79
ጎዳዉ፥ አዉደ ጋካናሴ?
አሳፋ ማዝሙረ
1 ፆሳዉ፥ አይሁደ ግዶና አሳይ፥
ነ ቢታ ቦላ ደንድዶሶና፤
ነ ጌሻ ኬꬃ ቱንስዶሶና፤
የሩሳላመ ላልዶሶና።
2 ነ አይለታ አሀ ሳሎ ካፎታስ፥
ነ ጌሻታ አሹዋ ሳአ ዶአታስ እምዶሶና።
3 ኤንታ ሱꬃ የሩሳላመ ዩሾን
ሃꬃዳ ጉስዶሶና፤
ኤንታ አሀ ሞግያ አስ ꬋይስ።
4 ኑ ሾሮታስ ኑኒ ሚቻስ፥
ኑ ሄራን ደእያ አሳስ ቀልቅሰꬃስ አትዳ።
5 ጎዳዉ፥ ሄስ አዉደ ጋካናዉ ሀናኔ?
ኔኒ ኑ ቦላ መርናዉ ሀንቀታዲ?
ነ ሀንቆይ ታማዳ ኤፅሸ ዳነዬ?
6 ነና ኤሮና ደረታ ቦላ፥
ነ ሱንꬃ ፄጎና ካዎተꬃታ ቦላ
ነ ሀንቁዋ ዛራ።
7 ሄስካ ኤንቲ ያይቆባ ምዳ ግሾነ
ኤንቲ ደእያ በሳ ꬋይስዳ ግሾሳ።
8 ኑኒ ዳሮ መቶትዳ ግሾ፥
ኑ ማይዛታ ኢታተꬃ ኑ ቦላ ታይቦፓ፤
ኤሶን ነ ማሮታ ኑስ ኪታ።
9 አቤት ኑና አሽያ ፆሳዉ፥
ነ ቦንቾ ሱንꬃ ግሾ ኑና ማዳ።
ነ ሱንꬃ ግሾ ኑና አሻ፤
ኑ ናጋራ አቶ ጋ።
10 ደረት፥ “ኤንታ ፆሳይ አዉን ደኢ?” አይስ ጋኔ?
ነ አይለታ ሱꬃ ኤንቲ ጉስዳ ግሾ፤
ኔኒ ሀሎ ከየይሳ ኑ ፄልሽን፥
ኤንታ ግዶን ቆንጭሳ።
11 ቃሾ አሳ ኦለይ ነ ስን ጋኮ፤
ሀይቆ ፕርደትዳይሳታ
ነ ዎልቃ ግታተꬃን አሻ።
12 ጎዳዉ፥ ኑ ሾሮት ነና ቶችዳ ግሾ፥
ላፑን ኩሸ ሀሎ ከያዳ ኤንታ ክኦን እድንꬃ።
13 ሄ ዎደ ኑኒ ነ አሳይ፥ ነ ዶርሳት፥
መርናዉ ነና ጋላታና።
የለተꬃፈ የለተꬃ ጋካናዉ፥
ነ ፔሻ ኦዳና።