1 ሄሳፈ ጉየ፥ ታራ ሃሳያ ኪታንቾይ ስሚድ ይድ፥ ꬍስክዳ አስ ባርክያ መላ ታና ባርክስስ። 2 እ ታኮ፥ “ኔኒ አይ በአይ?” ያግስ።

ታኒ ዛራዳ፥ “ታኒ ዎርቃ ፃላላፐ ኦሰትዳ ፆምፐ ዎꬅያ ኮጫ በአይስ፤ እያ ፄራን ዛይተ ፃሮይ ደኤስ። ቃስ እያ ቦላ ላፑን ፆምፐት ደኦሶና፤ ሄ ላፑን ፆምፐታስ ላፑን ላፑን ፒቀት ደኦሶና። 3 ሄ ፆምፕያ ዎꬅያ ኮጫ ማታን ናምኡ ሻማሆ ምꬃት ደኦሶና። ኤንቲ ዛይተ ፃሩዋፐ ኡሻቻ ባጋራነ ሀድርሳ ባጋራ ደኦሶና” ያጋስ።

4 ታራ ሃሳያ ኪታንቹዋ፥ “ታ ጎዳዉ፥ ሀይስ አይቤ?” ያጋዳ ኦይቻስ።

5 ኪታንቾይ ዛሪድ፥ “ሀይሳቲ አይበኮ ኤርኪ?” ያግስ።

ታኒ ዛራዳ፥ “ታ ጎዳዉ፥ ታኒ ኤርከ” ያጋስ።

6 እ ታኮ፥ “ዛሩባበላስ ጎዳይ ኦድዳ ቃላይ ሀይሳ፤ ‘ታ አያናናፐ አትሽን፥ ዎልቃን ዎይኮ ምኖተꬃን ግደና’ ያጌስ ኡባፈ ዎልቃማ ጎዳይ። 7 ግታ ዙማዉ፥ ኔኒ አይቤ? ኔኒ ዛሩባበላ ስንꬃን ልች ግዳ ደምባ ግዳና። ዛሩባበል ፆሳ ኬꬃ ኬፅ ፖልድ፥ ዉርሰꬃ ሹቻ ከስያ ዎደ አሳይ፥ ‘ሀሹ! ሀሹ ፖለትስ’ ” ያጋና።

8 ቃስካ ጎዳ ቃላይ ታኮ ሀይሳዳ ያግድ ይስ። 9 “ፆሳ ኬꬃ ባሱዋ ዛሩባበላ ኩሸት ባስዶሶና፤ እያ ኩሸት ኬፅድ ፖላና። ሄሳፈ ጉየ፥ ኡባፈ ዎልቃማ ጎዳይ ታና ህንተኮ ኪትዳይሳ ህንተ ኤራና። 10 ሀ ጉꬃ ዶመꬃ ካꬍያ ኦንካ ጉየፐ ኡፋይታና፤ ኤንቲ ዛሩባበላ ኩሸን ቱምብያ በአና። ሀይሳቲ ላፑን ፆምፐት ቢታ ኡባ ዩይድ ፄልያ ጎዳ አይፈታ” ያግስ።

11 ታኒ ኪታንቹዋ ዛራዳ፥ “ሀ ፆምፐ ዎꬅያ ኮጫፐ ኡሻቻ ባጋራነ ሀድርሳ ባጋራ ደእያ ሀ ናምኡ ሻማሆት አይቤ?” ያጋዳ ኦይቻስ። 12 ጉጃዳካ፥ “ዛይተይ ኤንታፈ ጎግያ ናምኡ ዎርቃ ፒቀታ ማታን ደእያ ናምኡ ሻማሆ ምꬃ ታሸት አይቤ?” ያጋዳ ኦይቻስ።

13 እ ዛሪድ፥ “ሀይሳቲ አይበኮ ኔኒ ኤርኪ?” ያግስ።

ታኒ ዛራዳ፥ “ታ ጎዳዉ፥ ታኒ ኤርከ” ያጋስ።

14 እ ዛሪድ፥ “ሀይሳቲ ሳአ ኡባ ጎዳስ ኦꬅያ ናምኡ ትየትዳ አሳታ” ያግስ።