1 ዳርዮስ ካዎትዳ ኦይዳንꬆ ላይꬃን፥ ክሲላ ጌተትያ ኡዱፉንꬆ አጌናን፥ ኦይዳንꬆ ጋላሳን፥ ዛካርያሳኮ ይዳ ጎዳ ቃላይ ሀይሳ። 2 ቤተለ ካታማ አሳይ ሳረዜራ፥ ረገም-መለካነ ኤንታራ እስፈ ደእያ አሳታ ጎዳ አንጆይ ያና መላ ዎሳናዉ ኪትዶሶና። 3 ቃስ ኡባፈ ዎልቃማ ጎዳ ኬꬃን ኦꬅያ ካህነታነ ናበታ፥ “ዳሮ ላይꬅ ኦꬅሸ ጋምእዳይሳዳ ኑኒ ሀእካ እቻሻንꬆ አጌናን ዬካናዉነ ፆማናዉ በሲ?” ያግድ ኦይቻና መላ ኪትዶሶና።

4 ሄሳፈ ጉየ፥ ኡባፈ ዎልቃማ ጎዳ ቃላይ ሀይሳዳ ያግድ ታኮ ይስ፦ 5 “ቢታን ደእያ አሳ ኡባስነ ካህነታስ ሀይሳዳ ያጋዳ ኦዳ፦ ‘ህንተ ሀ አꬍዳ ላፑን ታሙ ላይꬃን እቻሻንꬆ አጌናንነ ላፑንꬃ አጌናን ፆምዳይነ ዬክዳይ ታና ቦንቻናሴ? 6 ህንተ ምያ ዎደነ ኡያ ዎደ ህንተዉ ሜታነ ኡዬታ። 7 የሩሳላመ ካታማይነ እያ ዩሹዋን ደእያ ካታማታን ደእያ አሳይ ሸምፖንነ እንጀን ደእዳ ዎደነ ነገባንነ ጋꬋን አሳይ ዎፑ ግድ ደእዳ ዎደ ጎዳይ ባ ናበታ ባጋራ ኦድዳ ቃላይ ሀይሳ ግደኔ?’ ያጋ” ያግስ።

8 ጎዳ ቃላይ ዛካርያሳኮ ሀይሳዳ ያግድ ይስ፦ 9 “ኡባፈ ዎልቃማ ጎዳይ ካሰ እምዳ ኪታይ፥ ‘ሱረ ፕርዳ ፕርድተ፤ ህንተ እሶይ እሱዋስ ኬሀተꬅነ ማሮተꬅ ኦꬅተ። 10 አምኤታ፥ ይኦታ፥ በተ አሳነ ማንቆታ ናቆፍተ። ቃስ ህንተፈ ኦንካ ባ እሻ ቦላ ኢታባ ኦꬃናዉ ባ ዎዛናን ቆፖፎ።’

11 “ሽን ኤንቲ ስኦና እፅዶሶና፤ ዞኮ ዛሪድ ባንታ ሀይꬃ ቱጭዶሶና። 12 ኡባፈ ዎልቃማ ጎዳይ ባ አያናን ካሰ ባ ናበታ ባጋራ ኪትዳ ህግያነ ቃላ ስኦና እፅድ ባንታ ዎዛና ዛላዳ ምንꬅዶሶና። ሄሳ ግሾ፥ ኡባፈ ዎልቃማ ጎዳ ማታፐ ግታ ሀንቆይ ኤንታ ቦላ ይስ። 13 ታኒ ፄግያ ዎደ ኤንቲ ስኦና እፅዳይሳዳ ኤንቲ ፄግያ ዎደ ታኒ ስእከ” ያጌስ ኡባፈ ዎልቃማ ጎዳይ።

14 “ታኒ ጎተ ኤሀዳ ኤንቲ ኤሮና ካዎተꬃታ ግዶን ላላስ። ቢታይ አስ ያነ ሃነ ስመረቶና ካይሳ ቢታ ግድስ፤ ሀ ሎኦ ቢታይ ባይሳ ግድስ” ያጌስ ኡባፈ ዎልቃማ ጎዳይ።