38
ፆሳዉ ታና አጎፋ
ዳዊቲ ፃፍዳ ቆፍሶ ማዝሙረ
1 አቤት ጎዳዉ፥ ነ ሸንያን ታና ሴሮፓ፤
ነ ይሉዋን ታና ሀንቆፋ።
2 ነ ዶንገ ቶራይ ታና ጫድስ፤
ነ ኩሸይ ታና ዴፅስ።
3 ነ ሀንቅዳ ግሾ ታ አሳተꬃይ ቆሄትስ፤
ታ ናጋራ ጋሶን ታ መቀꬃይ ሊቅስ።
4 ታ ባላይ ታና ሙክስ፤
ደንዶና ግታ ቶሆዳ ታና ዴፄስ።
5 ታ ኤያተꬃን ኦꬅዳ ናጋራ ግሾ፥
ታ ማዱንꬃይ ፅንቅስ።
6 ታ ሳአ ፄላስ፤ ሆካስ፤
ጋላስ ኩመꬅ አዛናሸ ፔአስ።
7 ታ አሾይ ፁጌስ፤
ታ አሳተꬃይ ፓፃ ግደና።
8 ታ ዳቡራስ፤ ሊቃስ፤
ታ ዎዛናይ ድርግያ ግሾ ኦላስ።
9 አቤት ጎዳዉ፥ ታ ዎዛና አሞ ኡባ ኤራሳ፤
ታ ኦለይ ኔፐ ጌምቤና።
10 ታ ዎዛናይ ድርጌስ፤
ታ ዎልቃይ ህት ግስ፤
ታ አይፍያ ፖኦይ ꬋይስ።
11 ታ ማዱንꬃ ጋሶን
ታ ሾሮትነ ታ ላገት ሃክድ ኤቅዶሶና፤
ታ ዳቦት ታፐ ሃክዶሶና።
12 ታና ዎꬋናዉ ኮየይሳት
ባንታ ፅህያ ታዉ የጎሶና።
ታና ቆሀናዉ ኮየይሳት፥
“ኑ ነና ደማና” ያግድ ማንዶሶና
ጋላስ ኩመꬅ ታ ቦላ ቶቦሶና።
13 ታ ቱለ አሳ መላ ስእከ፤
ሙመ አሳ መላ ዶና ፖግከ።
14 ቱማ ሀይꬅ ስኦና አስ፥
እንፃርስ ኦድድ ዛሮና አስ ግዳስ።
15 ጎዳዉ፥ ታ ነና ኡፋይሳን ናጋይስ፤
ታ ጎዳዉ፥ ፆሳዉ ነ ታዉ ዛሮ እማ።
16 ታኒ፥ “ታ ቶሆይ ꬉበትን፥
ኤንቲ ሀሹ ጋናዳነ
ታ ቦላ ጬቀታናዳ ኦꬆፋ” ያጋስ።
17 ታ ኩንዳና ሀናይስ፥
ታ ሳኮይ ታና አጎና እፅስ።
18 ታ ናጋራ ፓፃይስ፤
ታ ናቁዋ ጋሶን አዛናይስ።
19 ታ ሞርከት ግታነ ዎልቃማ፤
ታና ጮ እፀይሳት ዳሮ።
20 ታኒ ሎኦባ ኦꬅን ኢታ ዛረይሳት፥
ታ ሎኦባ ካልያ ግሾ ታራ ኤቀቶሶና።
21 ጎዳዉ፥ ታና የጎፋ፤
ታ ፆሳዉ፥ ታፐ ሃኮፋ።
22 ታና አሽያ ታ ጎዳዉ፥
ታና ማዳናዉ ኤለሳ።