49
መቶ ዎደይ ያሸና
ቆረ ናይት ዛማረታ ሀላቃስ ፃፍዳ ማዝሙረ
1 አሳ ኡባይ ሀይሳ ስእተ፤
ቢታ ቦላ ደኤይሳቶ፥
ኡባይ ሀይሳ ሀይዝተ።
2 ꬎቃይ ዝቃይ፥
ዱረይ ማንቆይ ስእተ።
3 ታ ዎዛና ቆፋይ አኬካ እሜስ፤
ታ ዶናይ ጭንጫተꬃ ቃላ ኦደቴስ።
4 ታ ሀይꬃ ሌምሶኮ ዛራና፤
ዲꬅ ዲፃሸ፥ ታ ቃንእሽያ ብርሻና።
5 መቶ ጋላሳይ ያ ዎደነ ጭምያ ሞርከት፤
ታና ተቅያ ዎደ ታ አይስ ባባይና?
6 ባንታ ሻሉዋን አማነተይሳታነ
ባንታ ዱረተꬃን ጬቀትያ
ታ ሞርከታ አይስ ባባይና?
7 አይ አስካ ባና ዎዛናዉ፥
ዎይኮ ባ ሸምፑዋ ጋትያ
ፆሳስ ቃንፃናዉ ዳንዳኤና።
8 አሳ ሸምፖ ጋተይ ዳሮ አልኦ፤
አይ ጋተ ቃንፅንካ ግደና።
9 እ ሀይቆናዳነ ዱፎ ገሎናዳ፥
ዎይኮ እ ሀይቆናዳ ኦꬃናዉ ጋከና።
10 ኤያትነ ፓꬆና አሳት ሀይቀይሳዳ፥
ጭንጫት ባንታ ሻሉዋ
ሀራታስ የግድ በይሳ አሳ ኡባይ በኤስ።
11 ኤንቲ ባንታ ቢታ ባንታባ ጊኮካ፥
ዱፎይ መርናዉ ኤንታዉ ኬ ግዳና።
12 አስ አይ ግታትኮካ ባ ግታተꬃራ ካንና፤
እ ዶአዳ ሀይቄስ።
13 ባንታርካ ባንታ ሁጰን አማነተይሳታ ቃዳይነ
ኤንቲ ግዳባ ቱማ ግያ ኤያታ ዉርሰꬃይ ሀይሳ።
ሳላሀ
14 ሹካስ ጊገትዳ ዶርሳታዳ፥
ሀይቆይ ኤንታ ዱፎ ካለꬄስ።
ሱረት ኤንታ ዱፉዋ ቦላራ ሄመታና፤
ኤንታ አሳተꬃይ ዱፎን ዎቃና፤
ኬꬃፈ ከይድ ሃክድ ስኦለን አታና።
15 ሽን ፆሳይ ታ ሸምፑዋ ዎዛና፤
እ ታና ሀይቆ ዎልቃፈ አሻና።
ሳላሀ
16 አስ ዱረትያ ዎደነ
እያ ቦንቾይ ዳርያ ዎደ ያዮፋ።
17 እ ሀይቅያ ዎደ አይኮካ ኤክድ ቤና፤
እያ ሻሎይ እያራ እስፈ ዱፎ ገለና።
18 አስ ፓፃ ደእያ ዎደ ታዉ ኩምስ ጊኮ፥
ኡባባይ እያዉ እንጀትዳ ግሾ ጋላተትኮካ፥
19 ስሚድ ፖኦ በኦና፥
ባ ማይዛታን ጋሄቴስ።
20 ኤራተꬅ ባይና ዱረትዳ አስ
ዶአዳ ጮ ꬋያና።