96
ፆሳ ጌሻተꬃን ጎይንተ
1 ጎዳስ ኦራꬃ ማዝሙረ የፅተ፤
ሳአን ደእያ አሳ ኡባይ ጎዳስ የፅተ።
2 ጎዳስ የፅተ፤ እያ ሱንꬃ ሳቢተ፤
እያ አሹዋ ጋላስ ጋላስ ኦድተ።
3 ካዎተꬃታ ግዶን እያ ቦንቹዋ፥
አሳ ኡባ ግዶን እያ ማላልስያ ኦሱዋ አዋጅተ።
4 ጎዳይ ግታ ግድያ ግሾ እያዉ ግታ ጋላቲ በሴስ፤
ፆሳታ ኡባፈ አꬍድ ያየታናዉ በሴስ።
5 ሀራ ካዎተꬃታ ፆሳት ኡባይ ኤቃታ፤
ሽን ጎዳይ ሳሎታ መꬍዳ ፆሳ።
6 ቦንቾይነ ሳብ እያ ዩሾን ደኤስ፤
ምኖተꬅነ ፑላተꬅ እያ ኬꬃን ደኤስ።
7 ቢታን ደእያ አሳ ዛረ ኡባይ ጎዳባ ኦድተ፤
ቦንቾይነ ዎልቅ ጎዳባ ጊተ።
8 እያ ሱንꬃስ በሲያ ቦንቹዋ ጎዳስ ኤህተ፤
ያርሾ ኤክድ እያ ዳባባ ገልተ።
9 እያ ጌሻተꬃ ቴሙዋን ጎዳ ጎይንተ፤
ቢታን ደእያ አሳዉ ኡባይ እያ ስንꬃን ኮኮርተ።
10 ካዎተꬃታ ግዶን፥ “ጎዳይ ካዎትስ!
ሳአይ ምንድ ኤቅስ፤ ቃፀና፤
እ አሳ ቦላ ሱረ ፕርዳና” ያግተ።
11 ሳሎት ኡፋይቶ፤ ሳእካ ሀሹ ጎ፤
አባይነ እያ ግዶን ደእያ ኡባይ ጉሞ።
12 ጎሻይነ እያን ደእያ ኡባይ ኡፋይቶ!
ዎራን ደእያ ምꬃ ኡባይ ኡፋይሳን የፆ።
13 ጎዳይ ያ ግሾ እያ ስንꬃን የፆ፤
እ ሳአ ቦላ ፕርዳናዉ ዬስ።
እ ሀ ሳኣ ቦላ ፅሎተꬃን፥
አሳ ቦላ ቱማተꬃን ፕርዳና።