እያ እፀይሳት እያ ስንꬃፈ ባቃቶ።

ሙቃድ ታማን ትልኤይሳዳ፥

ኢታት ፆሳ ስንꬃፈ ꬋዮ።

ፆሳ ስንꬃን ኡፋይቶ፤

ኡፋይሳን እልሎ።

ሻራን በይሳስ ኦገ ከስተ፤

እያ ሱንꬃይ ጎዳ፤ እያ ስንꬃን ኡፋይትተ።

ይኦታስ አዋ፤ አምኤታስ ዳይና።

ቃሾ ኬꬃን ደኤይሳታ ብርሽድ፥ ዱረተꬃን ዎꬄስ፤

ሽን ማካላንቾት ቃቃ ቢታን ደኦሶና።

ነ ኤንታራ መላ ቢታ ካንꬅዳ ዎደ፥

እስራኤለ ፆሳ ቆንጨꬃን

ቢታይ ቃፅስ፤ ሳሎይ እራ እሚስ።

ላድዳ ቢታ ዛራዳ ኦራꬃሳ።

አቤት ፆሳዉ፥ ነ ኬሀተꬃን ማንቆታስ

ኮሽያባ ጊግሳዳ እማዳሳ።

ዳሮ ማጫሳት ሄ ኪታ ማርካትዶሶና።

ባቃትድ ጉየ ስምዶሶና፤

ሶን አትዳ ማጫሳት ድኦ ሻከትዶሶና።

ብራፐ መትዳ ሆለ ምስለ ድእድ ደምያ ዎደ

ህንተ ዶርሳ ከለን አይስ ዝንእደት?

ፃልሞና ዙማ ቦላ ሻቻ ቡክስስ።

ዳሮ ፄር ደእያ ባሳነ ዙማዉ፥

ፆሳይ ዶርዳ ዙማ

ህንተ አይስ ቃናትድ ፄሌቲ?

ጎዳይ እያን መርናዉ ዳና።

ታሙ ሙኩሉ ቶሆ ታሙ ሙኩላን ታይበቴስ፤

ጎዳይ ሲና ዙማፐ ባ ጌሻ በሳ ይስ።

አሳፐ፥ ሀር አቶሽን ማካላንቾታፐ እሞ ኤክስ፤

ጎዳይ ፆሳይ ያን ዳና።

ፆሳይ ኑና አሸይሳ።

ሀይቆፐ አሽያ ፆሳይ እያ።

ናጋራ ኦገን ሄመትያ አሳ፥

ብናናን ካመትዳ ኤንታ ሊጵያ መንꬃና።

ባሳነፐ ዛራዳ ኤሀና፤

ታ ኤንታ ጪሞ አባፈ ከሳዳ ጉየ ኤሀና።

ነ ካናትካ ሞርከ ሱꬃፈ ባንታ ግሹዋ ላጫና መላሳ” ያጌስ ጎዳይ።

ታ ፆሳይ ታ ካዎይ ሳልፐይ፥

ፆሳ ኬꬅ ገልያ ዎደ ኡባስ በንቴስ።

ቃስ ካራቦ ባቅያ ጌላኦት ግዶና።

ህንተኖ፥ እስራኤለ አሳዉ፥ ጎዳ ጋላትተ” ያጎሶና።

ብንያመ ኮቻይ ኮይሮ ታይበቶሶና።

ዉርሰꬃን ዛብሎና ሀላቃትነ

ንፍታለመ ሀላቃት ታይበቶሶና።

ካሰ ነ ኑስ ኦꬅዳይሳዳ፥

ነ ምኖተꬃ በሳ።

ነ ኬꬃ ካዎት ይድ፥

ነዉ እሞታ እማና።

ቦሩነ ማራ ዉደ ዳንያ ካዎተꬃታ ነ ሀንቀታ።

ኔኒ ኤንታ ሴራ፤ ኦለታናዉ ዬሞትያ አሳታ ላላ።

ቶጰይ ባ ኩሽያ ፆሳኮ ምጫና።

ፆሳስ የፅተ።

ባ ዎልቃማ ግርሳን ባ ጉንꬃ ስሰይሳስ የፅተ።

እያ ግታተꬃይ እስራኤለ ቦላና፤

እያ ዎልቃይካ ሳሎና።

እስራኤለ ፆሳይ ባ አሳስ

ምኖተꬅነ ዎልቃ እሜስ።