74
ፆሳዉ ነ ግሾ ሞተታ
አሳፋ ትምርተ
አኬካን ፃፍዳ ግንፆ
1 ፆሳዉ ኔኒ ኑና አይስ መርናዉ አጋዲ?
ነ ቆሩዋን ደእያ ነ ዶርሳታ ቦላ
ነ ሀንቆይ አይስ ኤፅዴ?
2 ኔኒ በን ዶርዳ አሳ፥
ነዉ ቡዞ ኦꬃዳ ዎዝዳ ኮቻታ ሀሳያ፤
ኔኒ ደእዳ ፅዮነ ዙማ ቆፓ።
3 ላለትዳ ነ ኬꬃ ያዳ ፄላ፤
ሞርከት ያን ደእያባ ኡባ ꬋይስዶሶና።
4 ነ ሞርከት ነ ኬꬃን፥
“ኑ ፆንዳ” ያግድ ገሬርዶሶና።
ፆኖ ማላታ ግድዳ ባንታ ባንድራ ኤስዶሶና።
5 ኤንቲ ምꬅ ቃንፃናዉ ዎራ ግዶን ኤቅድ፥
ባንታ ካልታ ደንꬅዳ አሳታ ዳኖሶና።
6 ኤንቲ ኩሸ ሂላን አሌቅዳ ኦሶታ ኡባ፥
ባንታ ካልታንነ ናርቃን መንረꬅዶሶና።
7 ነ ኬꬃ ታማን ፁግድ ꬋይስዶሶና፤
ነ ሱንꬃይ ፄገትያ በሳ ቱንስዶሶና።
8 ባንታ ዎዛናን፥ “ኑ ኩመꬅ ꬋይሳና” ያግዶሶና፤
ቢታን ደእያ አስ ፆሰ ጎይንያ በሳታ
ታማን ፁግዶሶና።
9 ሄ ዎደ ማላት ኑስ እመተና፤
ናበይካ ዴና።
ሄስ አዉደ ጋካናዉ ጋምአነኮ፥
ኤርያ አስ ኑ ግዶን ባዋ።
10 ፆሳዉ፥ ነ ሞርከት አዉደ ጋካናዉ፥
ነ ቦላ ቀልቅሳኔ?
ኤንቲ ነ ሱንꬃ መርናዉ ጫያኔ?
11 ነ ኡሻቻ ኩሽያ አይስ ሺሻ ኤካይ?
ነ ኡሻቻ ኩሽያ ነ አፍላ ግዶፈ
ከሳዳ ኤንታ ꬋይሳ።
12 ግዶሽን፥ አቤት ፆሳዉ፥
ኔኒ በንፐ ታ ካዋ፤
ነ ዳሮ ዎደ አሻዳሳ።
13 ነ ግታ ዎልቃን አባ ሻካዳሳ፤
እያ ግዶን ደእያ ዶኣ ሁጰታ ዶንጫዳሳ።
14 ሌዋታነ ጌተትያ ዳውያ ሁጰታ ዶንጫዳ፥
እያ አሹዋ ባዞን ደእያ መተꬃታስ
ካꬅ ኦꬃዳ እምዳይ ነና።
15 ኔኒ ፑልቶታ ዶያ የዳዳሳ፤
ኡባ ዎደ ጎግያ ሻፋታ መልሳዳሳ።
16 ጋላሳይ ነባ፤ ቃማይካ ነባ፤
አዋነ አጌና ኤንታ በሳን ዎꬅዳይ ነና።
17 ቢታስ ዛዋ ዎꬅዳይ፥
ባልጎነ ቦነ መꬍዳይ ነና።
18 አቤት ጎዳዉ፥ ነ ሞርከት ነና ዋት ቀልቅስዳኮ፥
ኤያ አሳት ነ ሱንꬃ ዋት ጫይዳኮ ሀሳያ።
19 ነ ሆልያ ሸምፑዋ ዶኣስ አꬃዳ እሞፋ፤
መቶታንቾታ መርናዉ ዶጎፓ።
20 ኑ ቢታን ደእያ ꬉማ በሲ ኡባይ
ማካላንቾታን ኩምዳ ግሾ፥
ነ ኑስ ጫቅዳ ጫቁዋ ቆፓ።
21 ቆሄትዳይሳታ ዬላዮፓ፤
ማንቆትነ መቶታንቾት ነ ሱንꬃ ጋላቶ።
22 አቤት ፆሳዉ፥ ደንዳ፤ ሞተታ፤
ጋላስ ኩመꬅ ኤያት ነና ቀልቅሰይሳ ሀሳያ።
23 ነ ሞርከት ነ ቦላ ዋስያ ዋሱዋነ
ነና እፀይሳት ጬቀትያ ጬቁዋ አኬካ።