1 ህዛ፥ ኑ አማኖን ፅልዳ ግሾ፥ ኑ ጎዳ የሱስ ክርስቶሳ ባጋራ ፆሳራ ኑስ ሳሮተꬅ ደኤስ። 2 ኑኒ እያ ባጋራ ሀእ ኑ ኤቅዳ አꬎ ኬሀተꬃ ግዶ አማኖን ገልዳ። ሄሳ ግሾ፥ ኑ ፆሳ ቦንቹዋ ሻከታናዉ ደእያ ኡፋይሳን ጬቀቶስ።

3 ሄሳ ፃላላ ግዶናሽን፥ መቶይ ዳንዳአ ኤሄይሳ ኑ ኤርያ ግሾ፥ ኑ መቱዋንካ ጬቀቶስ። 4 ቃስ ዳንዳአይ ገንጫ፥ ገንጫይ ኡፋይስ እመይሳ ኑ ኤሮስ። 5 ኑስ እምዳ ጌሻ አያና ባጋራ ፆሳይ ባ ሲቁዋ ኑ ዎዛናን ጉስዳ ግሾ ሄ ኡፋይሳይ ኑና ዬላየና።

6 ኑኒ ቡሮ ዳቡራንቾታ ግድድ ደእሽን፥ ፆሳ ዎደይ ጋክን፥ ክርስቶስ ናጋራንቾታ ግሾ ሀይቅስ። 7 ፅሎ አሳ ግሾ ሀይቃና አስ ደማናይስ ዳሮ መቶ፥ ሽን ኬሀ አሳ ግሾ ሀይቃና አስ ኦን ኤር በንቶና አገና። 8 ሽን ኑኒ ቡሮ ናጋራንቾ ግድድ ደእሽን፥ ክርስቶስ ኑ ግሾ ሀይቅስ። ሄስ ፆሳይ ኑና አይ መላ ሲቅያኮ እያ ሲቁዋ በሴስ። 9 ህዛ፥ ኑኒ ክርስቶሳ ሱꬃን ፅልዳባ ግድኮ፥ ኡባፈ አꬅድ እያ ባጋራ ፆሳ ሀንቁዋፈ አታና። 10 ኑኒ ፆሳራ ካሰ ሞርከ፥ ሽን እያ ናኣ ሀይቁዋን እያራ ስገትዳ። ሄሳፈ አꬅድ፥ ሀእ ኑኒ ፆሳራ ስገትዳፐ ጉየ፥ እያ ናኣ ደኡዋ ጋሶን ኑኒ አታና። 11 ሄሳ ፃላላ ግዶናሽን፥ ሀእ ኑና ፆሳራ ስገꬅዳ ኑ ጎዳ የሱስ ክርስቶሳ ባጋራ ኑ ፆሳን ጬቀቶስ።

12 አዳመ ባጋራ ናጋር ሀ አላምያ ገልስ። ሄ ናጋራ ባጋራ ሀይቆይ ይስ። አስ ኡባይ ናጋራ ኦꬅዳ ግሾ ሀይቆይ አሳ ዛረ ኡባ ጋክስ። መ 3:6. 13 ህገይ እመታናፐ ስን አላመን ናጋር ደኤስ፥ ሽን ህገይ ባይና ዎደ ናጋር ናጋራ ግድድ ታይበተና። 14 ሽን አዳመፐ ሙሰ ጋካናዉ ሀይቆይ አሳ ኡባ ሃርስ። ሀር አቶሽን፥ አዳመዳ ህገስ ኪተቶና እፅድ፥ ናጋራ ኦꬅቦናይሳታ ቦላካ ሀይቆይ ካዎትስ።

አዳመይ ያና የሱሳስ ሌምሶ። 15 ሽን ፆሳ አꬎ ኬሀተꬃይ አዳመ ናጋራ መላ ግደና። እስ አሳ ናጋራ ባጋራ ዳሮ አሳይ ሀይቅስ። ሽን የሱስ ክርስቶሳ ባጋራ ፆሳ አꬎ ኬሀተꬃይ አሳ ኡባስ ዳርድ እመትስ። 16 አዳመ ናጋራ ግዶንነ ፆሳ እሞታ ግዶን ዳሮ ዱማተꬅ ደኤስ። እስ አሳ ናጋራ ጋሶን ፆሳይ እያ ቦላ ፕርድስ። ሽን አሳይ ዳሮ ናጋራ ኦꬅንካ ፆሳ አꬎ ኬሀተꬃይ ፅሎተꬃ ኤህስ። 17 እስ አሳ ናጋራ ጋሶን ሀይቆይ አሳ ኡባ ቦላ ካዎትስ። ሽን የሱስ ክርስቶሳ ባጋራ ፆሳ አꬎ ኬሀተꬃነ ፅሎተꬃ እሞታ ኤክያ ኡባይ፥ ፆኖ ደኦን ደኦሶና።

18 ህዛ፥ እስ አስ ናጋራ ኦꬅዳ ጋሶን አሳ ኡባ ቦላ ፕርድ ይዳይሳዳ እስ አስ ፅሎ ኦꬅዳ ጋሶን፥ ፆሳይ አሰ ኡባ ፅልስድ ኤንታዉ ደኦ እሜስ። 19 እስ አስ ኪተቶና እፅዳ ጋሶን፥ ዳሮ አሳይ ናጋራንቾ ግድዳይሳዳ እስ አሳ ኪተተꬃን ዳሮ አሳይ ፅላና።

20 አሳይ ናጋራ ዎልቃ ኤራና መላ ህገይ ይስ፥ ሽን ናጋራ ዎልቃይ ዳርዳ ዎደ ፆሳ አꬎ ኬሀተꬃይ አꬍድ ዳርስ። 21 ናጋር ሀይቆ ዎልቃን ካዎትዳይሳ መላ ፆሳ አꬎ ኬሀተꬃይ ፅሎተꬃ ዎልቃን ካዎትድ፥ ኑ ጎዳ የሱስ ክርስቶሳ ባጋራ ኑና መርና ደኡዋኮ ካለꬄስ።