1 ቃስ ታኒ ꬎቁ ጋዳ ፄልያ ዎደ ቦላራ ፕራꬍያ እስ ፃꬃ ማፃፋ በአስ።

2 ኪታንቾይ ታና፥ “ኔኒ አይ በአይ?” ያግድ ኦይችስ።

ታኒ ዛራዳ፥ “ታኒ ቦላራ ፕራꬍያ እስ ፃꬃ ማፃፋ በአይስ፤ ሄ ማፃፋ አዱሳተꬃይ ላታሙ ዋꬋ ቃስ ጎምፓይ ታሙ ዋꬋ” ያጋስ።

3 እ ታኮ፥ “ሀ ፃꬃ ማፃፋ ግዶን ቢታ ኡባ ቦላ ያና ባደꬃይ ፃፈትስ። ሄ ማፃፋን እስ ባጋራ፥ ‘ካይሶ ኡባይ ቢታፈ ꬋያና’፤ ቃስ ሀንኮ ባጋራ፥ ‘ዎርዶን ጫቅያ ኡባይ ꬋያና’ ግያ ፁፈይ ፃፈትስ። 4 ‘ታኒ ሀ ባደꬃ ኪታና፤ ሄ ባደꬃይ ብድ፥ ካይሱዋ ሶነ ታ ሱንꬃን ዎርዶ ጫቀይሳ ሶ ገላና። ሄ ኬꬃ ገልድ ምꬃነ ሹቻ ꬋይሳና’ ” ያገስ ኡባፈ ዎልቃማ ጎዳይ።

5 ሄሳፈ ጉየ፥ ታራ ሃሳያ ኪታንቾይ ታኮ ይድ፥ “አነ ꬎቁ ጋዳ፥ ያባይ አይበኮ በአ” ያግስ።

6 ታኒ፥ “እ አይቤ?” ያጋዳ ኦይቻስ።

እ ዛሪድ፥ “ሀይስ ማክያ ዳቾ” ያግስ። ቃስ ጉጅድ፥ “ሀይስ አሳይ ሀ ቢታ ኡባን ኦꬅዳ ናቁዋ ማላታ” ያግስ።

7 እርሳሰ ጌተትያ ብራታፐ ኦሰትዳ ዳቹዋ ካማ ደንꬅያ ዎደ እስ ማጫስ ዳቹዋን ኡታሱ። 8 ኪታንቾይ፥ “ሀና ኢታተꬃ ሌምሶ” ያግስ። እዮ ጉየ ዳቹዋን የግድ እርሳሰ ካማ ዛሪድ ካምስ።

9 ሄሳፈ ጉየ፥ ታኒ ꬎቁ ጋዳ ፄልያ ዎደ ኤንታ ቀፍያን ጫርኮይ ደእያ፥ ፕራꬍያ ናምኡ ማጫሳታ በአስ። ኤንታ ቀፈይ ጎሎ ቀፈ መላ ምኖ፤ ኤንቲ ዳቹዋ ሳአፐ ድንꬅድ ኤክድ ፕራꬍዶሶና።

10 ታኒ ኪታንቹዋኮ፥ “ሀይሳቲ ዳቹዋ አዉ ኤፎና?” ያጋዳ ኦይቻስ።

11 እ ዛሪድ፥ “ኤንቲ እያዉ ኬ ኬፃናዉ ሳናኦራ ቢታ ኤፎሶና። ኬꬃይ ኬፀት ስምኮ ኤንቲ ሄ ዳቹዋ እያዉ ጊግዳ በሳን ዎꬃና” ያግስ።