71
ታኒ ዳቡርያ ዎደ ታና አጎፋ
1 ጎዳዉ፥ ታኒ ኔኮ ባቃታዳ አትያ ግሾ፥
አዉደካ ታና ዬላዮፓ።
2 ነ ፅሎተꬃን ታና ናጋ፤
ነ ሀይꬃ ታኮ ዛራ፤ ታና አሻ።
3 ኔኒ ታ ኡባ ዎደ ጌማዳ አትያ ዛላ
ታኒ ጌማዳ አታና መላ ምኖ ሚፃ ግዳ፤
ኤ፥ ኔኒ ታ ዛላነ ታ ሚፃ።
4 ታ ፆሳዉ፥ ኢታታ ኩሸፐነ፥
ቃይ ባይና አሳታፐ ታና አሻ።
5 አቤት ጎዳዉ፥ ታ ናአተꬃፈ ዶማዳ፥
ኔኒ ታ ኡፋይሳነ ታ አማነተꬃ።
6 ታ የለትዳ ዎደፐ ዶማዳ ነናን ዘምፓስ፤
ታ አየ ኡሎፐ ታና ከስዳይ ነና፤
ታኒ ኡባ ዎደ ነና ጋላታና።
7 ኔኒ ታ ቆሰታዳ አትያ በሲ ግድዳ ግሾ፥
ታ ደኦይ ዳሮ አሳስ ሌምሶ ግድስ።
8 ጋላሳ ኡባን ታ ዶናይ
ነ ጋላታንነ ነ ቦንቹዋን ኩምስ።
9 ታኒ ጭምዳ ዎደ ታና የጎፋ፤
ታ ዎልቃይ እፅዳ ዎደ ታና አጎፋ።
10 ታ ሞርከት ታ ቦላ ቶቦሶና፤
ታና ዎꬋናዉ ኮየይሳት ታ ቦላ ማቀቶሶና።
11 ኤንቲ፥ “ፆሳይ እያ አግስ፤ የደꬅድ ኦይኮስ፤
እያ አሻናይ ኦንካ ባዋ” ያጎሶና።
12 ፆሳዉ፥ ታፐ ሃኮፋ
ታ ፆሳዉ፥ ታና ማዳናዉ ኤለሳ።
13 ታና ሞተይሳት ዬላትድ ꬋዮ፤
ታና ቆሀናዉ ኮየይሳት፥
ዬላነ ካዉሸ ማኦ።
14 ሽን ታኒ ኡባ ዎደ ኡፋይሳን ነና ናጋና፤
ዛራ ዛራዳካ ነና ጋላታና።
15 ነ ኦꬅዳባ ታ ታይባናዉ ፆነትኮካ፥
ታ ዶናይ ጋላስ ኡባን ነ ፅሎተꬃነ
ነ አቶተꬃባ ኦዳና።
16 ታኒ ኡባ ሃርያ ጎዳ ዎልቃን ያዳ፤
ነ ፃላላ ፅሎ ግደይሳ አዋጃና።
17 ፆሳዉ፥ ኔኒ ታ ናአተꬃፈ ዶማዳ ታና ታማርሳዳሳ፤
ሀእካ ነ ማላልስያ ኦሱዋ ታ ኦዳና።
18 ፆሳዉ ነ ዎልቃነ ነ ምኖተꬃን
ያ የለታ ኡባስ ኦዳና ጋካናዉ፥
ታኒ ጭማዳ ፑሉምኮካ ታና አጎፋ።
19 ፆሳዉ፥ ነ ፅሎተꬃይ ሳሎ ጋክስ፤
ግታባ ኦꬅዳ ፆሲ፥ ነ መል ኦኔ?
20 ኔኒ ታ ቦላ ዳሮ መቶ ኤሀዳሳ፤
ግዶሽን ታ ደኡዋ ዛራዳ ኦራፅሳዳሳ፤
ኔኒ ታና ቢታ ጋርሳፈ ከሳዳሳ።
21 ኔኒ ታ ቦንቹዋ ዳርሳዳሳ፤
ታና ዛራዳ ምንꬃዳሳ።
22 ታ ፆሳዉ፥ ነ ቱማተꬃ ግሾ፥
ታ ነና ዲꬃን ጋላታና።
አቤት እስራኤለ ጌሻዉ፥
ታ ነና ማስንቆን ሳባና።
23 ታ መተርሻይ ኡፋይሳን ꬎቁ ኦꬅድ የፄስ፤
ኔኒ ታና አሽዳ ግሾ ታኒ ነና ሳባና።
24 ታና ቆሀናዉ ኮየይሳት ዬላትዳ ግሾነ
ካዉይዳ ግሾ ታ እንፃርሳይ ነ ፅሎ ማዱዋባ
ጋላስ ኡባን ኦዳና።