ሄꬓንꬆ ማፃፋ
73
(ማዝ 73—89)
ፆሳይ ታዉ ምኖተꬅነ ግሾ
አሳፋ ማዝሙረ
1 ቱማ ፆሳይ እስራኤለስ ሎኦ፤
ዎዛና ጌሻታስ እ ኬሀ።
2 ሽን ታ ቶሆይ ꬉበታናዉ ጉꬁ አትስ፤
ታ ታንጎይ ሀልፃናዉ ማትስ።
3 ሄስ ሀንዳይ ኢታ አሳትነ ኦቶራንቾት፥
ዱረትሽን ታኒ በአዳ ቃናትዳ ግሾሳ።
4 ኤንታ ዋየይ ጋኮና ግሾ፥
ኤንታ አሳተꬃይ ፓያነ ምኖ።
5 ኤንቲ ሀራ አሳዳ ዋየቶኮና፤
ሀራ አሳዳ መቶን ሾጨቶኮና።
6 ሄሳ ግሾ፥ ኦቶሮይ ኤንታዉ ቆ አሌቆ መላ፤
ቡቀꬅ አፍላዳ ማእዶሶና።
7 ኤንታ ዎዛናይ ኢታባ ፑልቴስ፤
ኤንታ ቆፋይ ኢታ ሀልቾን ኩምስ።
8 ኤንቲ ቀልቅሶሶና፤ ኢታባ ሃሳዮሶና፤
ባንታ ኦቶሩዋን ሀራታ ኡንኤꬆሶና።
9 ባንታ ዶና ፆሳ ቦላ ዶዮሶና፤
ባንታ እንፃርሳ አሳ ቦላ አዱሶሶና።
10 ሀር አቶሽን፥ ፆሳ አሳይ ኤንታኮ ስማና፤
ኤንቲ ኦድያባ ኤሶን አማናና።
11 ኤንቲ፥ “ፆሲ አይኮ ኤሪ?
ኡባፈ ꬎቃ ፆሳስ ኤራተꬅ ደኢ?” ያጎሶና።
12 ህዛ ኢታት ሀይሳ መላ፤
ኡባ ዎደ እንጀትን ደኦሶና፤
ኤንቲ ጉጅ ጉጅ ዱረቶሶና።
13 ህዛ ታኒ ታ ዎዛና ጌሻተꬃን ናግዳይ፥
ፅሎተꬅ በሳናዉ ታ ኩሽያ ሜጨትዳይ መላ።
14 ጋላሳ ኩመꬅ ታኒ መቶን ሾጨታስ፤
ዎንታ ዎንታ ሴረታስ።
15 ታኒ ኢታ አሳታዳ ኦደትዳኮ፥
ነ አሳስ አማነቶና አታናሽን።
16 ታኒ ሀ ኡባ ኤራናዉ ቆፕያ ዎደ፥
ታዉ ዴፆ ግድስ።
17 ሄስካ ታኒ ፆሳ ኬꬃ ገላና ጋካናዉነ
ኢታ አሳታ ዉርሰꬃ ቃዳ አኬካና ጋካናሳ።
18 ቱማ ኔኒ ኤንታ ሀልፅያ በሳን ኡትሳዳሳ፤
ኤንቲ ኩንድድ ꬋያና መላ ኦꬃሳ።
19 ኤንቲ ኤለስድ ꬋይዶሶና፤
ዳጋማን እሶይ አቶና ዉርዶሶና።
20 አሙሆይ ባርክያ ዎደ ባለተይሳዳ፥
አቤት ጎዳዉ፥ ኔኒ ደንድያ ዎደ፥
ኤንቲ ዶገታና።
21 ታኒ ይሎትዳ ዎደነ
ታ ዎዛናን ጫመትዳ ዎደ፥
22 አኬኮና ኤያ አስ ግዳስ፤
ነ ስንꬃን መሄ ግዳስ።
23 ሽን ታኒ ኡባ ዎደ ኔራ ደአይስ፤
ታ ኡሻቻ ኩሽያ ኔኒ ኦይካዳሳ።
24 ነ ዞርያን ታና ካለꬃሳ፤
ዉርሰꬃን ታና ቦንቾን ኤካሳ።
25 ታዉ ሳሎን ኔፐ አትሽን፥ ሀር ኦን ደኢ?
ታኒ ኔፐ አትሽን፥ ሳአን ሀራ አሞትከ።
26 ታ ዎልቃይነ ታ ዎዛናይ ዳቡራናዉ ዳንዳኤስ፤
ሽን ፆሳይ ታ ዎዛና ምኖተꬃነ
መርናዉ ታና ጋክዳ ሳማ።
27 ኔፐ ሃከይሳት ꬋያና፤
ነና ካደይሳታ ኡባ ነ ዉርሳና።
28 ሽን ታዉ ፆሳኮ ሺቆይ ሎኦ፤
እያ ኦሶ ኡባ ታኒ ኦዳና መላ፥
ኡባ ሃርያ ጎዳ ቆሰትድ አትያ በሰ ኦꬃስ።