ታ ዶናፐ ከይያ ቃላ ሀይዝድ ስእተ።

በንፐ ጌምዳ ፁራ ቆንጭሳና።

ኑ አዋት ኑስ ኦድዳይሳታ ኦዳና።

ጎዳስ በሲያ ጋላታ፥

እያ ዎልቃነ ማላልስያ እያ ኦሱዋ፥

ያና የለታስ ኦዳና።

እስራኤለ አሳስ ህግያ እሚስ።

ሄ ህግያ ታማርሳና መላ ኪትስ።

ኤንታ ናይትካ ባንታ ናይታስ

ቡሮ የለታና ናይታስ ኤርሳናሳ።

እ ኦꬅዳባ ባሎኮና፤ እያ ኪታ ናጋና።

ጌላነ አማነቶና የለታ፥

ፆሳን ምንድ ኤቀና የለታ ግዶኮና።

ኦላ ጋላስ ጉየ ስምዶሶና።

እያ ህግያን ሄመቶና እፅዶሶና።

እ በስዳ ማላታ ዶግዶሶና።

ፆኣነ ደንባን ማላታ ኦꬅስ።

ሃꬃ ሻክድ ያን ሀን ጎዳዳ ኤስስ።

ቃማ ታማ ፖኦን ካለꬅስ።

አባዳ ዳሮ ሃꬅ ኤንታ ኡሽስ።

ሻፋ ሃꬃዳ ጎግስስ።

ኡባፈ ꬎቃ ፆሳ ቦላ መላ ቢታን ማካልዶሶና።

ፆሳ ኤርሸ ፓጭዶሶና።

“መላ ቢታን ፆሳይ ኑስ ካꬅ ጊግሳናዉ ዳንዳኢ?

ሻፋ ሃꬅ ጎግስ፤

ሽን እ ኑስ ካꬅ እማናዉ ዳንዳኢ?

ዎይኮ ባ አሳስ አሾ እማናዉ ዳንዳኢ?” ያግዶሶና።

ያይቆባ ኮቻታ ቦላ ታም ኤፅስ፤

እስራኤለ ቦላ እያ ሀንቆይ ዳርስ።

ዎይኮ እያ አሹዋን አማነትቦኮና።

ሳሎ ፐንግያ ዶይስ።

ሳሎ ካꬃ ኤንታዉ እሚስ።

ፆሳይ ኤንታዉ ምያባ ዳርስድ እሚስ።

ባ ዎልቃን ዱገሀ ጫርኩዋ ደንꬅስ።

ፓልያ ካፎታ አባ ጋፃ ሻፈዳ ቡክስስ።

ዱንካንያ ዩሾን ዎꬍስስ።

ምድ ባንታ ጋንጅያ ጋꬅዶሶና።

አሾይ ኤንታ ዶናን ቡሮ ደእሽን፥

ኤንታ ግዶፈ ዎልቃማ አሳታ ዎꬍስ፤

እስራኤለፐ ናአተꬃታ ꬉክስ።

ዳሮ ማላታ ኦꬅንካ አማንቦኮና።

ኤንታ ላይꬃታ ዳጋማን ኦንግስ።

እያ ኮይዶሶና፥

ባንታ ናጋራ ፓፅድ እያኮ ስምዶሶና።

ኡባፈ ꬎቃ ፆሳይ ኤንታ ዎዘይሳ፥

ግደይሳ ሀሳይዶሶና።

ባንታ ዶናን ጭምዶሶና።

እያ ጫቁዋስ አማነቶኮና።

ኤንታ ꬋይስቤና።

ባ ጋዱዋ ኩመꬅ ኤንታ ቦላ የድቤና።

ከይድ ስሞና ሸምፖ ግደይሳ አኬክስ።

መላ ቢታን እያ አፑን ቶሆ ላንጭስዶና!

እስራኤለ ጌሻ ይሎይዶሶና።

ኡንኤꬅያ አሳፐ ዎዝዳ ዎልቃ ዶግዶሶና።

ፆኣነ ደንባን ኦꬅዳ

ማላልስያ ኦሱዋ ሀሳይቦኮና።

ሄሳ ግሾ፥ ግብፀ አሳይ ሻፋታፐ

ኡያናዉ ዳንዳእቦኮና።

ኤንታ ቢታ ꬋይስያ ሾታ ኪትስ።

ኤንቲ ዳቡርዳ አይፍያ ቦለስ እሚስ።

ኤንታ ባላስያ ጫርኮን ꬋይስስ።

ኤንታ ዶርሳታ ዳዳን ዉርስስ።

ባ ሱልያ ሀንቁዋ፥ ይሉዋ፥ እፁዋነ

ጋዱዋ ኤንታ ቦላ የድስ።

ኤንታ ꬋዮስ አꬅድ እሚስ፤

ኤንታ ሀይቆፐ አሽቤና።

ካማ ዱንካነን ኮይሮ ናይታ ዎꬍስ፤

ዉደዳ መላ ቢታን ሄምስ።

ሽን ኤንታ ሞርከታ አባይ ምትስ።

ባ ኡሻቻ ኩሸን ፆንድ ኦይክዳ ዙማ ቦላ ኤህስ።

ኤንታ ቢታ እስራኤለ ኮቻታስ ላታ ኦꬅድ ሻክስ፤

ባ አሳስ ኤንታ ኬꬃ እሚስ።

እያ ፓጭዶሶና፤ እያ ህግያ ኪተትቦኮና።

ምንድ ኤቆና አስ ግድዶሶና፤

ዎበ ቶራዳ ዎራ ዎꬍዶሶና።

ባንታ ኤቃታራ እያ ቃናትስዶሶና።

እስራኤለ ኡባ ካꬍስ።

አሳ ግዶን እ ደእያ ባ ዱንካንያ አግስ።

ማላታ ግድዳ ታቦትያ

ሞርከታ ኩሸን አꬅድ እሚስ።

ኤንታ ማሻስ አꬅድ እሚስ።

ጌላኦት አዝና ገሎና አትዶሶና።

ኤንታ ማቸት ዬኮና መላ ድገትዶሶና።

ዎይነ ኡሻ ማꬆይ አꬍዳ አሳዳ ሀንስ።

ኤንታ መርናዉ ዬላይስ።

ኤፍሬማ ኮቻ ዶርቤና።

እ ዶስያ ፅዮነ ደርያ ዶርስ።

ሳአዳ መርናዉ ኤስስ።

ዶርሰ ሄምያ በሳፈ ኤክስ።

ባ አሳ ያይቆባ፥

ባ ላታ እስራኤለ ሄንꬃናዉ ኤህስ።

ባ ጭንጫተꬃን ካለꬅስ።