1 ፆሳ ሸነ ግዶናሽን ማት እመቶና ግሾነ ሀእ ደእያ ሹማትካ ፆሳ ሸነን ሹመትዳ ግሾ አስ ኡባይ ደርያ አይሰይሳታስ ኪተታናዉ በሴስ። 2 ሄሳ ግሾ፥ ማታራ ደኤይሳታስ ኪተቶና እፅያ ኦንካ ፆሳ ኪታ እፄስ። ኪተቶና እፅያ ኦንካ ባ ቦላ ፕርዳ ኤሄስ። 3 አይሰይሳት ኢታ ኦይሳታፐ አትሽን፥ ሎኦ ኦይሳታ ያሾኮና። አይሰይሳታስ ያዮና አጋናዉ ኮያይ? ያኮ ሎኦ ኦꬃ፤ ኤንቲ ነና ጋላታና። 4 ኤንቲ ነዉ ሎኦባ ኦꬃናዉ ሹመትዳ ፆሳ አይለ። ሽን ኔኒ ኢታባ ኦꬅኮ፥ ኤንቲ ኢታባ ኦꬅዳይሳ ሴርያ ግሾ እያዉ ያያ። ኤንቲ ኢታ ኦይሳታ ሴርድ፥ ፆሳ ሀንቁዋ ቆንጭስያ ፆሳ አይለ። 5 ሄሳ ግሾ፥ ፆሳ ሀንቁዋ ፃላላስ ግዶናሽን፥ ህንተ ካሀይ ማርካትያ ግሾ ደርያ አይሰይሳታስ ኪተታናዉ በሴስ።

6 ህንተ ጊራ ጊረይካ ሄሳሳ። ደርያ አይሰይሳት ሄ ኦሱዋ ኦይ፥ ኤንቲ ፆሳ አይለታ ግድዳ ግሾሳ። ማቶ 22:21፤ ማር 12:17፤ ሉቃ 20:25. 7 እሱዋስ እሱዋስ በሰይሳ እምተ። ጊራ ጊራናዉ በሰይሳስ ጊርተ፤ ቃራፃ ቃንፃናዉ በሰይሳስ ቃራፃ ቃንፅተ፤ ያያናዉ በሰይሳስ ያይተ፤ ቦንቾይ በሰይሳ ቦንችተ።

8 እሶይ እሱዋራ ሲቀትተ። ሲቆ አጮፐ አትሽን፥ ህንተ ቦላ ሀራ አጮይ ዶፖ። አሰ ሲቅያ ኦንካ ህገይ ገይሳ ፖልስ። 9 “ላሞፋ፤ ዎꬎፓ፤ ካይሶቶፓ፤ አሞቶፋ” ግያ ኪታይነ ሀራ ኪታ ኡባይ፥ “አሰ ነ ሁጰዳ ዶሳ” ግያ ኪታን ቃሸትስ። ከሳ 20:13-17፤ ዛረ 5:17-19፤ ሌወ 19:18. 10 አሰ ሲቅያ ኦንካ እያ ቦላ ኢታባ ኦና። ሄሳ ግሾ፥ አሰ ሲቀይስ ህገ ኪታ ፖልስ።

11 ꬍስኮፈ ህንተ ባርክያ ዎደይ ሀእ ግደይሳ አኬክድ ሄሳ ኦꬅተ። ኑ አታና ዎደይ ኮይሮ ኑ አማንዳ ዎድያፐ ሀእ ኑኮ ማትስ። 12 ꬉማ ዎደይ አꬋናዉ ሀኔስ፤ ዎንታይ ማትስ። ህዛ፥ ኑኒ ꬉማ ኦሶ አግድ ፖኦ ኦላ ሚሸ ኦይኮስ። 13 አነ ጋላስ ፖኦን ደእያ አሳዳ ማራን ደኦስ። ማꬆንነ ላይማተꬃራ ጋሄትያ ዱማ ዱማ ቱና ኦሶታን፥ *ላይማተꬃራ ጋሄትያ ዱማ ዱማ ቱና ኦሶታን፦ ዎይኮ የꬃን፥ ማꬆን፥ ላይማቶን፥ ቃይፀን ግዶፖ ግድ ብላናዉ ዳንዳኤቴስ። ላይማተꬃራ ጋሄትያ ዱማ ዱማ ቱና ኦሶት አስ ፆሳ ሃሮፐ ካረ ከይድ ዶአ ካንዶ ኤክድ ፖልያ ኦሶ ጉሱ። ፓላማንነ ቃናተን ግዶፖ። 14 ጎዳ የሱስ ክርስቶሳ ካንዱዋ ማእተ፤ ህንተ ናጋራንቾ አሳተꬃይ ባ አሙዋ ፖላና መላ እያዉ ቆፖፍተ።