ዛንጋራን ዶልያ ሱፈ ጪሻ መላ።

አጉንꬃ ግዶን በንትያ ሱፈ ጪሻ መላ።

ዎራን ደእያ አፕለ ምꬃ መላ።

እያ አይፈይ ምን ታና ማልኤስ።

ባ ሲቁዋ ባንድራዳ ታ ቦላ ꬎቁ ꬎቁ ኦꬅስ። 5 ታኒ እያ ሲቁዋን ኦይከታዳ ሀርግዳ ግሾ፥

ዛብበ አይፈ ሙዝድ ታና ጋሽትስተ፤

አፕለ ሙዝድ ታ ዎልቃ ምንꬅተ።

ባ ኡሻቻ ኩሽያን ታና ቆምስ።

ሲቆይ ባዉ ዶስድ ደንዳና ጋካናዉ፥

እያ ህንተ ባርከꬆና መላ፥

ታ ህንተና ገንኤንነ ዎራ ዎሽኤን አማታይስ።

ዙማ ቦላራ ፆንገትሸ የይስ ስኤቴስ።

ሄኮ፥ ኑ ኬꬃ ማታን ኤቅስ፤

ማስኮተራ ሶ ፄሌስ፤

ማጋራጁዋ ግዶራ ፄሌስ።

“ታ ሲቀ፥ ደንዳ!

ታ የገልሰ፥ ሃያ፥ እስፈ አነ ቦስ።

እራይካ ኤቅስ።

የꬅ የፅያ አጌናይ ጋክስ፤

ሆለ የꬅ ኑ ቢታን ስኤትስ።

ዎይነይ ጪይስ፤

ጪሻ ሳዎይ ቢታን ቶንኩ ጌስ።

ሃያ፤ አነ እስፈ ቦስ።”

ቆሰትዳ ሆለ ዳንያረ፤

አነ እስ ቶሆ ታና ነ ሶምኡዋ በሳ፤

ነ ግርሳ ስሳ።

ነ ሶምኦይ ዳሮ ሎኤስ።

ኑ ዎይነ ጋድያ ኢስያ ዎርካናታ፥

ሄ ጉꬃ ቡታለታ ፅሄን ኦይክተ።

ጪሻታ ግዶን እ ባ ዉድያ ሄሜስ።

ኩያይ ꬋያና ጋካናዉ፥

ታ ሲቁዋዉ፥ ገንኤዳ ዎይኮ ዎሽኤ ማራዳ፥

አፎትያ ደርያራ ዎፃሸ ሃ ስማ።