58
ፆሳይ ሳአ ኡባ ፕርዳና
ዳዊቲ ዛማረታ ሀላቃስ ፃፍዳ ዎሳ
“ꬋይሶፋ” ጌተትያ ዲꬃ ጩꬃን የፀትዳ ዎሳ
1 ደርያ ሃረይሳቶ፥ ቱማ ህንተ ልከ ኦደቴቲ?
አሳ ኡባስ ፅሎ ፕርዴቲ?
2 ግደና፥ ህንተ ዎዛናን ኢታባ ሀልቼታ፤
ህንተ ኩሸይ ቢታ ቦላ ጌላባ ኦꬄስ።
3 ኢታ አስ አየ ኡሎፐ ዶምድ ሀሌስ፤
የለትዳ ጋላሳፐ ዶምድ፥
ባሌስነ ዎርዶ ኦደቴስ።
4 ኤንቲ ሾሻዳ ዪሻራ ደኦሶና፤
ኤንቲ ቱለ ጎፐዳ ስኦኮና።
5 ብተይስ አይ ጭንጫ ግድኮካ፥
ጎፐይ እያ ፄስ ስኤና።
6 አቤት ፆሳዉ፥ ጋሞ አች ዳንያ ኤንታ አቻ መንꬃ፤
ጎዳዉ ኤንታ ሳክልያ ꬉካ።
7 ኤንቲ ጉክዳ ሃꬅ ግዶ፤
ባንታ ዶንግያ ዱክያ ዎደ፥
ዶንገ ቶራ አይፈይ ꬋዮ።
8 ኤንቲ ማይድ ꬋይያ ꬋ ሳሶዳ ሀኖ፤
አየ ኡሎፐ ሀይቅድ ዎꬍያ፥
አዋ ፖኦ በኦና ቦሻዳ ሀኖ።
9 ኤንቲ አጉንꬅ ግድድ ዳያናፐ ካሰ፥
ኤንቲ ቡሮ ፑቶ ግድድ ደእሽን፥
ኤንታ ባ ሀንቁዋን ꬋይሳና።
10 ናጋራንቾታ ቦላ ሀሎ ከይያ ዎደ ፅሎት ኡፋይታና፤
ኢታታ ሱꬃን ባንታ ቶሁዋ ሜጨታና።
11 ሄ ዎደ አሳይ፥
“ቱማ ፅሎታስ ዎይቶይ ደኤስ፤
ሳአ ቦላ ፕርድያ ፆሲ ደኤስ” ያጋና።