ጎዳዉ፥ ታ ዎሳ ስአ፤

ታና ማዳናዉ ታ ዋሱዋ ሀይዛ።

ታ አፉꬃ በአዳ ስእ ጎፓ፤

ታኒ ታ አዋታዳ በተ አስነ እማ

ግዳዳ ኔራ ደአይስ።

13 ታ ሻከታናፐነ ባናፐ ስን

ታኒ ኡፋይታና መላ ታና አጋ።