ኦይዳንꬆ ማፃፋ
90
(ማዝ 90—106)
መርናዉ ደእያ ፆሳ
ፆሳ አስ ግድዳ ሙሰ ዎሳ
1 ጎዳዉ፥ ኔኒ የለታፐ የለታ ጋካናዉ፥
ኑኒ ደእያ በሲ ግዳዳሳ።
2 ደረት መታናፐ ካሰ፥
ሳእ ኦሰታናፐ ካሰ፥
መርናፐ መርና ጋካናዉ ነ ፆሰ።
3 ኔኒ፥ “አሳ ናይቶ፥ ጉየ ቢታኮ ስምተ” ያጋዳ፥
ኤንታ መትዳ ቢታኮ ጉየ ዛራሳ።
4 ሙኩሉ ላይꬅ ዝነ አꬍዳ ጋላሳ መላ፤
ዎይኮ እስ ቃማ ግዶን እስ ሳተ መላ።
5 ኔኒ አሳ ቆፖና ድኦዳ ኤፋሳ፤
ኤንቲ አሙሆ መላ፤
ዎንታ ዎንታ ዶልያ ማታ መላ።
6 ማት ዎንታ ድጭድ ጭዬስ፤
ኦማርስያ ዎደ ሹልድ መሌስ።
7 ኑኒ ነ ይሉዋን ዉርዳ፤
ነ ሀንቁዋ ሱሎን ዳጋምዳ።
8 ኑ ኢታ ኦሱዋ ነ ስንꬃን ዎꬃዳሳ፤
ኑ ጌምዳ ናጋራ ነ ሶምኡዋ ፖኡዋን ዎꬃዳሳ።
9 ኑ ጋላሳ ኡባይ ነ ሀንቁዋን አꬍስ፤
ኑ ላይꬃ ኦለን ዉርሶስ።
10 ኑ ደኦ ላይꬃይ ላፑን ታማ፤
ዎይኮ ዳርኮ ሆስፑን ታማ።
ሄስካ መቶይነ ዋየይ ኩምዳይሳ፤
ኑ ላይꬃይ ኤሶን ዉሬስ፤ ኑካ ኤሶን አꬎኦስ።
11 ነ ሀንቁዋ ዎልቃ ኤረይ ኦኔ?
ነ ሀንቁዋ ሱሎይ ዎልቃማ።
12 ኑ ላይꬃ ማራ ኦገን ኑ ጎኤታና መላ፥
ኑና ጭንጫተꬅ ታማርሳ።
13 ጎዳዉ፥ ነ ሀንቆይ አዉደ ጋካናሴ?
ሀያና ነ አይለታስ ቃታ።
14 ኑ ላይꬃ ኡባን
ኑ ኡፋይታናዳነ የፃናዳ፥
ዎንታ ዎንታ ነ ሲቁዋ ኑና ካልሳ።
15 ነ ኑና መቶꬅዳ ጋላሳታ ኬና፥
ኑኒ ኡንኤትዳ ላይꬃታ ኬና ኑና ኡፋይሳ።
16 ኑስ ነ አይለታስ ነ ኦሶይ ቆንጮ፤
ነ ቦንቾይ ኤንታ ናይታስ በንቶ።
17 ጎዳ ኑ ፆሳ ኬሀተꬃይ ኑ ቦላ ግዶ፤
ኑ ኩሸ ኦሶ ኡባ ኑስ አይፍሳ፤
ኤ፥ ኑ ኩሸ ኦሶ ኡባ አይፍሳ።