ጌሻ ማፃፋ ማዝሙረ ማፃፋ 60

ኑ ሞርከታፐ ኑና አሻ

ማሰጰፆመንነ ሶባላን ደእዳ አራመ አሳራ ኦለትዳ ዎደነ እዮኣብ ጉየ ስሚድ ማፅነ ዛንጋራን ታማነ ናምኡ ሙኩሉ ኤዶመ አሳ ዎꬍዳ ዎደ ዳዊቲ ዛማረታ ሀላቃስ ፃፍዳ ዎሳ

“ጪሻ ጩ” ጌተትያ ማርካተꬃ ዎሳ

1 አቤት ፆሳዉ፥ ነ ኑና አጋዳሳ፤

ኑና መንርꬃዳሳ።

ነ ኑና ሀንቀታዳሳ፤

ሽን ሀእ ኑና ዛራ፥ ምንꬃ ኤሳ።

2 ነ ቢታ ቃꬃዳሳነ ዛእሳዳሳ፤

ቢታይ ኮኮርያ ግሾ፥ ነ እያ ዛኡዋ ኩንꬃ።

3 ኔኒ ነ አሳ መቶ በሳዳሳ፤

ኑና ጋንድጋርስያ ዎይነ ኡሻዳሳ።

4 ነዉ ያየይሳት ባንታ ሞርከ ዶንገፈ

አታና መላ ማላ እማዳሳ።

ሳላሀ

5 ነ ሲቀይሳት አታና መላ፥

ነ ኡሻቻ ኩሸን

ኑና አሻ፤ ኑና አላ።

6 ፆሳይ ባ ጌሻ በሳን ሀይሳዳ ያግስ፤

“ታኒ ፆናዳ ሴከማ ቢታ ሻካና፤

ሱኮታ ዛንጋራ ዋꬋና።

7 ጋላድ ታባ፤ ምናሰይካ ታሳ፤

ኤፍሬም ታ ሁጰ አሽያ ብራታ ቆቤ፤

ይሁድ ታ ካዎታ ፃምኣ።

8 ሞአበይ ታ ሜጨትያ ከረ፤

ኤዶመይ ታባ ግደይሳ ኤርሳናዉ፥

ታ ጫማ እያ ቦላ ዎꬃይስ፤

ታኒ ፍልስፄመ ፆናዳ ገሬራይስ” ያግስ።

9 ግምበትዳ ካታማኮ ታና ኦነ ኤፋናይ?

ኤዶመ ጋካናዉ ታና ኦነ ካለꬃናይ?

10 አቤት ፆሳዉ፥ ኑና አግዳይ ነና ግድኪ?

አቤት ፆሳዉ ኔኒ ኑ ኦላንቾታራ ኦላስ ከያካ።

11 አሳ ማዶይ ፓꬆና ግሾ፥

ሞርከታራ ኦለታናዉ ነ ኑና ማዳ።

12 ፆሳ ዎልቃን ኑ ሞርከታ ፆናና፤

እ ኑ ሞርከታ የꬋና።