ዶሎሀፐ ዉሎሀ ጋካናዉ ቢታ ኡባ ፄጌስ።

ፅዮነፐ ፆሳይ ፖኤስ።

ኤፅያ ታማይ እያ ስንꬃና፤

ዎልቃማ ጎተይ እያ ዩሹዋና።

ሳሎታነ ሳኣ ፄጌስ።

ታ ጌሻታ ታኮ ሺሽተ” ያግስ።

ሳሎት እያ ፅሎተꬃ አዋጆሶና።

እስራኤለ አሳዉ፥ ታ ነ ቦላ ማርካታና፤

ታኒ ፆሳይ፥ ነ ፆሳ።

ነ ፁሳ ያርሹዋ ግሾ፥

ነና ቦርከ።

ነ ግርብያፈ ኮለ ኤካናዉ ኮይከ።

ሙኩሉ ዙማ ቦላ ደእያ መሄትካ ታሳ።

ደንባን ደእያ መተꬃት ታይሳታ።

ሳእነ ሳአን ኩምዳባ ኡባይ ታባ።

ዎይኮ ዴሻታ ሱꬃ ኡያናዬ?

ኡባፈ ꬎቃ ፆሳስ ነ ቃንገꬃ ጋꬃ።

ታ ነና አሻና፤ ነካ ታና ቦንቻና” ያጌስ።

“ታ ህግያ ነ ናባባናዉ ነዉ አይ ማት ደኢ?

ዎይኮ ታ ጫቁዋ ነ ዶናን ቆንጭሳናዉ ነዉ አይ ማት ደኢ?

ታ ቃላ ጉየ የጋዳሳ።

ላይማተይሳታ ማባራን ገላዳሳ።

ነ እንፃርሳይ ዎርዶ ሃሳያ ሜዘትስ።

ነ አየ ናኣ ቦላ ኢታባ ኦደታዳሳ።

ታኒ ስእ ግዳ ግሾ

ታና ነ መላ ጋዳ ቆፓዳሳ።

ሽን ሀእ ታ ነና ሀንቃና፤

ነ ናጋራ ነ ስንꬃን ታይባና።

ሄስ ሀኖና እፅኮ ታ ህንተና መንረꬃና፤

ሄ ዎደ ህንተና አሻናይ ባዋ።

ባ ኦግያ ሱርስዳ አሳስ

ታኒ ፆሳ አቶተꬃ በሳና” ያጌስ።