1 ያትን፥ ኑ ማይዛይ አብራሃመይ አይ ደምዴ? 2 አብራሃመይ ኦሶን ፅልዳባ ግድያኮ፥ እ ጬቀትያባይ ደኤስ፥ ግዶሽን፥ ፆሳ ስንꬃን ጬቀታናዉ ዳንዳኤና። 3 ጌሻ ማፃፋይ፥ “አብራሃመይ ፆሳ አማንስ፤ ፆሳይ ሄሳ እያዉ ፅሎተꬅ ኦꬅድ ኤክስ” ያጌስ። መ 15:6፤ ጋላ 3:6.

4 ኦꬅያ ኡራይ ኤክያ ዳሞዘይ፥ እያ ኦሶ ዎልቃስ ጭገትያ ጋተፐ አትሽን፥ እያዉ እሞታ ግደና። 5 ሽን ኦሶ ኦꬆና ኦንካ ናጋራንቹዋ ፅልስያ ፆሳ አማንኮ፥ እያ አማኖይ እያዉ ፅሎተꬅ ግድድ ታይበቴስ። 6 ጌሻ ማፃፋን ዳዊቲ፥ ኦሶይ ባይና ፆሳይ ፅልስያ አሳት አይ መላ አንጀትዳኮ ሀይሳዳ ያግድ ቆንጭሴስ፦

9 ያትን፥ ዳዊቲ ኦድዳ አንጆይ ቃፃረትዳ አሳ ፃላላሰዬ? ዎይኮ ቃፃረትቦና አሳሴ? ኑኒ፥ “ጌሻ ማፃፋይ፥ ‘አብራሃመይ ፆሳ አማንስ፤ ፆሳይ ሄሳ እያዉ ፅሎተꬅ ኦꬅድ ኤክስ’ ያጌስ” ግዳ። 10 ያትን፥ ሄስ አዉደ ሀንዴ? አብራሃመይ ቃፃረትነዬ? ዎይኮ ቃፃረቶና ደእሽኔ? ቃፃረታናፐ ስን ሀንስፐ አትሽን፥ ጉየ ግደና።

11 አብራሃመይ ቃፃረታናፐ ስን እያ አማኖይ እያዉ ፅሎተꬅ ግድድ ታይበትዳይሳ ኤርሳናዉ፥ እያ ቃፃሮይ ማላታ ግድስ። ሄሳ ግሾ፥ አብራሃመይ ቃፃረቶና አማነይሳታስነ አማኖን ፅለይሳታ ኡባስ አዋ ግድስ። መ 17:10. 12 እ ቃፃረትዳይሳታስካ አዋ። አብራሃመይ ኤንታዉ አዋ ግድዳይ ኤንቲ ቃፃረትዳ ግሾ፥ ፃላላስ ግዶናሽን፥ እ ቃፃረታናፐ ስን አማንዳ አማኑዋ ኤንቲ ካልዳ ግሾሳ።

13 አብራሃመስነ እያ ሼሻስ፥ “አላምያ ታ ህንተዉ እማና” ያግዳ ኡፋይሳይ፥ አብራሃመይ አማኖን ፅልዳ ግሾሳፈ አትሽን፥ ህገ ናግድ ፖልዳ ግሾ ግደና። መ 17:4-6፤ 22:17-18፤ ጋላ 3:29. 14 ህገስ ኪተትዳይሳት ፆሳይ እማና ግዳ ኡፋይሳ ላተይሳታ ግድኮ፥ አሳ አማኖይ ማደና፤ ፆሳ ኡፋይሳይ ሀዳ ግድስ። ጋላ 3:18. 15 ህገ መንꬆይ ፆሳ ሀንቆ ኤሄስ፥ ሽን ህገይ ባይናሶን ህገ መንꬆይ ባዋ።

16 ሄሳ ግሾ፥ ፆሳይ እምዳ ኡፋይሳይ አማኖን ኤከቴስ። ሀ ኡፋይሳይ አብራሃመ ሼሻ ኡባስ ፆሳ አꬎ ኬሀተꬃ ባጋራ እመትዳይሳ ቆንጭሴስ። ሄስካ ህገ ናገይሳታ ፃላላስ ግዶናሽን፥ አብራሃመዳ አማንዳ ኡባሳ። አብራሃመይ ኑ ኡባስ አዋ። ጋላ 3:7. 17 ጌሻ ማፃፋን፥ “ታ ነና ዳሮ ካዎተꬃታስ አዋ ኦꬃስ” ጌተትድ አብራሃመ ግሾ፥ ፃፈትስ። ሀ ኡፋይሳይ አብራሃመስ እመትዳይ ሀይቅዳይሳታስ ደኦ እመይስነ ኦራꬃባ ኦꬅያ ፆሳይ እያ ግደይሳ እ አማንዳ ግሾሳ። መ 17:5.

18 ፆሳይ አብራሃመስ ዳሮ ኮቸ እማናይሳ ጫቅስ። ኡፋይስ ኦꬃናዉ አይኮካ ዳንዳኤቶና ዎደ አብራሃመይ ፆሳን አማንዳ ግሾነ ኡፋይስ ኦꬅዳ ግሾ፥ ዳሮ ካዎተꬃታስ አዋ ግድስ። መ 15:5. 19 አብራሃመስ ፄቱ ላይꬅ ኩማና ሀንኮካ፥ ባ ዳቡርዳ አሳተꬃነ ሳራ ናአ የላናዉ ዳንዳኦናይሳ ኤርሸ ባ አማኑዋን ዳቡርቤና። መ 17:17.

20 ግዶሽን፥ እ ባ አማኑዋን ምንድ ፆሳስ ቦንቾ እሚስፐ አትሽን፥ ፆሳይ እምዳ ኡፋይሳ አማኖና እፅድ፥ ስꬍቤና። 21 አብራሃመይ፥ ፆሳይ ጫቅዳ ጫቁዋ ፖላናይሳ ባ ኩመꬃ ዎዛናን አማንስ። 22 ሄሳ ግሾ፥ ፆሳይ እያ አማኑዋ ፅሎተꬃን ታይብስ።

23 ሽን፥ “እያዉ ፅሎተꬃን ታይብስ” ግያ ቃላይ አብራሃመ ፃላላስ ፃፈትቤና። 24 ሄ ቃላይ ኑ ጎዳ የሱሳ ሀይቆፐ ደንꬅዳ ፆሳ አማንያ ኑስካ ኑ አማኖይ ፅሎተꬃን ታይበታና መላ ፃፈትስ። 25 ፆሳይ እያ ኑ ናጋራ ግሾ፥ ሀይቆስ አꬅድ እሚስ፤ እ ኑና ፅልሳናዉ ሀይቆፐ ደንድስ። እሳ 53:4-5.