1 ቃስ ታኒ ꬎቁ ጋዳ ፄልያ ዎደ ኦይዱ ፓራ ጋረት ናምኡ ናሰ ብራታ ደረታፐ ግዶራ የይሳታ በአስ። 2 ኮይሮ ጋርያ ዞኦ ፓራት ጎቾሶና፤ ናምአንꬆ ጋርያ ካሬꬃ ፓራት ጎቾሶና። 3 ሄꬓንꬆ ጋርያ ቦꬃ ፓራት ጎቾሶና፤ ኦይዳንꬆ ጋርያ ዋንጮ ፓራት ጎቾሶና። 4 ታኒ ኪታንቹዋኮ፥ “ታ ጎዳዉ፥ ሀይሳቲ አይቤ?” ያጋዳ ኦይቻስ።

5 ኪታንቾይ ዛሪድ፥ “ሀይሳቲ ቢታ ኡባ ጎዳ ስንꬃን ኤቅድ ኦꬅያ ኦይዱ ሳሎ ጫርኮታ። 6 ካሬꬃ ፓራት ጎችያ ጋረይ ፑደሀ ባጋ ቢታ ቤስ፤ ቦꬃ ፓራት ጎችያ ጋረይ ዉሎሀ ባጋ ቤስ፤ ዋንጮ ፓራት ጎችያ ጋረይ ዱገሀ ባጋ ቤስ” ያግስ።

7 ሄ ፓራት ቢታ ዎቻናዉ ከይዳ ዎደ ገደ ሃ ፓችፓሮሶና። ኪታንቾይ ኤንታኮ፥ “ብድ ቢታ ኡባ ዩይድ ዎችተ” ያግስ። ኤንቲ ብድ ቢታ ኡባ ዩይድ ዎችዶሶና። 8 ሄሳፈ ጉየ፥ ኪታንቾይ ባ ቃላ ꬎቁ ኦꬅድ፥ “ሄኮ፥ ፑደሀ ባጋ ቢታ ብዳ ፓራት ታ አያና ሄ ቢታን ሸምፕስዶሶና” ያግስ።

9 ጎዳ ቃላይ ታኮ ሀይሳዳ ያግሸ ይስ፦ 10 “ባብሎነ ድኤተꬃፈ ስምዳ ሄልዳይ፥ ፆበይነ ያዳይ እምያ ብራነ ዎርቃ እሞታ ኤካዳ ሄ ጋላስ ሶፎንያሳ ናኣ እዮስያሳ ሶ ባ። 11 ኤንታፈ ኤክዳ ብራፐነ ዎርቃፈ ካላቻ መꬋዳ እዮሳደቃ ናኣ፥ ካህነ ሀላቃ እያሱ ሁጰን ዎꬃ። 12 ኡባፈ ዎልቃማ ጎዳይ ሀይሳዳ ያጌስ ጋዳ እያዉ ኦዳ፦ ሄኮ፥ ታሸይ ባ በሳን ዳያ ግሾነ እ ፆሳ ኬꬃ ኬፅያ ግሾ፥ እያ ሱንꬃይ ‘ታሸ ጌተትዳ አደይ ሀይሳ። 13 ጎዳ ኬꬃ ኬፃናይ እያ፤ እ ካዎተꬃ ማኡዋ ማእድ፥ አራታን ኡትድ ሃራና። ቃስ እያ አራታ ማታን እስ ካህነይ ኤቃና፤ ኤንታ ናምኣ ግዶን እስፈተꬅ ዳና።’ 14 ሄ ካላቻይ ሄልዳያ፥ ፆቢያ፥ ያዳያነ ሶፎንያሳ ናኣ እዮስያሳ ቆፍሶ ግድድ፥ ጎዳ ፆሳ ኬꬃን ዳና” ያግስ።

15 ሄ ዎደ ሃሆ በሳን ደእያ አሳት ጎዳ ኬꬃ ኬፅድ ማዳናዉ ያና። ኡባፈ ዎልቃማ ጎዳይ ታና ህንተኮ ኪትዳይሳ ህንተ ሄሳን ኤራና። ጎዳስ፥ ህንተ ፆሳስ ህንተ ፖሎ ኪተትኮ ሄስ ሀናና።