16
ፆሳ ሀንቆይ ኩምዳ ፁአታ
1 ሄሳፈ ጉየ፥ ፆሳ ኬꬃፈ ላፑን ኪታንቾታኮ፥ “ብድ ፆሳ ሀንቁዋ ላፑን ፁአታፐ ሳአን ጉስተ” ያግድ፥ ኦድያ ዎልቃማ ቃላ ስአስ።
2 ኮይሮ ኪታንቾይ ብድ፥ ባ ፁአን ደኤይሳ ሳአን ጉስን፥ ዶኣ ማላይ ደኤይሳታ ቦላነ እያ ምስልያ ጎይንዳይሳታ ቦላ ኢታነ ዛምያ ማዱንꬅ ከይስ። ከሳ 9:10.
3 ናምአንꬆ ኪታንቾይ ባ ፁአን ደኤይሳ አባን ጉስን፥ አባይ ሀይቅዳ አሳ ሱꬅ ዳንስ። ቃስ አባን ደእያ መተꬃ ኡባይ ሀይቅስ።
4 ሄꬓንꬆ ኪታንቾይ ባ ፁአን ደኤይሳ ሻፋታንነ ፑልቶ ሃꬃታን ጉስን፥ ሃꬃት ሱꬅ ግድዶሶና። ከሳ 7:17. 5 ሄሳፈ ጉየ፥ ሃꬃ ቦላ ማት ደእያ ኪታንቾይ ሀይሳዳ ያግሽን ስአስ።
“ሀእካ በንካ ደእያ ጌሻዉ፥ ከሳ 3:14.
ሀይሳዳ ነ ፕርድዳ ግሾ ኔኒ ፅሎ።
6 ኤንቲ ጌሻታ ሱꬃነ ናበታ ሱꬃ ጉስዳ ግሾ፥
ኤንቲ ሱꬁ ኡያና መላ ኦꬃዳሳ።
ኤንቲ ባንታዉ በሲያባ ኤክዶሶና”
ያግስ። 7 ያርሾ በሳፈ፥
“ጎዳዉ፥ ኡባፈ ዎልቃማ ፆሳዉ፥
ነ ፕርዳይ ቱማነ ፅሎ”
ግያ ቃላ ስአስ።
8 ኦይዳንꬆ ኪታንቾይ ባ ፁአን ደኤይሳ አዋ ቦላ ጉስን፥ አዋይ ባ ሴላን አሳ ፁጋና መላ አዋስ ዎልቅ እመትስ። 9 አሳይ ዎልቃማ ሴላን ፁገትድ፥ ሄ ቦሻታ ቦላ ማት ደእያ ፆሳ ሱንꬃ ባድዶሶና፤ ባንታ ናጋራፐ ስሚድ ፆሳ ቦንችቦኮና።
10 እቻሻንꬆ ኪታንቾይ ባ ፁአን ደኤይሳ ዶኣ አራታ ቦላ ጉስን፥ ሄ ዶኣ ካዎተꬃይ ꬉምስ። አሳይ ኡንኣ ግሾ፥ ባንታ እንፃርሳ ሳፆሶና። ከሳ 10:21. 11 ቃስ አሳይ ኡንኣ ግሾነ ማዱንꬃ ግሾ፥ ሳሎ ፆሳ ባድዶሶና፤ ባንታ ኦꬅዳ ናጋራፐ ስምቦኮና።
12 ኡሱፑንꬆ ኪታንቾይ ባ ፁአን ደኤይሳ ግታ ኤፍራፂሳ ሻፋን ጉስን፥ ዶሎሀ ባጋፈ ያና ካዎታስ ኦገይ ጊጋና መላ ሃꬃይ መልስ። እሳ 11:15. 13 ሄሳፈ ጉየ፥ ሾ ዳንያ ሄꬑ ቱና አያናት ዳውያ ዶናፐ፥ ዶኣ ዶናፐነ ዎርዶ ናብያ ዶናፐ ከይሽን በአስ። 14 ኤንቲ ማላታታ ኦꬅያ ቱና አያናታ። ሄ ሄꬑ ቱና አያናት ኡባፈ ዎልቃማ ፆሳ ግታ ጋላሳን ሀናናዉ ደእያ ኦላስ ሺሻናዉ አላመ ካዎታ ኡባኮ ባና።
15 “ሄኮ፥ ታ ካይሶዳ ያና! አሳ ስንꬃን ካሎቶናዳነ ዬላቶናዳ ባርክድ፥ ባ ማኡዋ ናግያ ኡራይ አንጀትዳይሳ!” ያግስ። ማቶ 24:43.
16 ሄ ቱና አያናት ካዎታ እብራወꬆ ዶናን አርማገዶነ ጌተትያ በሳን ሺሽዶሶና። 2 ካዎ 23:29፤ ዛካ 12:11.
17 ላፑንꬃ ኪታንቾይ ባ ፁአን ደኤይሳ ጫርኮ ቦላ ጉስን፥ ፆሳ ኬꬃን ደእያ አራታፐ፥ “ፖለትስ” ግያ ዎልቃማ ቃላይ ይስ። 18 ሄሳፈ ዎልአንꬅ ዎልአምስ፤ ዳዳይ ꬉቅስ፥ ቢታይ ቃፅስ። አስ ሳአን መቶሳፐ ቢት ሄሳ መላ ቃፆ ቃፅቤና። ሄስ ኡባፈ አꬍዳ ቃፆ። ቆን 8:5፤ 11:13. 19 ግታ ካታማይ ሄꬓ ከይድ ሻከትስ፤ ቢታ ኡባን ደእያ ካታማት ꬋይዶሶና። ፆሳይ ግታ ካታማ ባብሎነ ቆፕድ፥ ባ ኢታ ሀንቆ ዎይነ ኡሻይ ኩምዳ ፁኣ እዉ እሚስ። እሳ 51:17. 20 ዩሾይ አባን ተቀትዳ ቢታት ꬋይዶሶና፤ ደረትካ በንትቦኮና። ቆን 6:14. 21 አሳ ቦላ ኦይታማነ እቻሹ ክሎ ግራመ መላ ዴፅያ ዎልቃማ ሻች ሳሎፐ ቡክስ። ቦሻይ ዳሮ ኢታ ግድያ ግሾ አሳይ ሻቻ ቦሻ ግሾ ፆሳ ባድዶሶና። ከሳ 9:23.