91
ፆሳ ናጎ
1 ኡባፈ ꬎቃ ፆሳን ናገትድ ደኤይ፥
ኡባፈ ዎልቃማ ፆሳ ኩያን አቄስ።
2 እ ጎዳ፥ “ኔኒ ታዉ ሚፃነ ቆሰታ አትያ በሲ፥
ኔኒ ታና አማንꬅያ ታ ፆሳ” ያጋና።
3 እ ነና ሻንካንቾታ ፅሄፐ፥
ዎꬍድ ኦንግያ ጋዶፐ አሻና።
4 እ ባ ባለታን ነና ካማና፤
እያ ቀፍያ ጋርሳን ኔኒ ቆሰታዳ አታና፤
እያ አማነተꬃይ ነዉ ጎንዳለነ ካተ።
5 ኔኒ ቃማ ዳጋንꬅያባስ፥
ዎይኮ ጋላስ ፆንገትያ ቶራስ ያያካ።
6 ኔኒ ꬉማን ኦይክያ ሀርገ፥
ዎይኮ ጋላሳ ሴታን ኦንግያ ጋዶ ህርጋካ።
7 ሙኩላይ ነ ምየን፥
ታሙ ሙኩላይ ነ ኡሻቻን ኩንዳና፤
ሽን ነና አይብካ ቦቸና።
8 ኢታት ሴረትሽን፥
ኔኒ ነ አይፈ ፃላላን በአና።
9 ኔኒ ጎዳ ነዉ ቆሰታዳ አትያ በሲ ኦꬅዳ ግሾነ፥
ኡባፈ ꬎቃ ፆሳ ነ ደእያ በሲ ኦꬅዳ ግሾ፥
10 ኢታባይ ነና ቦቸና፤
ጋዶይ ነ ኬꬃኮ ሺቀና።
11 ነ ኦገ ኡባን ነና ናጋና መላ፥
ፆሳይ ባ ኪታንቾታ ኪታና።
12 ነ ቶሆይ ሹቻን ꬉበቶና መላ፥
ኪታንቾት ባንታ ኩሸን ነና ደንꬃና።
13 ኔኒ ጋሞነ ሾሻ ቦላ ሄመታና፤
ዎዳላ ጋሞነ ኢታ ሾሻ የꬋና።
14 ፆሳይ፥
“እ ታና ሲቅዳ ግሾ ታኒ እያ አሻና፤
ታ ሱንꬃ ኤርያ ግሾ ታኒ እያ ናጋና።
15 እ ታና ፄግያ ዎደ ታኒ እያዉ ኮያና፤
መቶ ዎደ ታኒ እያራ ግዳና፤
ታኒ እያ አሻናነ ቦንቻና።
16 ታኒ እያ ላይꬃ አዱሳና፤
ታ አቶተꬃ እያ በሳና” ያጌስ።