75
ፆሳይ ሱረ ፕርዳና
አሳፍ ዛማረታ ሀላቃስ፥ “ꬋይሶፋ” ጌተትያ ዲꬃ ጩꬃን የፅዳ ማዝሙረ
1 አቤት ፆሳዉ፥ ነዉ ጋላታ እሞስ፤
ነ ሱንꬃይ ማታ ግድያ ግሾ ነና ጋላቶስ፤
አሳይ ነ ማላልስያ ኦሱዋ ኦዶሶና።
2 ፆሳይ ሀይሳዳ ያጌስ፤
“ታኒ ፕርዳ እምያ ዎደ ዶራስ፤
ሱረ ፕርደይ ታና።
3 ቢታይነ እያን ደእያ ኡባይ ቃፅኮካ፥
እያ ቱሳ ምንꬃ ኤሰይ ታና።
ሳላሀ
4 ታኒ ኦቶራንቾታ፥ ‘ኦቶርቶፍተ’፤
ኢታታ፥ ‘ህንተ ካጭያ በሶፍተ።’
5 ‘ህንተ ካጭያ ሳሎ ደንꬆፍተ፤
ቆ ቃꬅድ ሃሳዮፕተ’ ” ያጋና።
6 ቦንቾይ ዶሎሀፐ ዎይኮ ዉሎሀፐ
ዎይኮ መላ ቢታፈ ዬና።
7 ሽን ሱረ ፕርደይ ፆሳ፤
እ እሱዋ ቦላ ፕርዴስ፤ ሀንኩዋ ሻትንꬄስ።
8 ፆሳ ኩሸን እስ ዋንጭ ደኤስ፤
ሄ ዋንጫይ ፆሳ ሀንቆ
ዎይነ ኡሻን ኩምድ ኡትስ።
እ ሄ ኡሻፈ ትግን፥
ሳአን ደእያ ኢታ አሳት ሄሳ ኡያና፤
ኤንቲ ኦርጩዋ አሾና ፂጵድ ኡያና።
9 ሽን ታኒ ያይቆባ ፆሳባ ኦዳና፤
እያ መርናዉ ሳባና።
10 እ፥ ኢታ አሳታ ካጭያ መንꬃና፤
ሽን ፅሎታ ካጨይ ꬎቁ ꬎቁ ጋና።