1 ኡባፈ ዎልቃማ ጎዳ ቃላይ ቃስካ ታኮ ሀይሳዳ ያግድ ይስ፦ 2 ኡባፈ ዎልቃማ ጎዳይ፥ “ታኒ ፅዮነስ ዳሮ ቃታይስ፤ እ ምሻይ ታና ፁጌስ። 3 ታኒ ፅዮነ ስማዳ የሩሳላመን ዳና። ቃስ የሩሳላመይ አማንꬅያ ካታማ ጌተታዳ ኤረታና። ኡባፈ ዎልቃማ ጎዳ ዙማይ ጌሻ ዙማ ጌተትድ ፄገታና” ያጌስ።

4 ኡባፈ ዎልቃማ ጎዳይ፥ “ጭምድ ጉፈራ ብያ አደይነ ማጫሳይ ካሰይሳዳ የሩሳላመ ዳባባን ኡታና። 5 የሩሳላመ ካታማ ኦገት ካእያ አደነ ማጫ ናይታን ኩማና” ያጌስ።

6 “አትዳ አሳስ ሄስ ማላልስያባ ግድኮካ፥ ታና ሄስ ማላልስያባዬ? ያጌስ ኡባፈ ዎልቃማ ጎዳይ። 7 ሄኮ ታኒ ታ አሳ ዶሎሀፐነ ዉሎሀፐ ሺሻና። 8 ኤንቲ የሩሳላመን ዳና መላ ኦꬃና። ኤንቲ ታ አሰ ግዳና፤ ታኒ ፅሎነ አማንꬅያ ኤንታ ፆሳ ግዳና” ያጌስ ኡባፈ ዎልቃማ ጎዳይ።

9 ኡባፈ ዎልቃማ ጎዳይ ሀይሳዳ ያጌስ፦ “ህንተኖ፥ ኡባፈ ዎልቃማ ጎዳ ኬꬃ ባሶይ የገትዳ ጋላሳፐ ዶምድ ናበት ኦድዳ ቃላ ስእዳይሳቶ፥ ህንተ ኩሽያ ምንꬅተ፤ ኦሱዋ ምንድ ፖልተ። 10 ሄ ዎድያፐ ካሰ አሳስ ዳሞዘይ፥ መህያስ ቃንፀትያ ከር ባዋ። ታኒ አሳ ኡባ እሱዋ እሱዋ ቦላ ሞርከተꬃን ደንꬅዳ ግሾ፥ ገለይሳስነ ከየይሳስ ሳሮይ ባዋ። 11 ሽን ሀእ ታኒ ሀ አትዳ አሳ ቦላ ካሰ ኦꬅዳይሳዳ ኦꬅከ” ያጌስ ኡባፈ ዎልቃማ ጎዳይ።

12 “ኤንቲ ዘርዳ ኡባይ ዶላና፤ ዎይነይ ባ አይፍያ እማና፤ ጎሻይ ካꬃን ኩማና፤ ሳሎት ባንታ እራ እማና። ሀይሳ ኡባ አትዳ አሳስ ላታ ኦꬃዳ እማና። 13 ህንተኖ፥ ይሁዳ አሳዉ፥ እስራኤለ አሳዉ፥ ካዎተꬃታ ግዶን ህንተ ባደትዳይሳታ ግድደታ፥ ሽን ሀእ ታኒ ህንተና አሻና፤ ህንተ አንጀትዳይሳታ ግዳና። ያዮፍተ! ህንተ ኩሽያ ምንꬅተ!” ያጌስ።

14 “ህንተ ማይዛት ታና ይሎይዳ ዎደ ኤንታ ቃይ ባይና ሴራናዉ ቆፋ ቃቻስ። 15 ሀእ ታኒ የሩሳላመስነ ይሁዳስ ሎኦባ ኦꬃናዉ ቆፋ ቃቻስ። ህዛ ያዮፍተ! 16 ህንተ ኦꬃናዉ ኮሽያባይ ሀይሳ፦ እሶይ እሱዋራ ቱማ ኦደትተ፤ ፕርዳ ዳባባን ቱማነ ሳሩዋ ኤህያ ፕርዳ ፕርድተ። 17 እሶይ እሱዋ ቆሀናዉ ኢታባ ህንተ ዎዛናን ማቀቶፍተ፤ ዎርዶን ጫቆፍተ። ሀይሳታ ኡባ ታኒ እፃይስ” ያጌስ ኡባፈ ዎልቃማ ጎዳይ።

18 ኡባፈ ዎልቃማ ጎዳ ቃላይ ቃስካ ታኮ ሀይሳዳ ያግድ ይስ፦ 19 “ኦይዳንꬆ፥ እቻሻንꬆ፥ ላፑንꬆነ ታማንꬆ አጌናን ህንተ ፆምዳ ፆማይ ይሁዳ አሳስ ኡፋይስነ እንጀ ዎደ ግዳና። ሄሳ ግሾ፥ ህንተ ቱማተꬅነ ሳሮተꬅ ዶስተ” ያጌስ።

20 “ዳሮ አሳይነ ዳሮ ካታማታን ደእያ አሳይ የሩሳላመ ያና። 21 እስ ካታማን ደእያ አሳይ ሀራ ካታማን ደእያ አሳኮ ብድ፥ ‘ጎዳ አንጆይ ያና መላ ዎሳናዉነ ኡባፈ ዎልቃማ ጎዳ ኮያናዉ አነ ቦስ፤ ታንካ ባይስ’ ያጋና። 22 ቃስ ዳሮ አሳይነ ዎልቃማ ካዎተꬃት ኡባፈ ዎልቃማ ጎዳ ኮያናዉነ ዎሳናዉ የሩሳላመ ያና። 23 ሄ ጋላሳታን ዱማ ዱማ ቃላን ሃሳያ ካዎተꬃታ ኡባፈ ታሙ አሳት ይድ፥ እስ አይሁደ አድያ ማኡዋ ማጫራ ኦይክድ፥ ‘ፆሳይ ህንተራ ደኤይሳ ኑኒ ስእዳ ግሾ፥ ኑኒ ህንተራ ባና’ ያጋና” ያጌስ ኡባፈ ዎልቃማ ጎዳይ።