አቤት ፆሳዉ፥ ታና አሻ።

ጪሞ ሃꬃ ግዶ ገላስ፤

ሃꬃ ዙለይ ታ ቦላራ አꬍስ።

ታ ኮቶኖይ መልስ።

ታ አይፈይ ተልጁምስ።

ታ ሁጰ ብናናፐ ዳሮ፤

ꬋይሳናዉ ኮየይሳት ዳሮ፤

ታ ካይሶቶናባ ዛራ ግዶሶና።

ታ ባላይ ኔፐ ጌምቤና።

ነና ኡፋይሳን ናገይሳት

ታ ጋሶን ዬላቶፖ።

ነና ምንꬅድ ኮየይሳት

ታ ጋሶን ካዉዮፎ።

ታ ሶምኦይ ዬላ ማእዳይ ነ ግሾሳ።

ታ አየ ናይታስ አላጋ ግዳስ።

ታና ታማዳ ፁጌስ፤

ነና ጫይያ ጫሻይ ታ ቦላ ዎꬍስ።

ታና ጫይዶሶና።

ኤንታዉ ካሳስ አታስ።

ማꬆተይሳት ታባ የꬅ ከስዶሶና።

አቤት ፆሳዉ፥ ነ ዶስያ ዎደ፥

ነ መርና ሲቁዋን፥

ነ አቶተꬃን ታዉ ዛሮ እማ።

ታ ሞርከታፐ ታና አሻ፥

ጪሞ ሃꬃን ምተተꬃፈ ታና አሻ።

ጪሞ ሃꬃይ ታና ምቶፎ፤

ዝቃ ኦላይ ባ ዶና ታ ቦላ ጎርዶፎ።

ታዉ ዛሮ እማ፤

ነ ግታ ማሮታን ታኮ ስማ።

ታኒ ኡንአን ደእያ ግሾ

ታዉ ኤለ ዛሮ እማ።

ታ ሞርከታፐ ታና ላአ ከሳ።

ካዉሻተꬃ ነ ኤራሳ፤

ታ ሞርከታ ኡባ ነ በኣሳ።

ታዉ ቃትያ አስ ኮያስ።

ታና ምንꬅያ አስ ፄላስ፤ ሽን በንትቤና።

ታ ሳሙዋስ ጫላ ኡሽ እምዶሶና።

ኤንታ ያርሾይ ኤንታዉ ፅሄ ግዶ።

ኤንታ ዞኮይ ኩኖ።

ሱልያ ነ ሸነይ ኤንታ የደꬆ።

ኤንታ ዱንካንያን ደእያ አስ ꬋዮ።

ነ ማዱንፅስዳይሳታ ኤንቲ ዬሶሶና።

ነ ማሮተꬃፈ ኤንታ አይብካ ጋኮፎ።

ፅሎ አሳራ ማዝጋበቶፎ።

አቤት ፆሳዉ፥ ታና አሻዳ፥

ሳሮ በሳን ዎꬃ።

ጋላታ እሞን እያ ግታያና።

ዎይኮ ካጫማ ኮርማ ያርሾፈ፥

አꬍድ፥ ጎዳ ኡፋይሴስ።

ህንተኖ፥ ፆሳ ኮየይሳቶ፥

ህንተ ዎዛናይ ምነቶ።

ቃሾ ኬꬃን ደእያ ባ አሳ ካና።

እያ ግዶን ደእያ ዎፅ ቃፅያ ኡባይ ጎዳ ጋላቶ።

ይሁዳ ካታማ ዛሪድ ኬፃና፤

አሳይ ያን ዳናነ ቢታይካ ኤንታባ ግዳና።

እያ ሱንꬃ ዶሰይሳት ያን ዳና።