72
ኡፋይሳን ናገትያ ካዋ
ሶሎሞነ ማዝሙረ
1 ፆሳዉ፥ ነ ሱረ ፕርዳ ካዋስ፥
ነ ፅሎተꬃ ካዋ ናኣስ እማ።
2 እ ነ አሳስ ፅሎተꬃን ፕርዳና፤
ቆሄትዳይሳታስ ሱረን ዳይናታና።
3 ደረት ዱረተꬅ፥
ዙማት ፅሎተꬃ አይፈ ነ አሳስ አይፎ።
4 ካዎይ ቆሄትዳይሳታ ግሾ ሞተቶ፤
ማንቆታ አሾ፤ ኡንኤይሳታ መንꬆ።
5 ፆሳዉ፥ እ አዋዳነ አጌናዳ ደኦ፤
የለተꬃፈ የለተꬃ ጋካናዉ ደኦ።
6 ካዎይ ጎሻን ቡክያ እራ መላነ
ቢታ ካልስያ ፑሰ እራ መላ ግዶ።
7 እያ ላይꬃ ኡባን ፅሎ አሳት ዳዮ፤
አጌን ꬋያና ጋካናዉ ሳሮተꬅ ዳሮ።
8 አባፈ አባ ጋካናዉ፥
ኤፍራፂሳ ሻፋፐ ሳኣ ጋፃ ጋካናዉ እ ሃሮ።
9 ባዞን ደእያ አሳት እያ ጎይኖ፤
እያ ሞርከት ባና ላጮ።
10 ታርሰሳነ ዩሾይ አባን ተቀትዳ ቢታታ፥
ካዎት እያዉ ጊራ ጊሮ፤
አራበነ ቶጰ ካዎት እያዉ እሞታ ኤሆ።
11 ካዎት ኡባይ እያዉ ጉልባቶ፤
ካዎተꬃት ኡባይ እያዉ ኪተቶ።
12 እያኮ ዋስያ ማንቆታ፥ ቆሄትዳይሳታነ
ማዶይ ባይናይሳታ እ አሻና።
13 ማንቆታስነ ዳቡራንቾታስ እ ቃቴስ፤
ማንቆታ ሸምፑዋ ሀይቆፐ አሼስ።
14 ኤንታ ሱꬃይ እያ ስንꬃን አልኦ ግድያ ግሾ፥
እ፥ ኤንታ ቆሆፐነ ኢታፐ ዎዛና።
15 ካዎይ ዳሮ ላይꬅ ጋምኦ፤
አራበ ቢታ ዎርቃይ እያዉ ዮ።
አሳይ እያ ግሾ ኡባ ዎደ ዎሶ፤
ጋላስ ኡባን እ አንጀቶ።
16 ቢታን ካꬅ ፓላሆ፤
ደረት ካꬃን ካመቶ።
ልባኖሰ ደርያ ቦላ ካꬅ አይፍያዳ አይፎ፤
ደንብ ማታን ኩምያዳ አሳይ ካታማ ኩሞ።
17 ካዋ ሱንꬃይ መርናዉ ደኦ፤
አዋዳ ኡባ ዎደ ፄገትሸ ጋምኦ።
አሳ ኡባይ እያ ባጋራ አንጀታና፤
ካዎተꬃት እያ “አንጀትዳይሳ” ያጋና።
18 ማላልስያባ ባርካ ኦꬅያ ጎዳይ፥ ፆሳይ
እስራኤለ ፆሳይ ጋላተቶ።
19 እያ ቦንቾ ሱንꬃይ መርናዉ ጋላተቶ፤
እያ ቦንቾይ ሳአ ኡባ ኩሞ።
አምንእ! አምንእ!
20 እሰየ ናኣ ዳዊታ ዎሳይ ሀይሳን ፖለትስ።