59
ፆሳዉ ታና ታ ሞርከታፐ አሻ
ዳዊቲ ዎꬋናዉ እያ ኬꬃ ናጋና መላ ሳኦል አሰ ኪትን፥ ዳዊቲ ዛማረታ ሀላቃስ ፃፍዳ ዎሳ
“ꬋይሶፋ” ጌተትያ ዲꬃ ጩꬃን የፀትዳ ዎሳ
1 አቤት ታ ፆሳዉ፥ ታ ሞርከታፐ ታና አሻ፤
ታ ቦላ ደንደይሳታፐ ታና ናጋ።
2 ኢታ ኦይሳታፐ ታና አሻ፤
ሱꬁ ጉስያ አሳታፐ ታና አሻ።
3 አቤት ጎዳዉ፥ ኤንቲ ታና ዎꬋናዉ
ዙግድ ናገይሳ በአ።
አቤት ጎዳዉ፥ ታ ናቁዋ ግሾ
ዎይኮ ታ ናጋራ ግሾ
ግዶናሽን ጮ ታ ቦላ ቶቦሶና።
4 ታ አይ ባላካ ኦꬆና ታና ቆሀናዉ ጊግዶሶና፤
ሄሳ በአ፤ ታና ማዳናዉ ደንዳ።
5 አቤት ኡባፈ ዎልቃማ ፆሳዉ፥ ጎዳዉ፥
እስራኤለ ፆሳዉ፥ ካዎተꬃታ ኡባ ፕርዳናዉ ባርካ፤
ኢታ ኦይሳታ ማሮፓ።
ሳላሀ
6 ኤንቲ ካታማ ግዶን ዩይሸ ፔእድ፥
ካናꬆ ላውሸ ስሞሶና።
7 ኤንታ ዶናፐ ከየይሳ በአ፤
ኤንታ እንፃርሳይ ማሻ መላ፤
አስ ኤንታና ስኤይሳ ቆፖኮና።
8 ሽን አቤት ጎዳዉ፥ ነ ኤንታ ቦላ ሚጫሳ፤
ካዎተꬃታ ኡባ ለቅሳሳ።
9 ፆሳዉ፥ ነ ታ ሚፃ ግድያ ግሾ፥
ታ ነ ዎልቃን አማነታይስ።
10 ታ ፆሳይ ባ ሲቁዋን ታኮ ያና፤
ታ ፆሳይ ታ ሞርከታ ፆነተꬃ ታና በሳና።
11 ታ አሳት ዶጎና መላ ነ ኤንታ ዎꬎፓ።
አቤት ጎዳዉ፥ ኑ ጎንዳልያዉ፥
ነ ዎልቃን ኤንታ ላላነ ካዉሻ።
12 ኤንታ ዶናፐ ከይያ ናጋራ ግሾ
ኤንታ እንፃርሳፈ ፑልትያ ቃላ ግሾ፥
ባንታ ኦቶሩዋን ኦይከቶ፤
ኤንታ ባደꬃነ ዎርዱዋ ግሾ፥
13 ነ ሀንቁዋን ኤንታ ꬋይሳ፤
ኤንታ ኩመꬅ ድጋ።
ሄሳን ፆሳይ ያይቆባ ዘረꬃ ሃረይሳነ
ሳኣ ጋፃ ጋካናዉ ሃረይስ ኤረታና።
ሳላሀ
14 ኤንቲ ካታማ ግዶን ዩይሸ ፔእድ፥
ካናꬆ ላውሸ ስሞሶና።
15 ኤንቲ ምያባ ደማናዉ ቶይላቶሶና፤
ካሎና አትዳ ላውያ ካና ግዶሶና።
16 ሽን ታኒ ነ ዎልቃ ሳባና፤
ዎንታ ነ ሲቁዋ የፃና።
ኔኒ ታዉ ታ ዋይያ ጋላስ፥
ታ ባቃታ አትያ በሰነ ሚፃ።
17 አቤት ታዉ ዎልቃ ግድዳ ፆሳዉ፥
ታ ነና ሳባና።
ታ ቆሰታዳ አትያ በሳይነ
ሲቁዋ ታና በሲያ ፆሳይ ነና።